ARYNews.tv | Urdu – Har Lamha Bakhabar

Tag: M.Qaisar kamran

  • ماؤں کے عالمی دن کے موقع پرمعروف شخصیات کے تاثرات

    ماؤں کے عالمی دن کے موقع پرمعروف شخصیات کے تاثرات

    کراچی: ماں کی ماں محبت بے لوث اور اسکی یاد بے پناہ قیمتی ہوتی ہے، ماں ایک ایسی عظیم ہستی ہے جس کی عزت واحترام اور مرتبہ ہر مذہب اور معاشرے میں مسلمہ ہے،اس حوالے سے ہر سال ماں کا عالمی دن منایا جاتا ہے۔

    ماں قدرت کا انمول تحفہ ہے جس کادنیامیں کوئی نعم البدل نہیں ہے، یوں تو ماں سے محبت کو دنوں کی زنجیر میں جکڑنا مشکل ہے اور ہر دن ماں کی خدمت اور تابعداری کا دن ہے لیکن یہ خاص دن ہمیں اپنی مصروف زندگی میں ماں کی قدر یاد دلاتا ہے، ہر لمحہ ہر روز ماں کی عزت اور محبت کا اظہار کرنے والے خوش قسمت شخص جن کی مائیں حیات ہیں کیونکہ ماں کی دعائیں ہر لمحہ شامل حال رہتی ہیں۔

    Untitled

    اے آروائی نیوزکے دی مارننگ شو کا حصہ بنی شوبزکی معروف شخصیات نےماؤں کے عالمی دن کے موقع پراپنی ماؤں کی خوبصورت یادیں تازہ کرکےپروگرام کی رونق کوخُوب بڑھایا۔

    اے آروائی نیوزکے مارننگ شومیں شریک مشہور و معروف شخصیات ماؤں کی محبت سے سرشارنظرآئیں، مقبول گلوکارعالمگیرکا کہنا تھا کہ انہوں نے اپنےعروج کے دور میں انتہائی مصروفیت کے باوجود بیمار ماں کی خدمت کی۔

    مایہ نازاداکارہ اور ہدایت کار ہ سائرہ کاظمی نے بھی اپنے بیٹے علی کاظمی کے ساتھ پروگرام کی رونق بڑھائی، علی کاظمی نے اپنی والدہ کواپنی سب سے اچھی دوست قراردیا،سائرہ کاظمی نے اپنی تمام ترکامیابیوں کاسہرا اپنی مرحوم والدہ کے سرباندھا۔

    مشہورنوحہ خواں فرحان علی وارث نے ایک شعر سنا کر اپنی والدہ کو خراج تحسین پیش کیا ۔

    بالی ووڈ کی مشہور اداکارہ سوناکشی سہنا نے اپنے ٹوئٹ میں کہا کہ مجھے سب زیادہ سکون اپنی ماں کے ساتھ رہنے میں ملتا ہے ۔

    معروف اسکالر ڈاکٹر عامر لیاقت کی اہلیہ بشرا عامر نے اپنے ٹوئٹ میں کہا کہ میری ماں میری زندگی کی پہلی نظر ، پہلی مسکراہٹ اور میری پہلی محبت ہے۔

    ادکارارہ پرینیتی چوپڑا نے ٹوئٹ کرتے ہوئے اس دن کی مبارکباد دی

    بالی ووڈ کی اداکارہ نیہا دھوپیا نے اپنے ٹوئٹ میں کہا ہے کہ ماں آپ میرا سب کچھ ہیں۔  

     معروف کرکٹروسیم اکرم  نے اپنی والدہ سے مخاطب ہوتے ہوئے ٹوئٹ کیا کہ آپ ایک عظیم ماں ہیں اور ہم آپ سے محبت کرتے ہیں۔

    سابق صدر پرویز مشرف نے تصویر کو ٹوئٹ کر کے ماں سے اپنی محبت کا اظہار کیا ۔  

     ایم کیوایم کے رہنما فیصل سبرواری نے اپنے ٹوئٹ میں انہوں اپنی ماں کو دعائیں دیتے ہوئے کہا کہ دعا کرتا ہوں کہ میں آپ کا ایک اچھا بیٹا بنوں۔

        پی ٹی آئی کے رہنما اسد عمر نے اپنے ٹوئٹ میں کہا ہے کہ ماں سرزمین پر ایک عظیم ہستی ہیں۔

