کراچی: متحدہ قومی موومنٹ کے قائد الطاف حسین نے کہاہے کہ مسئلہ کشمیر کشمیری عوام کی خواہشات اور امنگوں کے مطابق حل ہوناچاہیے۔
یوم یکجہتی کشمیر کے موقع پر اپنے بیان میں انہوں نے کہاکہ حق خودارادیت کاحصول کشمیری عوام کابنیادی حق ہے انہیں ان کا حق ملناچاہیے۔
اس حق کے حصول کیلئے مقبوضہ کشمیر کے عوام نے بڑے پیمانے پر جانی قربانیاں دی ہیں اورآج تک دے رہے ہیں۔
انہوں نے کشمیری عوام سے اظہار یکجہتی کرتے ہوئے اس امید کا اظہار کیا کہ حق خود ارادیت کیلئے مقبوضہ کشمیرکے عوام کی قربانیاں ضرور رنگ لائیں گی ۔
کراچی:متحدہ قومی مومنٹ نےکارکنوں کےقتل پرسندھ حکومت کا بنایا گیا جوڈیشل کمیشن مسترد کردیا۔
متحدہ قومی مومنٹ کے رہنماء قمر منصور نے پریس کانفرنس کرتے ہوئے کہا ہے کہ کارکنان کی ہلاکت پر حکومت سندھ کی جانب سے ریٹائرڈ جج کی سربراہی میں جوڈیشل کمیشن مناسب نہیں۔
ان کا کہنا تھا کہ جوڈیشل کمیشن بنانا ہے تو حاضر سروس جج کی سربراہی میں بنانا ہو گا۔
اس موقع پر ایم کیو ایم کے رہنماء فاروق ستار نے کہا ہے کہ رینجرز 25 سال سے کراچی میں ہے یہ جزوی مارشل لا ہے، ٹارگٹڈ آپریشن سے کہیں بہتری آئی بھی تو باقی جگہوں پر صورتحال ابتر ہو گئی۔
واضح رہے گزشتہ روز کراچی میں ایم کیو ایم کے کارکن سہیل احمد اور فراز عالم کے قتل کی تحقیقات کے لئے وزیر اعلیٰ سندھ نے عدالتی کمیشن تشکیل دیا تھا اور جسٹس ریٹائرڈ غلام سرور کو عدالتی کمیشن کا مقررہ کیا گیا تھا۔
فاروق ستار نے کہا کہ صرف دو کارکنان کے قتل پر ہی جوڈیشل کمیشن کا قیام نہیں بلکہ بیس کارکنان لاپتہ اور چھتیس ماورائے عدالت قتل ہیں،اسکی بھی انکوائری ہونی چاہیے ، متحدہ نے حکومت اور آرمی چیف سے مطالبہ کیا کہ قتال فی سبیل للہ کا درس دینے والوں،طالبان سے مذاکرات اور انکو بھائی کہنے والوں کے خلاف بھر پور کارروائی کرنا ہوگی۔
کراچی : ایم کیو ایم کے قائد الطاف حسین نے کہا ہے ملک بچانے کیلئے جماعت اسلامی پر پابندی لگائی جائے۔
متحدہ قومی مومنٹ کے قائدالطاف حسین نے اپنے ایک بیان میں کہا ہے کہ گزشتہ ماہ پشاورکے آرمی پبلک اسکول میں ہونے والا اندوہناک سانحہ بھی قوم کو متحد نہ کرسکا ۔
الطاف حسین کا کہنا تھا امریکی وزیر خارجہ جان کیری نے انڈیا کے دورے میں اربوں روپے کی امداد دی لیکن پاکستان کو صرف 25کروڑ ڈالردیے جو دہشت گردی کی جنگ میں پاکستان کے نقصانات کے سامنے اونٹ کے منہ میں زیرہ دینے کے مترادف ہے۔
انہوں نے کہا کہ بھارت مستقل با رڈرز کی خلاف ورزی کرکے پاکستان کی سرحدوں کے اندر گولہ باری کر رہاہے ، لوگ شہید ہورہے ہیں لیکن اس پر امریکی وزیر خارجہ نے مذمت کا اظہار تک نہیں کیا۔
