کراچی: رینجرز اور پولیس نے لیاری گینگ وار عبدالصمد گروپ سے تعلق رکھنے والے ملزم کو گرفتار کرلیا۔
تفصیلات کے مطابق کراچی میں رینجرز اور پولیس نے پاک کالونی میں مشترکہ کارروائی کرتے ہوئے لیاری گینگ وار عبدالصمد گروپ سے تعلق رکھنے والے ملزم کو گرفتار کرلیا۔
ترجمان رینجرز کے مطابق ملزم بھتہ خوری اور منشیات فروشی میں ملوث ہے، ملزم محمد عامر سے منشیات اور اسلحہ برآمد کیا گیا ہے، ملزم عامر عبدالصمد گروپ میں شامل ہو کر بھتہ وصولی، منشیات فروشی میں ملوث رہا ہے۔
ترجمان کا کہنا ہے کہ نیو کراچی میں بھتہ نہ دینے پر عبدالصمد نے فائرنگ کے واقعات کرائے تھے، ملزم عامر عبد الصمد کیلئے سہولت کاری کا کام سرانجام دے رہا تھا۔
ترجمان رینجرز نے مزید بتایا کہ ملزم محمد عامر گرفتاری سے بچنےکیلئے روپوش تھا، گرفتار ملزم کو قانونی کارروائی کے لئے پولیس کے حوالے کر دیا گیا۔
کراچی: رینجرز اور پولیس نے لیاری گینگ وار سے تعلق رکھنے والے 3 انتہائی مطلوب ملزمان کو گرفتار کرلیا۔
تفصیلات کے مطابق رینجرز اور پولیس نے لیاری میں مشترکہ کارروائی کے دوران 3 انتہائی مطلوب ملزمان کو گرفتار کرلیا، ملزمان کا تعلق لیاری گینگ وار کمانڈر ایاز زہری گروپ سے ہے۔
ترجمان رینجرز کے مطابق گرفتار ملزمان میں محمد ارسلان شہزاد عرف کروٹ، فرحان عرف جھاڑی اور عبدالمعیز عرف کٹا شامل ہیں اس دوران ملزمان سے اسلحہ بھی برآمد ہوا۔
ترجمان نے بتایا کہ ملزمان بھتہ وصولی کیلئے فائرنگ، ڈکیتی، اسٹریٹ کرائم میں ملوث ہیں، ارسلان شہزاد عرف کروٹ 2020 میں یوسف عرف موٹاکے گروپ میں شامل ہوا، ملزم 2022 تک ساتھیوں کے ہمراہ ڈکیتی کی وارداتیں کرتا رہا۔
ترجمان رینجرز کے مطابق ارسلان شہزاد عرف کروٹ 2023 میں ارسلان پٹنی اور ایاز زہری کے بھتہ وصولی گروپ میں شامل ہوا، ملزم لیاری گینگ وار کمانڈر عبدالصمد عرف فرحان کے کہنے پر گروپ میں شامل ہوا، 2023 میں گینگ نے لیاقت آباد میں کار شو روم سے 50 لاکھ بھتے کی ڈیمانڈ کی تھی، بھتہ نہ دینے پر ملزمان فائرنگ کیلئے گئے لیکن پولیس کی موجودگی کے باعث نہ کرسکے۔
ملزم فائرنگ کیلئے لیاری گینگ وار کمانڈر کو گینگسٹرز فراہم کرتا تھا، 24 جون کو کھارادر سے ملزم ریحان کو فائرنگ کیلئے بھیجا لیکن پولیس نے گرفتار کرلیا تھا، ملزم غیرقانونی اسلحے کی خرید و فروخت، موٹر سائیکل چھیننے میں بھی ملوث رہا۔
ترجمان رینجرز کے مطابق ملزم فرحان عرف جھاڑی 2017 سے وارداتوں میں ملوث تھا، ملزم 2024 میں یوسف عرف موٹاکے کہنے پر بھتہ وصولی گروپ میں شامل ہوا، 4 جولائی کو کھارادر میں زیر تعمیر عمارت پر فائرنگ کیلئے گئے لیکن نہ کرسکے، ملزم یوسف عرف موٹا کی نیو کراچی کے قریب ڈکیتی کی سی سی ٹی وی وائرل ہوئی تھی۔
ترجمان نے مزید بتایا کہ ملزم عبد المعیز عرف کٹا سنی تحریک کا سر گرم کارکن ہے، ملزم 2023 میں عبد الصمد عرف فرحان کے کہنے پر بھتہ وصولی گروپ میں شامل ہوا۔