  • پاکستان سمیت دنیا بھرمیں ماں سے محبت کے اظہارکا دن آج منایا جارہا ہے

    پاکستان سمیت دنیا بھرمیں ماں سے محبت کے اظہارکا دن آج منایا جارہا ہے

    کراچی:  پاکستان سمیت دنیا بھرمیں ماں سے اپنی محبت کے اظہار کا دن منایا جارہا ہے، جس کا مقصد ماؤں کی عظمت کا اعتراف اورانہیں خراج تحسین پیش کرنا ہے۔

    اس دن کو منانے کا مقصد معاشرے میں ماﺅں سے محبت اوران کے احترام کوفروغ دینا ہے مگربہت سی مائیں ایسی بھی ہیں جوناخلف اولاد کی نافرمانی کی وجہ سے زندگی اولڈ ہاوس میں گزارنے پر مجبور ہیں۔

    یاد رہے کہ ماﺅں کے عالمی دن منانے کی تاریخ بہت قدیم ہے اور اس کا سب سے پہلے یونانی تہذیب میں سراغ ملتا ہے جہاں تمام دیوتاوں کی ماں ”گرہیا دیوی“ کے اعزاز میں یہ دن منایا جاتا تھا۔ سولہویں صدی میں ایسٹر سے 40 روز پہلے انگلستان میں ایک دن ”مدرنگ سنڈے“ کے نام سے موسوم تھا۔ امریکہ میں مدرز ڈے کا آغاز 1872ءمیں ہوا۔

     سن 1907ءمیں فلاڈیفیا کی اینا جاروس نے اسے قومی دن کے طور پر منانے کی تحریک چلائی جو بالآخر کامیاب ہوئی اور 1911ءمیں امریکہ کی ایک ریاست میں یہ دن منایا گیا، اور اب دنیا  بھر میں سے ہرسال مئی کے دوسرے  اتوار کو یہ دن منایا جاتا ہے۔

  • ٹیپو سلطان کے زیر استعمال اسلحہ لندن میں نیلام

    ٹیپو سلطان کے زیر استعمال اسلحہ لندن میں نیلام

    لندن : برصغیر میں انگریزوں کے خلاف لڑنے والے میسور کے ٹیپو سلطان کے زیر استعمال اسلحہ لندن میں نیلام کر دیا گیا۔

    لندن کے آکشن ہاوس نے ٹیپو سلطان کے زیر استعمال بندوق، تلواروں کا سیٹ، زرہ بکتر اور دیگر نوادرات سمیت 30 اشیاء نیلامی کے لئے پیش کیں۔

     ان نودرات میں تلواروں کی جوڑی، تیر، قیمتی ہیلمٹ، توپ، شکار کے لئے استعمال کی جانے والی بندوق بھی شامل تھی۔سب سے زیادہ بولی قیمتی تلواروں کے سیٹ کی لگی جو 32 لاکھ 26 ہزار 902 ڈالر میں فروخت ہوا۔

    Sword

    ٹیپو سلطان کے زیر استعمال گولے پھینکنے والی توپ 21 لاکھ 36 ہزار 540 ڈالر میں فروخت ہوئی جب کہ ان کے زیر استعمال بندوق 10 لاکھ 82 ہزار 124 ڈالر میں فروخت ہوئی۔

  • پاکستان سمیت دنیا بھر میں قدیمی ثقافت کا عالمی دن آج منایا جارہاہے

    پاکستان سمیت دنیا بھر میں قدیمی ثقافت کا عالمی دن آج منایا جارہاہے

    کراچی: پاکستان سمیت دنیا بھر میں ثقافت کا عالمی دن منایا جارہاہے ، اس دن کے منانے کا مقصد قدیم تہذیبوں کی ثقافت ،آثار قدیمہ کو محفوظ کرنا اوراس کے بارے میں آگاہی فراہم کرنا ہے ۔

    کسی بھی ملک و قوم کی پہچان اس کاثقافتی ورثہ ہوتاہے،پاکستان میں ساڑھےچھ ہزارسال قدیم ورثہ موہن جو دڑوکواقوام متحدہ نے ثقافتی ورثےمیں شامل کیاہے۔

    یہ قدیم شہراس وقت کےجدیدطرز زندگی کوظاہرکرتاہےجو کہ حیران کن بات ہے۔ نہ صرف سندھ بلکہ چوکنڈی کے قبرستان میں سترہویں صدی کےمسلم بادشاہ اور رانیوں کی قبروں پر بنے خوبصورت نقش موت کے بعد بھی ان کی محلوں جیسی آخری آرام گاہ کا منظر پیش کررہے ہیں، اس طرح مکلی اور ہڑپہ بھی سندھ کے قدیم ثقافی ورثے ہیں ۔

