ARYNews.tv | Urdu – Har Lamha Bakhabar

Tag: London

  • لندن کی زیر زمین ٹرین میں دھماکہ، متعدد زخمی

    لندن کی زیر زمین ٹرین میں دھماکہ، متعدد زخمی

    لندن: برطانوی دارالحکومت لندن کے جنوبی حصے میں واقع زیر زمین ٹرین اسٹیشن پارسنز گرین انڈر گراؤنڈ میں کھڑی ٹرین میں ایک بالٹی میں رکھا گیا بم دھماکے سے پھٹ گیا جس کے نتیجے میں 20 افراد جھلس کر زخمی ہوئے ہیں۔

    دھماکہ مقامی وقت کے مطابق 8 بج کر 20 منٹ پر پیش آیا۔ برطانوی پولیس نے واقعے کو دہشت گردی قرار دیا ہے۔

    پولیس کی جانب سے فراہم کی گئی مزید معلومات کے مطابق بم کسی سپر اسٹور کے تھیلے کے اندر سفید رنگ کی بالٹی میں رکھا گیا تھا اور ابتدائی تفتیش کے مطابق بم گھریلو ساختہ تھا۔ دھماکے کے بعد بالٹی میں آگ بھڑک اٹھی۔

    دھماکے میں 2 افراد کے شدید جھلسنے کی اطلاع ہے جبکہ مجموعی طور پر اب تک 20 افراد زخمی ہوئے ہیں جنہیں مختلف اسپتالوں کی طرف روانہ کردیا گیا ہے۔ زیادہ تر افراد کے چہروں پر زخم آئے ہیں۔

    ریسیکو ٹیمیں، پولیس اور متعدد ایمبولینسز دھماکے کے مقام پر موجود ہیں اور امدادی کارروائیاں جاری ہیں۔

    واقعے کے بعد ایجوئیر روڈ اور ومبلڈن کے درمیان ٹرین سروس معطل کردی گئی ہے۔

    برطانوی رہنماؤں کا ردعمل

    پارسنز گرین انڈر گراؤنڈ ٹیوب میں دھماکے کے بعد برطانوی وزیر اعظم تھریسا مئے نے سماجی رابطوں کی ویب سائٹ ٹوئٹر پر ٹوئٹ کرتے ہوئے زخمی ہونے والے افراد سے ہمدردی کا اظہار کیا جبکہ امدادی کارروائیوں میں مصروف اداروں کی حوصلہ افزائی بھی کی۔

    برطانوی میڈیا کے مطابق انہوں نے کابینہ کا ہنگامی اجلاس بھی طلب کرلیا ہے۔

    دوسری جانب لندن کے میئر صادق خان نے میٹرو پولیٹن پولیس کا حوالہ دیتے ہوئے اس بات کی تصدیق کی کہ مذکورہ واقعہ دہشت گردی کا شاخسانہ ہے۔

    انہوں نے کہا کہ وہ موقع پر موجود پولیس اور دیگر امدادی اداروں سے رابطے میں ہیں اور ساری صورتحال کا جائزہ لے رہے ہیں۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • قطر بحران : پاکستانیوں سمیت 490 غیرملکی سعودی عرب میں پھنس گئے،انکشاف

    قطر بحران : پاکستانیوں سمیت 490 غیرملکی سعودی عرب میں پھنس گئے،انکشاف

    لندن : قطری حکومت نے انکشاف کیا ہے کہ حالیہ خلیجی بحران کے بعد  سعودی عرب میں روزگار کے لیے جانے والے پاکستانیوں سمیت مختلف ممالک کے 490 ملازمین وہاں دو ماہ سے پھنسے ہوئے ہیں، بحران کے بعد قطری شہری تو نکل آئے مگر ان کے زرعی فارم کے غیر ملکی ملازمین کو روک لیا گیا۔

    قطر کی قومی کمیٹی برائے انسانی حقوق کے مطابق پاکستان سمیت کئی ممالک سے تعلق رکھنے والے 490 غیر ملکی ملازمین ایسے ہیں جو رواں سال 5 جون کو شروع ہونے والے خلیجی بحران کے آغاز سے اب تک سعودی عرب میں پھنسے ہوئے ہیں، ان افراد میں بڑی تعداد پاکستان، بھارت، نیپال اور سوڈان سے تعلق رکھتی ہے۔