الطاف حسین کا کہنا تھا طالبان اور داعش کے لوگ جماعت اسلامی کے رہنماوں کے گھروں سے گرفتار ہو رہے ہیں، ملک بچانے کیلئے جماعت اسلامی پر پابندی لگائی جائے۔
لندن : متحدہ قومی موومنٹ کے قائدالطاف حسین نے شاہ فیصل کالونی کے علاقے گرین ٹاوٴن میں قائم آصف بوائزاسکول اوراختر گرلز سیکنڈری اسکول پر قبضہ مافیاکی جانب سے قبضہ کرنے اور اسے مسمارکرکے کھنڈرمیں تبدیل کرنے کی شدید مذمت کی ہے۔
اپنے ایک بیان میں انہوں نے کہاکہ مجھے ایک نجی ٹی وی پر یہ دیکھ کرانتہائی دلی صدمہ پہنچاکہ اسکولوں کی معصوم بچیاں کھنڈرپربیٹھ کرتعلیم حاصل کرنے پر مجبورہیں۔انہوں نے کہاکہ اسکولوں کومسمارکئے جانے پرمعصوم بچیوں کے بہتے ہوئے آنسوقہرخداوندی کودعوت دے رہے ہیں۔
الطاف حسین نے گورنرسندھ ڈاکٹر عشرت العبادسے مطالبہ کیاہے کہ شاہ فیصل کالونی میں قائم آصف بوائزاسکول اوراختر گرلز سیکنڈری اسکول پر قبضہ مافیاکی جانب سے قبضہ اورتوڑے جانے کاہنگامی بنیادپر نوٹس لیں اورقبضہ مافیاکے جن عناصرنے ان اسکولوں پر قبضہ کرکے اسے ملبہ کاڈھیربنایاہے انہیں فی الفورگرفتارکیاجائے خواہ وہ قبضہ مافیاکے عناصرکتنے ہی بااثرکیوں نہ ہوں۔
انہوں نے کہا کہ اگر اس میں ایم کیوایم کابھی کوئی فردیاافراد ملوث ہوں توان کے ساتھ بھی کسی قسم کی کوئی رعایت نہ کی جائے اورانہیں گرفتارکرکے قانون کے مطابق سخت سے سخت سزادی جائے ۔
الطاف حسین نے اسکولوں پرقبضہ کی خبرکانوٹس لیتے ہوئے فوری طورپر گورنر سندھ ڈاکٹر عشرت العبادسے رابطہ کیااور مطالبہ کیاکہ دونوں اسکولوں کی تعمیر کافی الفورآغازکیاجائے اوراسکولوں کی تعمیرمکمل ہونے تک دونوں اسکولوں میں زیرتعلیم بچیوں کی تعلیم کافی الفورکوئی متبادل انتظام کیاجائے ۔
انہوں نے مزیدکہاکہ اگرگورنرسندھ ڈاکٹرعشر ت العبادکچھ نہیں کرسکتے توفی الفورگورنرشپ سے استعفیٰ دیدیں ۔الطاف حسین نے آصف بوائزاسکول اوراختر گرلز سیکنڈری اسکول کی انتظامیہ، اساتذہ اوراسکول کے بچوں بچیوں سے دلی ہمدردی کااظہارکیا۔
ان کا کہنا تھا کہ میں آپ کے دکھ اورغم میں برابرکاشریک ہوں اورآپ کویقین دلاتاہوں کہ اسکولوں پرقبضہ ختم کرانے اوراس کی دوبارہ تعمیرہونے تک چین سے نہیں بیٹھوں گا۔
لندن: ہونے والے فیشن شو میں معروف فیشن ڈیزائنر جیریمی اسکاٹ کے بنائے نت نئے مردانہ ڈیزائنز نے دھوم مچا دی ہے۔
لندن میں ہونے والے فیشن شو میں نت نئے منفرد انداز دیکھنے کو ملے، معروف ڈیزائنر جیریمی اسکاٹ کے مردانہ ڈیزائنوں نے نوجوانوں کی توجہ اپنی جانب مبذول کرالی، لندن کی سخت سردی میں بارش کے باوجود نوجوانوں کی بڑی تعداد فیشن شو دیکھنے پہنچی
