نیویارک : موٹے افراد نے اپنا کئی کلو وزن کم کرکے سب کو اتنا حیران کر دیا کہ اب وہ پہچانے ہی نہیں جارہے تھے۔
موٹاپا دنیا بھر میں ہونے والی اموات کے بڑے اسباب میں سے ایک ہے، تاہم موٹاپا ایسی چیز نہیں جس سے چھٹکارا حاصل نہ کیا جاسکے لیکن مسلسل محنت اور مستقل مزاجی اس کیلئے سب سے اہم کام ہے۔
موٹاپے کو ختم کرنے یا اپنا اضافی وزن کم کرنے کے لیے آج کل جہاں مارکیٹ میں کئی دوائیں دستیاب ہیں، وہیں اس مسئلے کو جسمانی ایکسر سائز کے ذریعے بھی حل کیا جاتا ہے۔
پاکستان سمیت دنیا بھر میں جسمانی فٹنیس یا وزن کو کم کرنے کے لیے ایکسرسائز اور جم سینٹرز موجود ہیں، جو یقیناً صحت بہتر بنانے میں مددگار ہوتے ہوں گے۔
اس حوالے سے ’بورڈ پانڈا ویب سائٹ‘نے وزن میں حیران کن کمی کرنے والے خواتین اور مردوں کی نئی اور پرانی تصاویر کو اپنے صارفین کیلئے جمع کیا ہے جس کو دیکھ کر یقیناً آپ کو بھی خوشگوار حیرت ہوگی۔
اس پہلی تصویر میں وہ امریکی میاں بیوی ہیں جنہوں نے دوائیوں اور ایکسر سائز ٹرینر کے بغیر محض ایک سال کے اندر 180 کلو سے زائد وزن کم کرکے دنیا کو حیران کردیا۔
امریکی ریاست انڈیانا سے تعلق رکھنے والی خاتون لیشی ریڈ کا شادی کے وقت مجموعی وزن 215 کلو گرام سے زائد تھا جب کہ ان کے شوہر ڈینی ٹپڈ کا وزن بھی شادی کے وقت 127 کلو گرام تھا۔
اس کے علاوہ دوسری تصویر میں موجود اس لڑکی نے اپنا وزن 94 کلو گرام سے 41 کلو کم کیا اب کا اس کا مجموعی وزن 53 کلو رہ گیا ہے۔ اس کے علاوہ دیگر تصاویر میں بھی ایسے ہی لوگ ہیں جو بہت زیادہ محنت اور مشقت کے بعد خود کو نارمل کرنے میں کامیاب ہوئے۔
اس راز کو جاننے کیلئے بور پانڈا نے رجسٹرڈ غذائی ماہرین اور ٹرینرز ٹامی اور لیسی سے رابطہ کیا اور ان سے قیمتی مشورے لیے۔
اعداد وشمار کے مطابق بہت سے لوگ وزن میں کمی کی کوشش میں پہلی بار ناکام ہوجاتے ہیں، اس لیے ہم جاننا چاہتے تھے کہ لوگ اس کے بارے میں کیا غلط سمجھتے ہیں۔
جس کے جواب میں ان کا کہنا تھا کہ وزن میں کمی کے حوالے سے سب سے بڑی غلط فہمیوں میں سے ایک یہ ہے کہ آپ کو خود کو بھوکا رکھنا پڑتا ہے یا ہمیشہ بھوکا محسوس کرنا پڑتا ہے یا اپنے پسندیدہ کھانے کو مکمل طور پر ختم کرنا پڑتا ہے ایسا بالکل نہیں ہونا چاہیے!
انہوں نے بتایا کہ کھانا کھانے سے متعلق ہم اپنے کلائنٹس کی حوصلہ افزائی کرتے ہیں کہ وہ غذائیت سے بھرپور لیکن کم کیلوریز والی غذائیں جیسے سبزیاں و دالیں وغیرہ شوق سے کھائیں، جو طویل مدتی پائیدار وزن میں کمی کے رازوں میں سے ایک ہے۔
ماہرین نے موٹے افراد کو متنبہ کیا کہ ہوشیار رہیں اور فضول غذاؤں کا شکار نہ ہوں، اگر کوئی مخصوص غذا کھانے سے آپ کا وزن بہت تیزی سے کم ہوتا ہے تو اس غذا کو برقرار رکھنا بہت مشکل ہوجائے گا اور جیسے ہی آپ دوبارہ معمول کے مطابق کھانا شروع کریں گے تو آپ کا وزن مزید بڑھ کر واپس آجائے گا۔
کم کیلوریز والی غذائیں آپ کے میٹابولزم کو سست کردیں گی کیونکہ جب آپ وزن کم کریں گے تو آپ پٹھوں کے ساتھ ساتھ چربی کا بھی خاتمہ ہوگا۔