    برطانوی نشریاتی ادارے بی بی سی کے مطابق کمیٹی کے بین الاقوامی تعاون ڈویژن کے سربراہ سعد سلطان آل عبداللہ نے انہیں بتایا کہ سعودی عرب میں پھنسے ایسے افراد کی اصل تعداد اس سے کہیں زیادہ ہو سکتی ہے۔

    ان کا کہنا تھا کہ قطر سے قطع تعلق کا اعلان کرنے کے ساتھ ہی تینوں خلیجی ممالک نے اپنے ہاں مقیم قطری باشندوں کو ملک چھوڑنے کا حکم دے دیا تھا جبکہ وہاں موجود ان کی جائیدادیں اور اثاثے منجمد کر دیئے گئے تھے۔

    انہوں نے بتایا کہ بہت سے قطری باشندوں کے سعودی عرب میں زرعی فارم تھے جن پر ان کے غیرملکی ملازمین کام کرتے تھے، قطر کے محاصرے کے بعد قطری شہری تو وہاں سے بحفاظت نکل آئے مگر ان کے ملازمین کو روک لیا گیا۔

    سعد سلطان ال عبداللہ کے مطابق تین خلیجی ممالک کی جانب سے قطری شہریوں کے بنکوں میں موجود اثاثے منجمد کرنے اور رقم کی ترسیل پر پابندی کے باعث قطری مالکان کی طرف سے سعودی عرب میں پھنسے ان ملازمین کو گذشتہ دو ماہ سے تنخواہوں کی ادائیگی بھی ممکن نہیں ہو پائی ہے۔

    یاد رہے کہ قطر کا واحد زمینی رابطہ صرف سعودی عرب کے ساتھ ہے اور باقی تین اطراف سے اس کو خلیج فارس کے سمندر نے گھیر رکھا ہے۔

  • میں نے گاؤں جلتے دیکھا،روہنگیا مسلمانوں پرمظالم کا آنکھوں دیکھا حال

    میں نے گاؤں جلتے دیکھا،روہنگیا مسلمانوں پرمظالم کا آنکھوں دیکھا حال

    لندن : برطانوی نشریاتی ادارے بی بی سی کے نامہ نگار جوناتھن ہیڈ نے بتایا ہے کہ انہوں نے میانمار میں خود اپنی آنکھوں کے سامنے ایک گاؤں کو جلتے ہوئے دیکھا ہے, انہیں میانمار حکومت کی جانب سے چند صحافیوں کے ساتھ حالات کا جائزہ لینے کیلئے بلایا گیا تھا۔

    ان کا کہنا تھا کہ وہ اس بات کے پابند تھے کہ وہ صرف وہیں جا سکتے ہیں جہاں انہیں مقامی حکومت لے جائے صحافیوں نے کہیں اورجانے کی اجازت مانگی تو انہیں منع کردیا گیا۔

    جوناتھن نے بتایا کہ وہ ماؤنگدا کے قریبی علاقے ال لے تھان کیاؤ سے لوٹ رہے تھے کہ ایک کھیت سے دھواں اٹھتا دیکھا۔ ہم اس طرف بھاگے تو وہاں خطرناک آگ لگی ہوئی تھی، بیس سے تیس منٹ میں پورا گاؤں راکھ ہوگیا۔

    کچھ دیر میں وہاں سے چند نوجوان چھریاں، تلواریں اور غلیلیں تھامے نکلے، کیمرے پر نہ آنے کی شرط پر انہوں نے صحافیوں کو بتایا کہ وہ وہ رخائن کے بودھسٹ ہیں، یہ آگ انہوں نے ہی لگائی ہے جس میں پولیس نے بھی ان کی مدد کی۔

    صحافیوں کی ٹیم کو کچھ دور ایک اسلامی مدرسہ دکھائی دیا جس کی چھت جھلس رہی تھی، راستے میں کھلونے، خواتین کے کپڑے اور گھروں کا سامان بکھرا پڑا تھا، ایک جگ میں بچا ہوا پیٹرول بھی ملا۔

    جوناتھن نے لکھا کہ جب تک وہ اس علاقےسے باہر نکلے تمام گھر سلگ رہے تھے کچھ ہی دیر بعد صرف سیاہ ڈھانچے باقی رہ گئے۔