معروف ڈیزائنر جیریمی اسکاٹ کے کلر فل پرنٹس پر دلچسپ ڈیزائننگ نے نوجوانوں کو متوجہ کیا اور ہلکے رنگوں پر منفرد انداز نے داد پائی۔
فیشن شو میں بارشوں کے موسم اور سردیوں کیلئے خوبصورت ملبوسات پیش کئے گئے۔
لندن:فراز عالم کے قتل کی مذمت کرتے ہوئے الطاف حسین نے کہا کہ فرازعالم کی ہلاکت کاواقعہ ماورائےعدالت قتل ہے
جس کی جتنی بھی مذمت کی جائے کم ہے۔ان کا کہنا تھا فرازعالم کو اٹھائیس دسمبر کو کھوکھراپارسے پولیس نے گرفتارکیاتھا۔وہ پولیس کی حراست میں تھے۔دوران حراست فرازعالم کووحشیانہ تشددکانشانہ بنایا گیا ۔ان کے اہل خانہ سے تشددکم کرنے کیلئے پولیس کی جانب سے بھاری رقم مانگی کا بھی مطالبہ کیا گیا ۔ پولیس نے فرازعالم کے اہل خانہ کو ان کی موت کی خبردی اور اس کھلے قتل کو دل کے دورے کانتیجہ قراردیاگیا۔
الطاف حسین کا مزید کہنا تھا کہ کراچی آپریشن کی آڑ میں ایم کیوایم کوریاستی تشدد کا نشانہ بنایا جا رہا ہے،کارکنان کوچن چن کر گرفتار کر کے ماورائے عدالت قتل کیا جا رہا ہے، جو سراسر ظلم ہے۔ الطاف حسین نے کہا کہ ایم کیوایم کارکنان کے ماورائے عدالت قتل پر خاموش نہیں رہے گی،قتل میں ملوث پولیس اور ایجنسیوں کے اہلکار اللہ کے عذاب کو دعوت نہ دیں۔الطاف حسین نے مطالبہ کیا کہ فرازعالم کےقتل میں ملوث افسران واہلکاروں کوگرفتارکیاجائے۔
ایک بیان میں الطاف حسین نے کہاکہ گزشتہ روز کو ایم کیوایم کے چار گرفتارکارکنان کو حراست کے دوران بہیمانہ تشدد کا نشانہ بناکر شہید کردیا گیاجبکہ ایک اورکارکن کوگولیاں مارکرشہیدکردیاگیا۔الطاف حسین نے کہاکہ کراچی آپریشن کے نام پر ایم کیوایم کے کارکنان اور ہمدردوں کو ان کے والدین، رشتہ داروں اوراہل محلہ کے سامنے گرفتارکیا جاتا ہے،ان کے گھروالوں سے منہ مانگی رقم طلب کی جاتی ہے اورمطلوبہ رقم نہ ملنے پر پولیس اور دیگر قانون نافذ کرنے والے اداروں کے اہلکاروں کی جانب سے ایم کیوایم کے کارکنوں اورہمدردوں کو پولیس اسٹیشن یا قانون نافذ کرنے والے دیگر اداروں کے سیف ہاوٴسز میں اس قدرانسانیت سوز تشدد کانشانہ بنایا جاتا ہے کہ دوران حراست ان کی موت واقع ہوجاتی ہے۔
انہوں نے مزید کہا کہ دوران حراست ایم کیوایم کے کارکنان پر پولیس اوردیگرقانون نافذکرنے والے اداروں کے بہیمانہ تشدد کودیکھنے کے باوجود مزیدریمانڈدینے والے ججزبھی ماورائے عدالت قتل میں شریک ہیں ۔