ماسکو : فٹبال کا21واں عالمی میلہ جمعرات کو روس میں شروع ہو رہا ہے جو 15جولائی تک جاری رہے گا، منی برازیل لیاری میں بھی فیفا ورلڈ کپ کی تیاریاں عروج پر پہنچ گئیں۔

تفصیلات کے مطابق روس میں کل سے21ویں فیفا فٹبال ورلڈ کپ کا آغاز ہورہا ہے، چھ براعظموں کی 32 ٹیمیں میزبان ملک روس میں اپنی صلاحیتوں کے جوہر دکھائیں گی، روس کے گیارہ شہروں کے12اسٹییڈیمز میں 64 میچز کھیلے جائیں گے، افتتاحی میچ میزبان روس اور سعودی عرب کے درمیان کھیلا جائے گا۔

اس بار جیت کے کئی امیدوار ہیں جن میں دفاعی چیمیئن جرمنی کے علاوہ برازیل بھی سرفہرست ہیں۔ اپنی ٹانگوں کا جادو دکھانے کے لئے دنیا کے نامور کھلاڑی میسی، رونالڈو، نیمار، مولر، ہیزارڈ، محمد صالاح، پوگبا جلوہ گر ہوں گے۔

ورلڈ کپ کا فائنل میچ 15جولائی کو ماسکو میں کھیلا جائیگا، فٹبال ورلڈ کپ کی سب سے بڑی انعامی رقم 400 ملین ڈالرز ہے۔ فاتح ٹیم کو خوبصورت ٹرافی اور 38ملین ڈالرز ملیں گے۔

یاد رہے کہ 14جون سے 15 جولائی تک دنیا کی دو تہائی آبادی فٹبال کے سحر میں مبتلا ہو گی۔ پاکستان میں بھی فٹبال کے متوالے ورلڈ کپ شروع ہونے کا بے صبری سے انتظار کررہے ہیں، منی برازیل لیاری میں فیفا ورلڈ کپ کی تیاریاں عروج پر پہنچ گئیں، ورلڈ کپ تو روس میں ہو رہا ہے لیکن فٹبال کے دیوانے لیاری میں بھی پر جوش ہیں۔

کراچی میں فٹبال کے گڑھ لیاری میں فیفا ورلڈ کپ کا رنگ نظر آنے لگا، گلی محلوں میں پسندیدہ ٹیموں کے رنگ برنگی جھنڈے لہرا دیئے گئے، درو دیوار بھی رنگین ہوگئے، گلی محلے کو دلہن کی طرح سجا دیا گیا بچے اور بڑے بھی پرجوش دکھائی دیتے ہیں۔

لیاری کے علی محمد محلے میں ورلڈ کپ وال بنائی گئی ہے جس پر سابق عالمی چیمپیئن ٹیموں کے نام درج ہیں۔ فٹبال کے متوالے سال دوہزار اٹھارہ میں برازیل کی حکمرانی کے خواہش مند ہیں۔

خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