    واضح رہے کہ دو ہفتے قبل میانمار کے ریاست رخائن میں پھر سے بھڑک اٹھنے والے تشدد کے بعد سے اب تک ایک لاکھ 64 ہزار روہنگیا مسلمان بنگلہ دیش میں پناہ لینے پر مجبور ہو چکے ہیں۔

    پناہ گزینوں کا کہنا ہے کہ میانمار کی فوج اور رخائن کے بودھ ان کے گاؤں کو تباہ و برباد کر رہے ہیں۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

  • مشرقی لندن میں موٹرسائیکل سوارخاتون پر تیزاب پھینک کرفرار

    مشرقی لندن میں موٹرسائیکل سوارخاتون پر تیزاب پھینک کرفرار

    لندن: مشرقی لندن میں موٹر سائیکل سوار خاتون پر تیزاب پھینک کر فرار ہوگیا۔

    تفصیلات کے مطابق لندن میں تیزاب گردی کے واقعات میں مسلسل اضافہ ہورہا ہے ، ایک اورخاتون پر تیزاب پھینک دیا گیا۔

    تیزاب گردی کا واقعہ مشرقی لندن کے مشہور شاپنگ سینٹر کے باہر پیش آیا، جہاں موٹر سائیکل سوارخاتون پرتیزاب پھینک کرفرارہوگیا۔

    لندن پولیس کے مطابق خاتون پر تیزاب سڑک عبور کرتے ہوئے پھینکا گیا، واقعے کے فوری بعد پولیس اور ایمبولینس سروس موقع پر پہنچ گئی اور خاتون کو اسپتال منتقل کر دیا گیا۔

    مزید پڑھیں : لندن: تیزاب گردی کا ایک اور واقعہ، 2 ایشیائی نوجوانوں پر حملہ

    یاد رہے کہ لندن میں گزشتہ چند ماہ کے دوران ایشیائی افراد پر تیزاب حملوں میں اضافہ ہوا ہے، جون میں ماڈل ریشم خان اوران کے کزن پرتیزاب پھینکا گیا، جس سے ان کا چہرہ بری طرح جھلس گیا تھا۔

    جولائی میں مشرقی لندن میں سات افراد کو تیزاب سے نشانہ بنایا گیا جبکہ اپریل میں لندن کے ایک کلب میں تیزاب گردی کے واقعہ میں بیس افراد زخمی ہوئے تھے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

  • سابق وزیراعظم نوازشریف لندن کےلئے روانہ

    سابق وزیراعظم نوازشریف لندن کےلئے روانہ

    لاہور: سابق وزیراعظم نوازشریف لندن کےلئے روانہ ہوگئے ، نوازشریف عیدالضحیٰ بھی لندن میں ہی منائیں گے۔

    تفصیلات کے مطابق سابق وزیراعظم نوازشریف غیرملکی ایئرلائن کی پرواز625سے  لندن روانہ ہوگئے، نوازشریف کے خاص ملازم اعظم جان بھی ہمراہ ہیں، نواز شریف کو الفاون سیٹ نمبر الاٹ کیا گیا تھا جبکہ ان کے سامان میں 4 بیگ شامل تھے۔

    نوازشریف اہلیہ کی عیادت کریں گے اور ان کے معالجین سے ملاقات کریں گے جبکہ عیدالضحیٰ بھی لندن میں ہی منائیں گے۔

    شہبازشریف نے ایئرپورٹ پرسابق وزیراعظم کوالوداع کیا، اس موقع پر علامہ اقبال ایئرپورٹ پر سیکیورٹی اداروں کو الرٹ کردیا گیا۔

    خیال رہے کہ نوازشریف کی اہلیہ کلثوم نوازعلاج کیلئے پہلے ہی لندن میں مقیم ہیں جبکہ نوازشریف کے بیٹے حسن اور حسین نواز بھی لندن میں موجود ہیں۔

    یاد رہے کہ سابق وزیر اعظم میاں نواز شریف کی اہلیہ بیگم کلثوم نواز کو گلے کے کینسرکی تشخیص ہوئی تھی، ڈاکٹرز کا کہنا ہے بیگم کلثوم نوازکا کینسر ابتدائی مراحل میں ہے، جو قابل علاج ہے اور وہ جلد صحت یاب ہو جائیں گی۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