الطاف حسین نے ان واقعات کی شدیدمذمت کرتے ہوئے کہاکہ پولیس اور قانون نافذ کرنے والے دیگر اداروں کے جو اہلکار اورجوججز ایم کیوایم کے کارکنوں کے ماورائے عدالت قتل میں بالواسطہ یا بلاواسطہ ملوث ہیں ، حکومت ایک ہفتہ کے اندراندران پر قتل کے مقدمات قائم کرکے فی الفورگرفتارکرے اور انہیں سخت سے سخت سزا دی جائے وگرنہ دوسری صورت میں ماورائے عدالت قتل کیے جانے والوں کے سوگوارلواحقین اور احباب کے ردعمل کی تمام تر ذمہ داری سندھ حکومت پرعائد ہوگی۔ الطاف حسین نے کہاکہ پولیس اور قانون نافذ کرنے والے دیگر اداروں کے اہلکار اور جوججز ایم کیوایم کے کارکنوں کے ماورائے عدالت قتل میں بالواسطہ یا بلاواسطہ شریک ہیں ان پر بہت جلد قہرخداوندی نازل ہوگا اور وہ اللہ تعالیٰ کی گرفت سے ہرگز نہیں بچ سکیں گے ۔ الطاف حسین نے ایم کیوایم کے تمام کارکنوں سے پرذور اپیل کی کہ وہ شہداء کی نمازجنازہ اورتدفین میں زیادہ سے زیادہ تعداد میں شرکت کریں اور صبروتحمل اورضبط وبرداشت کا دامن ہاتھ سے نہ چھوڑیں۔آخر میں الطاف حسین نے تمام شہید کارکنوں کے سوگوارلواحقین سے دلی تعزیت کااظہار کرتے ہوئے دعا کی کہ اللہ تعالیٰ شہداء کے درجات بلند فرمائے اور شہداء کے لواحقین کو یہ عظیم صدمہ برداشت کرنے کا حوصلہ عطا کرے ۔
اسلام آباد: مولانا فضل الرحمان کہتے ہیں کہ عمران خان کی شادی پرکچھ نہیں کہوں گا،خان صاحب کو مبارکباد دینا ان کیلئے مشکل ہوگا۔
کپتان کی شادی کی خبر ملنے پر مولانا فضل الرحمان کا کہنا تھا کہ عمران خان مجھ سے عمر میں بڑے ہیں، چھوٹے ہوتے ہوئےجب میں نے دوسری شادی کا نہیں سوچا، تو عمران خان کیسے شادی کرسکتے ہیں۔
عمران خان کی شادی پر مولانا فضل الرحمان اتنے دل بر داشتہ ہوئے کہ کہنے لگے خان صاحب کو مبارکباد دینا ان کے لیے مشکل ہوگا۔
عمران خان کے شادی بندھن میں بندھنے والی اکتالیس سالہ ریحام خان کی پہلی شادی انیس سال کی عمرمیں پھپی زاد بھائی ڈاکٹراعجاز سےہوئی تھی جن سے تین بیٹے بھی ہیں،عمران خان سےرشتہ طے ہونےپرریحام کےقصبے والےبہت خوش ہیں۔
کراچی: ایم کیو ایم کے قائد الطاف حسین نے کہا ہے ہم اپنے اتحاد اور دہشت گردوں کے خلاف ہمت وجرات کا مظاہرہ کرکے ملک کومضبوط اورمستحکم بنا سکتے ہیں۔
متحدہ قومی موومنٹ کے قائد الطاف حسین نے سیاسی وعسکری قیادت پر زور دیا ہے کہ ملکی و بین الاقوامی تناظر کی روشنی میں مذہبی منافرت اور فرقہ واریت کے خاتمہ کیلئے ہرقسم کی مصلحت کو بالائے طاق رکھ کرجرات مندانہ فیصلے کیے جائیں ۔
الطاف حسین کا کہنا تھا پاکستان کو مضبوط ومستحکم بنانے کیلئے آسمان سےفرشتے نہیں اتریں گے ہمیں ہی اپنے اتحاد اور ہمت سے دہشت گردوں کو شکست دینی ہے،حکومت کا فرض ہے کہ ان مسلح حملہ آوروں کو فی الفور گرفتارکرکے ان کے مکمل کوائف کے ساتھ میڈیا کے سامنے پیش کیاجائے۔