کراچی: رینجرز اور سی ٹی ڈی نے انٹیلیجنس اطلاع پر لیاری میں کارروائی کرتے ہوئے لیاری گینگ وار عزیز بلوچ گروپ سے تعلق رکھنے والے انتہائی مطلوب ملزم امیرجان عرف ببلو کو اسلحے سمیت گرفتار کرلیا ہے۔
تفصیلات کے مطابق ترجمان رینجرز کا بتانا ہے کہ لیاری گینگ وار کے انتہائی مطلوب ملزم امیر جان عرف ببلو کو گرفتار کیا گیا جس کا تعلق لیاری گینگ وار کمانڈر عزیربلوچ گروپ سے ہے، گرفتار ملزم سے وارداتوں میں استعمال ہونے والا اسلحہ برآمد ہوا ہے۔
ترجمان رینجرز کے مطابق امیر جان نے 2014 میں عزیربلوچ گروپ میں شمولیت اختیار کی، ملزم ملا نثار اور ماب بلوچ کے ساتھ ملکر کارروائیاں کرتا تھا، ملزم مخالف گروپ کے ساتھ فسادات، تاجروں کو بھتے کی پرچیاں دیتا تھا۔
ترجمان رینجرز نے بتایا کہ امیر جان عرف ببلو فائرنگ اور منشیات فروشی میں بھی ملوث ہے، ملزم نے سیفی لین میں خان محمد عرف بھائی جان کے گھر پر فائرنگ کا اعتراف کیا۔
ترجمان نے بتایا کہ فائرنگ میں ملزم کے ساتھ راجن عرف راجو بھی شریک تھا، سی سی ٹی وی میں ملزم کو فائرنگ کرتے دیکھا جا سکتا ہے، سی ٹی ڈی راجن عرف راجو اور بھائی شہر یار کو پہلے گرفتار کرچکی ہے.
ترجمان رینجرز نے بتایا کہ ملزم امیر جان عرف ببلو مفرور تھا، ملزم کے دیگر ساتھیوں کی گرفتاری کیلئے چھاپے ماررہے ہیں، ملزم کو مزید کارروائی کیلئے سی ٹی ڈی کے حوالے کر دیا گیا ہے۔
کراچی: گرفتار ملزم آصف چکنا نے دورانِ تفتیش پولیس کے سامنے اہم انکشافات کر دیے۔
تفصیلات کے مطابق پولیس کا بتانا ہے کہ گرفتار ملزم آصف چکنا لیاری گینگ وار کمانڈر بھتہ خور بہادر پی ایم ٹی کا کارندہ ہے، بغدادی پولیس نے مقابلے کے بعد ملزم آصف کو گرفتار کیا تھا۔
ڈی آئی جی ساؤتھ اسد رضا کے مطابق ملزم نے گزشتہ روز دوران ڈکیتی شہری مزمل کو گولیاں مار کر قتل کیا تھا، ملزم کا موبائل ڈیٹا بھی حاصل کرلیا۔
ڈی آئی جی ساؤتھ نے بتایا کہ ملزم نے دوران تفتیش اہم انکشافات کیے، ملزم آصف چکنا، شفیع پی ایم ٹی پولیس، سرکاری اداروں کے اہلکاروں کو ٹارگٹ کرنے کا منصوبہ بنارہے تھے۔
ڈی آئی جی اسد رضا نے بتایا کہ شفیع پی ایم ٹی نے اپنے والد گینگ وار کمانڈر بہادر پی ایم ٹی و دیگر کو تصویریں، لوکیشن شیئرکردی تھیں، ملزمان نے بلوچستان کے ٹارگٹ کلرز کیساتھ ملکر لیاری میں قتل کرنا تھا۔
ڈی آئی جی ساؤتھ اسد رضا نے بتایا کہ ملزمان اقدام قتل، ڈکیتی بھتہ خوری کی وارداتوں میں ملوث ہیں، گروہ تاجروں سے بھتہ خوری اور خوف پھیلانے کیلئے فائرنگ کرتا تھا۔
کراچی: پریڈی کے علاقے میں رینجرز اور پولیس کی مشترکہ کارروائی میں لیاری گینگ وار جمیل چھانگا گروپ کا ٹارگٹ کلر گرفتار ہو گیا۔
ترجمان رینجرز کے مطابق رینجرز اورپولیس نے پریڈی کے علاقے میں مشترکہ کارروائی کرتے ہوئے کوسٹ گارڈ کے سپاہی بلال کی شہادت سمیت بھتہ خوری، منشیات فروشی، ڈکیتی اور پولیس مقابلوں میں ملوث لیاری گینگ وار جمیل چھانگا گروپ کا ٹارگٹ کلر جنید بلوچ کو اسلحے سمیت گرفتار کر لیا۔