  • پاکستان عوامی تحریک کے سربراہ طاہرالقادری لندن روانہ

    پاکستان عوامی تحریک کے سربراہ طاہرالقادری لندن روانہ

    لاہور: پاکستان عوامی تحریک کے سربراہ ڈاکٹر طاہرالقادری کا کہنا ہے کہ قومی احتساب بیورو(نیب) کو اپنی ساکھ بحال کرنے کا موقع ملا ہے۔

    تفصیلات کے مطابق پاکستان عوامی تحریک کے سربراہ ڈاکٹر طاہرالقادری غیر ملکی پرواز سے لندن روانہ ہوگئے۔ ترجمان عوامی تحریک کا کہنا ہے کہ طاہرالقادری لندن ،مانچسٹر میں بین الاقوامی کانفرنس سےخطاب کریں گے۔

    ڈاکٹر طاہرالقادری کی واپسی سے متعلق ترجمان عوامی تحریک کا کہنا تھا کہ طاہرالقادری 31اگست کووطن واپس پہنچیں گے۔

    لندن روانگی سے قبل لاہورایئرپورٹ پر میڈیا سے گفتگو کرتےہوئے ڈاکٹر طاہرالقادری کا کہنا تھا کہ عدالت نے نوازشریف کو 3 بار بے گناہی ثابت کرنےکا موقع دیا۔

    انہوں نے کہا کہ جے آئی ٹی نے تین ماہ نوازشریف کو مہلت دی جبکہ شریف خاندان کو تیسری بار نیب نے موقع دیا ہے۔

    پاکستان عوامی تحریک کے سربراہ کا کہنا تھا کہ نوازشریف پیش نہ ہوئے تونیب کو گرفتارکرنےکا اختیار ہے جبکہ نوازشریف کسی بھی وقت گرفتار ہوسکتے ہیں۔

    پاناما کیس : نوازشریف اوران کے بچے دوسری پیشی پر بھی نہ آئے

    طاہرالقادری کا کہنا تھا کہ سانحہ ماڈل ٹاؤن کےلواحقین کو انشا اللہ انصاف ملے گا۔ انہوں نے کہا کہ جسٹس باقر نجفی کی رپورٹ ہر صورت منظرعام پر آئے گی۔

    پاکستان عوامی تحریک کے سربراہ کا کہنا تھا کہ امید ہے نیب چور پکڑنے میں اپنا کردار اداکرے گی۔ انہوں نے کہا کہ مسلم لیگ ن آئین میں ترمیم نہیں کرسکے گی۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

  • سابق وزیر اعظم نواز شریف کی اہلیہ کلثوم نواز لندن روانہ

    سابق وزیر اعظم نواز شریف کی اہلیہ کلثوم نواز لندن روانہ

    لاہور : سابق وزیر اعظم نواز شریف کی اہلیہ بیگم کلثوم نواز لندن روانہ ہوگئیں، انھیں  آج سہ پہر3بجےالیکشن کمیشن میں پیش ہونا تھا۔

    تفصیلات کے مطابق بیگم کلثوم نواز لندن روانگی کےلیے ایئرپورٹ پہنچی اور پی کے757سےلندن روانہ ہوگئیں، انکا کا سیٹ نمبر ون اے ہے، اے آر وائی نیوز نے ان کے ٹکٹ کی کاپی حاصل کرلی ہے۔

    ذرائع کا کہنا ہے کہ کلثوم  نوازاین اے 120میں الیکشن کےدن موجود نہیں ہوں گی، کلثوم نواز  24ستمبر کو وطن واپس آئیں گی۔

    خیال رہے کہ بیگم کلثوم نواز نے آج سہ پہر3بجےالیکشن کمیشن میں پیش ہونا تھا۔

    یاد رہے کہ سپریم کورٹ آف پاکستان نے گزشتہ ماہ سابق وزیراعظم نواز شریف کو پاناما پیپرز کے کیس میں نا اہل قرار دیا تھا، سابق وزیراعظم کی نا اہلی کے سبب حلقہ این اے 120 سے ان کی پارلیمنٹ کی نشست بھی خالی ہوگئی، جس پر ضمنی انتخابات 45 دن کے اندر ہوں گے۔

    مزید پڑھیں : این اے 120 ، کلثوم نواز ضمنی انتخاب لڑسکیں گی یا نہیں، فیصلہ آج ہوگا

