اسلام آباد: پاکستان علماءکونسل نے محرم الحرام میں امن و امان اور مسالک کے درمیان رواداری اور بھائی چارے کے فروغ کے لئے 10 نکاتی ضابطہ اخلاق جاری کردیا ہے۔
تفصیلات کے مطابق محرم الحرام کے احترام میں تشکیل دئیے جانے والے رابطہ اخلاق کی تیاری میں تمام مسالک سے مشاورت کی گئی ہے۔
ضابطہ اخلاق کی تیاری کے لئے منعقدہ اجلاس کی صدارت پاکستان علما کونسل کے چیئرمین مولانا حافظ محمد طاہر اشرفی نے کی۔
اجلاس میں تمام مسالک کے علماء نے اتفاق کیا کہ اسلام میں دہشت گردیم شدت پسندی اور فرقہ وارانہ تشدد کی کوئی گنجائش نہیں ہے۔ کسی بھی مسلم یا غیرمسلم کو کافر اورواجب القتل نہیں دیا جاسکتا اور تمام مسالک کے پیروکاران کو آئینِ پاکستان کے تحت آزادی سے زندگی گزارنے کا حق حاصل ہے۔
علماء نے لاؤڈ اسپیکرایکٹ کی پاسداری پرزور دیتے ہوئے کہا کہ لاؤڈ اسپیکرمحض اذان اورخطبہ جمعہ کے لئے استعمال کیا جائے اوردیگرمذہبی تقاریب کے لئے مقامی انتظامیہ سے لازمی اجازت حاصل کی جائے۔
علماء نے ضابطہ اخلاق میں یہ بھی طے کیا کہ پرتشدد اورمنافرت پرلٹریچر، کتابوں اورویب سائٹس پر پابندی عائد کی جائے۔
ضابطہ اخلاق میں یہ بھی کہا گیا ہے کہ مذہبی مقامات کی حفاظت حکومت کی ذمہ داری ہے اور ان کے لئے خطرہ بننے والے عناصر سے سختی سے نمٹا جائے۔