ترجمان رینجرز کے مطابق ملزم 2016 میں لیاری گینگ وار جمیل چھانگا گروپ میں شامل ہو کر گینگسٹر نوید عرف کپی اور وسیم جوجی کے ساتھ متعدد وارداتوں میں ملوث رہا، 9 ستمبر 2023 کو ملزم نے اپنے ساتھی عامر عرف موٹا کے ہمراہ کراچی کیپری سینما کے قریب کوسٹ گارڈ کے سپاہی بلال سے موٹر سائیکل اور نقدی چھیننے کی کوشش کے دوران مزاحمت پر اسے شہید کر دیا تھا، اس واقعے کی سی سی ٹی فوٹیج بھی سامنے آئی تھی۔
15 ستمبر 2023 کو تھارو لین سولجر بازار گینگ وار کمانڈر جمیل چھانگا کے حکم پر بھتہ نہ دینے پر چوکیدار کی ٹارگٹ کلنگ کی جس میں ملزم کے ساتھ نوید عرف کپی، نوروز اور علی عرف ڈاڈا بھی ہمراہ تھے۔
ملزم جنید بلوچ کے خلاف مختلف تھانوں میں متعدد مقدمات درج ہیں، ملزم ساتھیوں کے ہمراہ پرانا گولیمار سے ماہانہ بھتہ وصولی کرتا تھا، ترجمان رینجرز کے مطابق جنید بلوچ کے دیگر ساتھیوں کی گرفتاری کے لیے چھاپے مارے جا رہے ہیں، اور ملزم کو مع اسلحہ کارروائی کے لیے پولیس کے حوالے کر دیا گیا ہے۔
کراچی: منشیات ڈیلر حاجی ریاست کا نیٹ ورک آپریٹ کرنے والا اور حساس اداروں کو مطلوب لیاری گینگ وار کمانڈر زین عرف ریحان ہلاک ہو گیا، ملزم نے پولیس اہلکاروں کو مارنے پر پانچ لاکھ کے انعام کا اعلان کیا تھا۔
تفصیلات کے مطابق جمعرات کو رات گئے پاک کالونی میں پولیس مقابلے کے دوران مارا گیا ملزم پولیس اور حساس اداروں کو انتہائی مطلوب منشیات فروش اور لیاری گینگ وار کمانڈر زین عرف ریحان نکلا، ملزم ایکسپریس وے سمیت متعدد منشیات کے اڈوں کا مالک تھا۔
پولیس حکام کے مطابق حساس ادارے کی اطلاع پر پولیس رات گئے زین کو جہان آباد گرفتار کرنے گئی تھی، ملزم نے ساتھی کے ہمراہ پولیس پارٹی پر اندھا دھند فائرنگ کی جس سے کانسٹیبل نوید شاہ زخمی ہوا اور پولیس موبائل کو بھی نقصان پہنچا، جب کہ جوابی کارروائی میں ملزم ہلاک ہو گیا۔
زخمی پولیس اہلکار
ملزم کی گرفتاری کے لیے عرصہ دراز سے حساس ادارے اور پولیس کی کوششیں جاری تھیں، ہلاک ملزم پرانا گولیمار و ملحقہ علاقوں میں منشیات نیٹ ورک کا اہم سرغنہ تھا، پاک کالونی آپریشن کے بعد ملزم نے اپنے کارندوں کو کہا تھا کہ جو ایک پولیس والا مارے گا اس کو 5 لاکھ روپے انعام دوں گا۔
واضح رہے کہ اے آر وائی نیوز کی خبر کے بعد محکمہ پولیس، رینجرز اور دیگر حساس اداروں کی جانب سے لیاری میں طویل عرصے کے آپریشن کی تیاری کی گئی تھی، جس کے بعد حساس اداروں کی اطلاع پر زین عرف ریحان پولیس مقابلے میں ہلاک ہوا۔
ملزم بدنام زمانہ منشیات ڈیلر حاجی ریاست کے منشیات نیٹ ورک کو آپریٹ کرتا تھا، اور منشیات فروشی سے حاصل کردہ رقم سے اسلحہ کی خریداری کرتا تھا، ملزم نے لیاری گینگ وار کے جمیل چھانگا، بلال پپو، سلیم چاکلیٹی اور ساجد ڈکیت نامی گروپوں کو مالی معاونت بھی فراہم کی۔