    مسلم لیگ ن نے اس نشست پر کلثوم نواز کو میدان میں اتارا تھا، جس کے بعد پی ٹی آئی ، پیپلز پارٹی اور پی ٹی اے نے سابق وزیر اعظم کی اہلیہ کے کاغذاتِ نامزدگی پر دس اعتراضات اٹھائے تھے ، جس میں کہا گیا تھا کہ کلثوم نواز نےاقامہ لیا لیکن اس کا ذکر نہیں کیا، ٹیکس گوشواروں میں تنخواہ کا ذکر بھی نہیں جبکہ کلثوم نواز پر غداری کی ایف آئی آر بھی سامنے آگئی،اُن پر فوج کے خلاف تقریر کے الزامات ہیں۔

    اعتراضات سامنے آنے کے بعد الیکشن کمیشن نے کلثوم نواز کو آج طلب کیا تھا، کلثوم نواز کے کاغذات نامزدگی کی جانچ پڑتال دوپہر تین بج ہوگی۔

    این اے ایک سو بیس لاہور میں ضمنی انتخاب کے لیے پولنگ سترہ ستمبر کو ہونی ہے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

  • یوسین بولٹ آخری دوڑ میں لڑکھڑا کرگرگئے

    یوسین بولٹ آخری دوڑ میں لڑکھڑا کرگرگئے

    لندن : دنیا کےتیز ترین ایتھلیٹ یوسین بولٹ اپنے کیریئر کی آخری ریس میں لڑکھڑاتے ہوئے گرگئے اور ریس ختم نہ کرسکے۔

    تفصیلات کے مطابق جمیکا کے یوسین بولٹ اپنے شاندار کیریئر کی آخری ریس میں پٹھا کھینچ جانے کے باعث دوڑتے ہوئے گر گئے اور ریس ختم نہ کر سکے۔

    ریس حتم ہونے کے بعد ان کے لیے وہیل چیئر منگوانی پڑی اور ان کے ساتھیوں نے ان کو سہارا دے کر اٹھایا۔

    دوسری جانب برطانیہ کی ٹیم نے مردوں کی چارسو میٹر کی ریس میں طلائی تمغہ اپنے نام کر لیا۔

    یہ پہلا موقع تھا جب برطانوی ٹیم نے کسی عالمی مقابلے میں طلائی تمغہ حاصل کیا ہو۔ امریکہ نے چاندی کا تمغہ جبکہ جاپان نے کانسی کا تمغہ حاصل کیا۔

    یاد رہے کہ اس سے قبل برطانیہ کے مو فرح کو ایتھوپیا کے مختار ادریس نے 5000 میٹر کی دوڑ میں ہرا دیا تھا۔

    مو فرح کا برطانیہ میں یہ آخری مقابلہ تھا اور اس کے بعد وہ اسی ماہ زیورخ میں 5000 میٹر کی ریس میں شرکت کرنے کے بعد اپنے کیریئر کو الوداع کہہ دیں گے۔

    یوسین بولٹ اپنے کریئر کی آخری ریس میں پیچھے رہ گئے

    واضح رہے کہ گزشتہ ہفتے دنیا کےتیز ترین ایتھلیٹ یوسین بولٹ کو اپنےکریئر کی آخری ریس میں اس وقت جھٹکا لگا تھا جب امریکہ کے جسٹن گیٹلن نے انہیں طلائی تمغے سے محروم کر دیا تھا۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

  • یوسین بولٹ نے ورلڈ ایتھلیٹکس چیمپیئن شپ کا پہلا راؤنڈ جیت لیا

    یوسین بولٹ نے ورلڈ ایتھلیٹکس چیمپیئن شپ کا پہلا راؤنڈ جیت لیا

    لندن : دنیا کے تیز ترین انسان جمیکا کے یوسین بولٹ نے لندن میں جاری ورلڈ ایتھلیٹکس چیمپئن شپ میں سو میٹر ریس کا پہلا راؤنڈ جیت لیا۔

    تفصیلات کے مطابق آٹھ مرتبہ کے اولمپک چیمپئن جمیکا کے یوسین بولٹ آخری بار ایکشن میں ہیں، لندن میں جاری ورلڈ ایتھلیٹکس چیمپئن شپ کی سو میٹر دوڑ کی ہیٹ میں یوسین بولٹ بازی لے گئے۔