    اقوام متحدہ کے مطابق موئن جودڑوکے تاریخی کھنڈرات،ٹیکسلا کے تاریخی آثار،تخت بھائی میں بدھ مت کے کھنڈرات اورسری بہوال،مردان کے ساتھ والا شہر، مکلی ٹھٹھہ میں موجودتاریخی یادگاریں،قلعہ لاھور شالیمار باغ، قلعہ روہتاس جہلم عالمی ثقافتی ورثے میں شامل ہیں، مگر حکومت کی مسلسل عدم توجہی سے یہ سب اپنی اصل خوبصورتی کھو رہے ہیں۔

  • دنیا بھرمیں مسیحی برادری آج ایسٹر تہوار منارہی ہے

    دنیا بھرمیں مسیحی برادری آج ایسٹر تہوار منارہی ہے

    کراچی: پاکستان سمیت دنیا بھرمیں مسیحی برادری آج ایسٹر کا تہوار منارہی ہے، اس مناسبت سے دعائیہ تقریب کا اہتمام کیا جائے گا۔

    مسیحی تہوار کے موقع پر اہم ترین مذہبی تقریبات مشرق وسطیٰ میں یروشلم اورکیتھولک عیسائی عقیدے کے مرکز ویٹی کن میں منعقد ہوں گی۔

    عیسائیوں کے مذہبی پیشوا پاپائے روم خصوصی دعا کر وائیں گے، پاکستان میں ایسٹر کے تہوار کی مناسبت سے تقریبات کا آغاز رات ہی سے ہوگیا۔

    اس موقع پر ملک بھر میں گرجا گھروں میں خصوصی عبادات کا اہتمام کیا گیا، گرجاگھروں میں شمعیں روشن کی گئیں اور خصوصی گیت بھی گائے گئے۔

    مسیحی برادری نے ملک و قوم کی سلامتی کی دعائیں مانگیں،مسیحی برادری کے نام میں وزیراعظم نوازشریف نے کہا کہ ملکی ترقی میں مسیحی برادری سمیت تمام اقلیتوں کاکردارلائق تحسین ہے۔

    صدرممنون حسین کا مسیحی برادری کو مبارباد پیش کرتے ہوئے کہنا تھا کہ پاکستان کاآئین مسیحیوں اوراقلیتوں کےتحفظ کی ضمانت دیتاہے۔

  • پاکستان سمیت دنیا بھر میں آج تپ دق کا عالمی دن منایا جارہا ہے

    پاکستان سمیت دنیا بھر میں آج تپ دق کا عالمی دن منایا جارہا ہے

    کراچی: پاکستان سمیت دنیا بھر میں آج تپ دق کا عالمی دن منایا جارہا ہے، عالمی ادارہ صحت کے مطابق پاکستان میں ہر سال دو لاکھ چالیس ہزارکے قریب افرادتپ دق سے متاثر ہوتے ہیں۔

    چوبیس مارچ دنیا بھر ٹی بی کے عالمی دن کے طور پر ،منایا جاتا ہے،اس دن کو منانے کا مقصد تپ دق کی علامات اور بچاو سے متعلق آگاہی دینا ہے۔

    عالمی ادارہ صحت ڈبلیو ایچ اوکے مطابق دنیا بھر میں ٹی بی کے مریضوں میں تشویشناک اضافہ ہو رہا ہے پاکستان میں ہر سال لگ بھگ دو لاکھ چالیس ہزارافرادکو ٹی بی ہوجاتی ہےجبکہ ایک لاکھ سے زائد افراد موت کے منہ میں چلے جاتے ہیں، جن میں سے بیشتر تعداد خواتین کی ہے، پاکستان میں اس مرض میں مسلسل اضافہ کا سبب بر وقت تشخیص اور مکمل علاج نہ کرایاجانا ہے۔

     عالمی ادارہ صحت کے مطابق تپ دق کےخاتمے کی مسلسل کوششوں کے باوجود دنیا کی ایک تہائی آبادی میں اس مرض کے جراثیم موجود ہیں جن میں سے دس فیصد لوگ بیمار ہو جاتے ہیں۔

  • زیادتی ہورہی ہے لیکن پھربھی فوج کےساتھ ہیں، الطاف حسین

    زیادتی ہورہی ہے لیکن پھربھی فوج کےساتھ ہیں، الطاف حسین

    کراچی: ایم کیو ایم کے قائد الطاف حسین نےکہا ہےکہ صولت مرزا کوڈیتھ سیل میں بیان رٹایا گیا، ایم کیوایم الطاف حسین کےبغیرقبول ہےتو میں الگ ہوجاتا ہوں،زیادتی ہورہی ہےلیکن پھربھی فوج کےساتھ ہیں۔