ملزم لیاری گینگ وار کے شوٹرز کو پرانا گولیمار میں پناہ فراہم کرنے میں بھی ملوث رہا ہے، متعدد بار مخالف گروپوں سمیت پولیس و رینجرز پر حملوں میں بھی ملوث رہا، ملزم فاروق نامی پولیس اہلکار کے قتل میں بھی ملوث رہا، جب کہ مخالف گروپوں کے کاشف، عاشق، زاہد عرف دوپتی، آزاد عرف ساجد پتر اور ریاض نامی اشخاص کو قتل کرنے میں بھی ملوث رہا۔ پولیس حکام کا کہنا ہے کہ زین عرف ریحان کی ہلاکت پرانا گولیمار میں منشیات فروشی اور گینگ وار سرگرمیوں کے خلاف پاک کالونی پولیس کی اہم کامیابی ہے۔
واضح رہے کہ اے آر وائی نیوز ٹیم کی جانب سے پاک کالونی لیاری ایکسپریس وے اور اطراف میں منشیات کے اڈوں اور عادی افراد کی خبر چلنے پر ایس ایس پی کیماڑی نے سخت نوٹس لے لیا تھا، اور 20 دسمبر کو پاک کالونی میں جرائم پیشہ عناصر کے خلاف 20 روزہ آپریشن کا فیصلہ کیا گیا تھا، جس کے بعد اب پولیس مقابلے میں یہ اہم منشیات فروش مارا گیا ہے۔ ویڈیو میں دیکھا جا سکتا ہے کہ جب اے آر وائی نیوز کی ٹیم پاک کالونی سے متصل لیاری ایکسپریس وے کے علاقے میں جانے لگی تو ایک شخص نے خبردار کیا کہ اندر ان پر فائرنگ بھی ہو سکتی ہے۔
کراچی: شہر قائد میں ناتھا خان پل کے نیچے مبینہ مقابلے میں ہلاک ہونے والا ملزم لیاری گینگ وار کا شوٹر نکلا۔
تفصیلات کے مطابق ناتھا خان پل کے نیچے پولیس کے ہاتھوں مارا گیا ملزم نوروز ایرانی بلوچ لیاری گینگ وار کا شوٹر نکلا، ایس ایس پی ایسٹ عرفان بہادر کا کہنا ہے کہ نوروز گینگ وار کا اہم کارندہ تھا۔
ہلاک ملزم کا تعلق جمیل چھانگا گروپ سے تھا، ملزم قتل، اقدام قتل، منشیات فروشی میں ملوث تھا، اور اس نے بھتہ خوری اور جرائم کی متعدد وارداتیں کیں۔
ایس ایس پی ایسٹ کے مطابق نوروز ایرانی لیاری ایکسپریس وے پر شہروز کے قتل میں ملوث تھا، اس نے انور پٹھان اور ویسٹ میں طاہر جدگال کو بھی قتل کیا، سولجر بازار میں زیر تعمیر عمارت کے چوکیدار کو بھی اسی نے مارا۔
ایسٹ پولیس نے ہلاک ملزم کا مجرمانہ ریکارڈ بھی جاری کر دیا ہے۔
ادھر اے وی ایل سی نے کراچی کے مختلف علاقوں میں کارروائیاں کرتے ہوئے کار، موٹر سائیکل لفٹنگ، اور اسنیچنگ کی وارداتوں میں ملوث 10 ملزمان گرفتار کر لیے ہیں، اور ان کے قبضے سے ایک کار، 2 سوزوکی پک اپ، ایک رکشہ، 6 موٹر سائیکلیں برآمد ہوئی ہیں۔
ایس ایس پی اے وی ایل سی کلیم ملک کے مطابق گرفتار ملزمان میں سمیر، صادق، وقار، مزمل اور عاشر، عامر، علی نواز، وقار، شرافت اور عثمان شامل ہیں۔
کراچی: رینجرز اورپولیس نے لیاری گینگ وار کا انتہائی مطلوب کمانڈر سلیم عرف ملا سہیل کو گرفتار کرلیا۔
تفصیلات کے مطابق رینجرز اورپولیس نے لیاری میں خفیہ اطلاع پر مشترکہ کارروائی کرتے ہوئے لیاری گینگ وار کا انتہائی مطلوب کمانڈر سلیم عرف ملا سہیل کو گرفتار کرلیا۔
ترجمان رینجرز کے مطابق گرفتار ملزم سے دستی بم اور اسلحہ برآمد ہوا، ملزم 2003 میں عزیر بلوچ گروپ 2009 میں پیپلز امن کمیٹی میں شامل ہوا، ملزم ٹارگٹ کلنگ، بھتہ وصولی، اسلحے کی خرید و فروخت میں ملوث ہے۔