    بولٹ نے مقررہ فاصلہ دس اعشاریہ صفر سات سیکنڈز میں طے کیا، بولٹ آج گولڈ میڈل کیلئے قسمت آزمائیں گے۔ دوسری جانب مردوں کی دس ہزار میٹر ریس برطانیہ کے موفرا نے جیت لی۔

    مزید پڑھیں: یوسین بولٹ نےریو اولمپکس میں طلائی تمغہ جیت لیا

    برطانوی ایتھلیٹ موفرا نے لگاتار 10 واں عالمی ٹائٹل اپنے نام کیا، موفرا نے مقررہ فاصلہ چھبیس منٹ انچاس اعشاریہ پانچ سیکنڈز میں مکمل کرتے ہوئے گولڈ میڈل جیت لیا۔

    مزید پڑھیں: بیجنگ کامیدان بھی یوسین بولٹ کےنام

    چوتیس سالہ انگلش ایتھلیٹ موفرا اب پانچ ہزار میٹر ریس میں بھی حصہ لیں گے، جس میں کامیابی کی صورت میں وہ لگاتار تیسری بار ورلڈ ایونٹ میں ڈبلز فاتح بن سکتے ہیں۔

    مزید پڑھیں: یوسین بولٹ نے 10 سیکنڈز میں ریس جیت لی

    علاوہ ازیں مینز لانگ جمپ میں اولمپک چیمپئن امریکہ کے جیف ہینڈرسن نے فائنل کے لئے کوالیفائی کرلیا۔

  • شریف خاندان کے برطانوی اثاثوں کی چھان بین کی جائے، ٹرانسپیرنسی انٹرنیشنل

    شریف خاندان کے برطانوی اثاثوں کی چھان بین کی جائے، ٹرانسپیرنسی انٹرنیشنل

    لندن : ٹرانسپیرنسی انٹرنیشنل نے برطانیہ سے نوازشریف کے اثاثوں کی چھان بین کا مطالبہ کردیا، برطانوی حکومت کو لکھے گئے خط میں کہا گیا ہے کہ سابق وزیر اعظم کی جائیدادیں ناجائز ذرائع سےحاصل کی گئی ہیں تو انہیں ضبط کیا جائے۔

    تفصیلات کے مطابق عالمی تنظیم ٹرانسپیرنسی انٹرنیشنل نے سابق وزیر اعظم نوازشریف کی لندن جائیداد کے حوالے سے برطانوی حکومت کو خط لکھا ہے جس میں مطالبہ کیا گیا ہے کہ عدالتی فیصلے کے بعد وزارت عظمیٰ سے نااہل ہو نے والے نواز شریف کی لندن میں جائیداد پرکارروائی کی جائے۔

    تحقیقات کے بعد ان کی اگر جائیداد ناجائز ذرائع سے حاصل کی گئی ہے تو اسے فوری طور پر ضبط کیا جائے، خط میں مزید کہا گیا ہے کہ کیا جائیداد تاحال نوازشریف کے اہل خانہ کی ملکیت ہے؟ کیا شریف خاندان چار جائیدادوں کی ملکیت کا دعویدار ہے، فلیٹس پاناما لیکس میں بتائی گئیں آف شور کمپنیوں کے پاس ہیں۔

    ٹرانسپیرنسی انٹرنیشنل کا کہنا ہے کہ پاناما لیکس کے مطابق آف شور کمپنیاں نوازشریف کے رشتےداروں کی ہیں، لہٰذا آف شور کمپنیوں کی ملکیت کےبارے میں شبہات ہیں، تحقیقات کی جائیں کہ برطانیہ میں غیرملکی کمپنیوں کےاصل مالک کون ہیں؟ تاہم شواہد کی عدم موجودگی پر نہیں کہا جا سکتا کہ کمپنیز کون چلارہا ہے۔

    نوازشریف کا کیس تمام صورتحال کیلئے مثالی ہے، ڈپٹی ڈائریکٹر پالیسی ٹرانسپیرنسی انٹرنیشنل ڈنکن ہیمز کا کہنا ہے کہ برطانوی حکومت ایسی جائیدادیں ضبط کرکے واپس لے، اثاثے وہیں واپس کریں جہاں سے انہیں لوٹا گیا ہے، انہوں نے کہا کہ فوری اقدامات نہ کیے گئے تو برطانیہ لوٹ مار کی رقم چھپانے کی جگہ بن جائیگا۔