ایم کیوایم کے قائد نے اپنے بیان میں حکومت سے مطالبہ کیا کہ سلمان تاثیر کی برسی کے تقریب پرحملہ کرنے والوں کو گرفتار کرکے انھیں سزا دی جائے، لال مسجد کے خطیب کے خلاف ایف آئی آر کی روشنی میں انہیں فی الفورگرفتارکیا جائے، ذکی الرحمان لکھوی کے حوالہ سے ٹھوس لائحہ عمل تیارکیا جائے، کالعدم تنظیموں کی نفرت انگیز تبلیغ اوران کے سربراہوں کی تقاریر پرفی الفور پابندی عائد کی جائے۔
ان کا کہنا تھا کہ جوکالعدم جماعتیں مذہبی منافرت پھیلانے، فرقہ وارانہ فسادات کرانے اورفرقہ واریت کی بنیاد پر قتل کرنے کا حکم دینے میں ملوث ہیں ان خلاف فلفور کاروائی کی جائے۔
دوسری جانب ذرائع کے مطابق حکومت نے لال مسجد کے خطیب مولانا عبد العزیز کے خلاف کاروائی نہ کر نے کا فیصلہ کیا ہے،حکومتی ذرائع کا کہنا ہے کہ مولانا عبد العزیز نے سانحہ پشاور بیان پر معذرت کر لی ہے اور وہ شامل تفتیش ہو نے کو تیار ہیں ذرائع نے بتایا کہ حکومت مولانا عبد العزیز سے متعلق کوئی نیامحاذ نہیں کھولنا چاہتی،
کراچی: ایم کیو ایم کے قائد الطاف حسین اکیسویں آئینی ترمیم کی منظوری کا خیر مقدم کرتے ہوئے اسے ملک بچانے کا مترادف اور خوش آئند قرار دیا ہے۔
الطاف حسین کا کہنا تھا کہ تمام سیاسی جماعتوں نے دہشتگردوں سے ملک کو پاک کرنے کیلئے ایک صفحہ پر جمع ہو کر ملک میں مثبت روایت کی بنیاد رکھ دی ہے ، الطاف حسین کا کہنا تھا کہ اللہ تعالیٰ پاکستا ن کو دہشتگردی سے پاک کرنے کیلئے مسلح افواج ، سیاسی جماعتوں اور پوری قوم کو جرأت و ہمت عطا فرمائے۔
واضح رہے کہ قومی اسمبلی کےآج کےاجلاس میں اکیسویں آئینی ترمیم کا ترمیم شدہ مسودہ منظوری کیلیےپیش کیا گیا جسےبحث کے بعد دو سو سینتالیس اراکین کی متفقہ رائےسےمنظورکر لیا گیا جبکہ مخالفت میں کوئی ووٹ نہیں پڑا۔
لندن :دفاعی چیمپئین آرسنل نے ایف اے فٹبال کپ کا فاتحانہ آغاز کردیا۔ مانچسٹر یونائیٹڈ نے بھی اپنا میچ جیت لیا۔ لندن میں جاری ایونٹ میں دفاعی چیمپئین آرسنل نے ہل سٹی کو دو صفر سے زیر کیا۔
آرسنل کی ٹیم کھیل کے آغاز سے چھائی رہی۔ پہلے ہاف میں آرسنل کو ایک صفر کی برتری حاصل تھی۔ دوسرے ہاف میں بھی آرسنل کا پلڑا بھاری رہا۔
آرسنل نے دو گول کی برتری حاصل کی جو کھیل کے اختتام تک برقرار رہی۔ ایک اور میچ میں مانچسٹر یونائیٹڈ نے یوویل ٹاؤن کے خلاف فتح سمیٹی۔
پہلے ہاف مقابلہ بغیر کسی گول کے برابر تھا۔ دوسرے ہاف میں مانچسٹر کی ٹیم نے اٹیکنگ کھیل پیش کیا۔ چونسٹھ اور نوے منٹ میں مانچسٹر نے گول کرکے میچ دو صفر سے جیت لیا۔