ترجمان رینجرز کا کہنا تھا کہ ملزم کا نام سی ٹی ڈی سندھ کی انتہائی مطلوب دہشتگردوں کی ریڈ بک میں شامل ہے، ملزم گرفتاری سے بچنے کے لیے اندرون سندھ روپوش رہا۔
ترجمان رینجرز کے مطابق ابتدائی تفتیش کے دوران ملزم نے مختلف انکشافات کیے، ملزم نے کلاکوٹ لیاری میں نجیب لاشاری کو قتل کرنے کا اعتراف کیا۔
کراچی: پولیس نے لیاری گینگ وار، جھینگو گروپ کا انتہائی مطلوب کارندہ زخمی حالت میں گرفتار کر لیا۔
تفصیلات کے مطابق کراچی کے علاقے لیاری میں کلاکوٹ میں مبینہ پولیس مقابلہ ہوا ہے، جس میں پولیس نے جھینگو گروپ کے انتہائی مطلوب کارندے فرحان عرف خلیفہ کو زخمی حالت میں گرفتار کر لیا، ملزم سے اسلحہ بھی برآمد ہوا۔
ایس ایس پی عارف عزیز کا کہنا ہے کہ ملزم نے 7 جون کو طارق نامی شہری کو گولی مار کر زخمی کیا تھا، ملزم نے 2 روز قبل ٹھیکیداروں سے بھتہ طلب کیا، نہ دینے پر دھمکیاں دی تھیں۔
ادھر کراچی کے علاقے پاک کالونی، ڈگری کالج کے قریب مبینہ پولیس مقابلے میں ایک زخمی سمیت 3 ملزمان کو گرفتار کر لیا ہے، زخمی ملزمان میں شاہنواز عرف شانی، سرور عرف دانا اور رمضان شامل ہیں۔
پولیس حکام کے مطابق ملزمان کے قبضے سے اسلحہ، موٹر سائیکل اور دیگر سامان برآمد ہوا ہے، ملزمان موٹر سائیکل چوری، چھیننے، ڈکیتی کی متعدد وارداتوں میں ملوث ہیں، گرفتار ملزمان عادی جرائم پیشہ اور ماضی میں بھی گرفتار ہو کر جیل جا چکے ہیں۔
پولیس حکام کا کہنا ہے کہ ملزمان چوری شدہ موٹر سائیکلیں ابراہیم حیدری میں امان نام ملزم کو فروخت کرتے ہیں، ملزمان کے دیگر ساتھیوں کی تلاش کے لیے چھاپہ مار کارروائیاں جاری ہیں۔
کراچی: لیاری گینگ وار کا اہم کمانڈر برکت بلوچ ایک مبینہ پولیس مقابلے میں مارا گیا۔
تفصیلات کے مطابق گلشن اقبال پولیس نے کراچی کے علاقے گلشن چورنگی، راشد منہاس روڈ پر مبینہ مقابلے میں برکت بلوچ نامی لیاری گینگ وار کارندے کو مار دیا۔
پولیس حکام کا کہنا ہے کہ برکت بلوچ قتل، اقدام قتل، بھتہ خوری اور دیگر کئی سنگین جرائم میں ملوث تھا، مقابلے کے دوران فائرنگ کے تبادلے میں ایک رکشہ سوار اور ایک راہ گیر بھی زخمی ہوا، زخمی راہ گیر کی شناخت شاہد اور رکشہ سوار کی عمران کے نام سے ہوئی ہے۔
پولیس مقابلے میں مارے گئے گینگ وار کارندے کا کریمنل ریکارڈ سامنے آ گیا ہے، برکت علی کی واردات کی سی سی ٹی وی بھی سامنے آ گئی، جس میں برکت کو ساتھیوں سمیت اسلحہ چھینتے ہوئے دیکھا جا سکتا ہے۔
پولیس حکام کے مطابق مارا گیا ڈاکو برکت محلہ کریم بخش پاڑہ، شانتی نگر ڈالمیا کا رہائشی تھا، اس کا تعلق لیاری گینگ وار عزیر بلوچ گروپ سے تھا، اور اس کے خلاف عزیز بھٹی، بہادر آباد، شارع فیصل تھانوں میں 10 مقدمات درج ہیں۔
برکت بلوچ نے شانتی نگر جھنڈو پاڑہ میں عزیر بلوچ گینگ کو منظم کرنے میں اہم کردار ادا کیا تھا، تاہم لیاری آپریشن کے دوران چہرہ شناخت نہ ہونے کے باعث گرفتاری سے بچتا رہا۔ پولیس کا کہنا ہے کہ برکت کے گھر پر متعدد چھاپے مارے گئے لیکن وہ چکمہ دے کر نکل جاتا تھا۔
