کراچی : پاکستانی نژاد برطانوی شہری پہلی بار اپنی گاڑی پر برطانیہ سے پاکستان پہنچا، اس سفر کے دوران انہوں نے 13 ممالک کی سرحدوں کو عبور کیا۔
مشہور مقولہ ہے کہ اگر ارادے پختہ ہوں تو ناممکن بھی ممکن ہوجاتا ہےاور منزل آسان ہو ہی جاتی ہے جسے فضل اللہ بلوچ نے سچ ثابت کر دکھایا۔
اے آر وائی نیوز کوٹری کے نمائندے اشوک شرما کی رپورٹ کے مطابق پاکستانی نژاد برطانوی شہری فضل اللہ بلوچ نے 10 روز میں 10 ہزار کلومیٹر کا فاصلہ طے کیا اور 13ممالک سر ہوتے ہوئے اپنے آبائی وطن کی پاک سر زمین پر پہنچے۔
فضل اللہ بلوچ کا تعلق سندھ کے شہر کوٹری سے ہے وہ زمانہ طالب علمی میں اسٹوڈنٹ ویزا پر برطانیہ گئے تھے، اور 22 سال بعد بذریہ سڑک اپنی گاڑی پر پاکستان واپس لوٹے ہیں۔
اے آر وائی نیوز سے گفتگو کرتے ہوئے انہوں نے بتایا کہ برطانیہ سے پاکستان سفر کے دوران میری گاڑی پر چسپاں پاکستان کا جھنڈا دیکھ کر بہت سے لوگوں نے خوشی کا اظہار کیا اور اپنے ملک میں میرا استقبال کرتے ہوئے بھرپور تعاون کیا، اور پاکستان پہنچنے پر یہاں کے بارڈر حکام نے بھی کاغذات کی تکمیل کیلیے مکمل سپورٹ کی۔
فضل اللہ بلوچ لندن میں چارٹرڈ اکاؤنٹنٹ ہیں انہوں نے خاص طور پر اس یادگار سفر کیلیے ڈیفنڈر ہنڈرڈ10 گاڑی کا انتخاب کیا۔