    ایم کیوایم کے 31ویں یوم تاسیس کے سلسلے میں شکاگو،نیویارک، ٹورنٹو،کیلگری اور مونٹریال سمیت امریکہ اورکینیڈاکے 20سے زائد شہروں میں منعقدہ اجتماعات سے ٹیلیفونک خطاب کرتے ہوئے متحدہ قومی مومنٹ کےقائدالطاف حسین نے امریکا اورکینڈا میں ٹیلی فونک خطاب میں کہا کہ ایم کیوایم میں جرائم پیشہ افرادکی کوئی گنجائش نہیں، ہمارے گھروں پرچھاپےمارکربےگناہوں کوگرفتارکیا جارہا ہے پھربھی پاک فوج کےساتھ ہیں۔

    انہوں نے کہا کہ صولت مرزاکوکال کوٹھری میں ایک اسکرپٹ رٹایا گیا، پھانسی سے ایک دن قبل بیان کی ویڈیو ٹی وی چینلزکوپہنچائی گئی اورخوب ڈھول پیٹا گیا۔

    الطاف حسین کا کہنا تھا کہ دنیا میں آج تک ایسی کوئی مثال نہیں ملتی،صولت مرزاکےزریعےبیہودہ الزام لگوائےگئے،ایم کیوایم پر الزامات لگواکر دنیا بھرمیں ایم کیوایم کاامیج خراب کرنے اوراسے دنیاکی نظروں میں مطعون کرنے کاعمل کیاہے۔

     انہوں نے کہاکہ سپریم کورٹ نے کراچی بدامنی کیس میں تمام سیاسی ومذہبی جماعتوں میں عسکری ونگز ہونے کاذکرکیاتھالیکن صرف ایم کیوایم کی بات کی جاتی ہے ۔کہاگیاتھاکہ کراچی میں آپریشن بلاامتیازہوگالیکن ایم کیوایم کونشانہ بنایاجارہاہے اورآپریشن کے آغازکے بعد سے اب تک ایم کیوایم کے سوسے زائد کارکنان شہید، سینکڑوں گرفتاراوردرجنوں لاپتہ ہیں۔

    ان کا کہنا تھا کہ کراچی آپریشن میں ایم کیوایم کونشانہ بنایا جارہا ہے، سارےمتعصب تجزیہ کارکہتےہیں ایم کیوایم اچھی اورقبول ہے اگرالطاف حسین الگ ہوجائیں، اگر میرےبغیرایم کیوایم قبول ہے توالگ ہوجاتاہوں۔

    ان کا کہنا تھا کہ قائداعظم محمدعلی جناح کے خواب کے مطابق پاکستان میں جمہوری اورلبرل معاشرہ قائم کرنا چاہتے ہیں۔ ایم کیوایم لبرل، روشن خیال اور جمہوریت پسندجماعت ہے جو مذہبی رواداری اورفرقہ وارانہ ہم آہنگی پر یقین رکھتی ہے۔،

    ایم کیوایم کی پریس ریلزکےمطابق کارکنوں نےاس پیش کش پرنامنظورکےنعرے لگائے۔

  • صولت مرزا کی پھانسی کی سزا پر عملدرآمد موخر

    صولت مرزا کی پھانسی کی سزا پر عملدرآمد موخر

    کراچی: اعترافی بیان منظر عام پر آنے کے بعد صولت مرزا کی پھانسی کوتا حکم ثانی موخر کردیا گیا ہے۔

    پھانسی سے چند گھنٹے قبل صولت مرزا نے اپنے ویڈیو پیغام میں اپیل کی تھی کہ میری پھانسی مؤخر کی جائے تاکہ ماضی میں کی گئی غلطیوں کا ازالہ کر سکوں، صولت مرزا کا آخری ویڈیو پیغام سامنے آنے کے بعد وزارت داخلہ نے ایوان صدر سے رابطہ کیا اور مجرم کے ویڈیو بیان پر تحقیقات کو ضروری قرار دیتے ہوئے مجرم کی پھانسی روکنے کی درخواست کی۔

    ذرائع کے مطابق وزارت داخلہ کے حکام کا کہنا تھا کہ مجرم کی جانب سے کیے گئے انکشافات کی تحقیقات ضروری ہیں اس لیے مجرم کی پھانسی کا فیصلہ کرنے کے لیے مزید وقت چاہئے۔

    ذرائع نے بتایا کہ وزارت داخلہ کی درخواست کےبعد صدر ممنون حسین نے صولت مرزا کی پھانسی مؤخر کرنے کے احکامات جاری کردیئے ہیں، ذرائع کا کہنا ہے کہ ایک تحقیقاتی کمیٹی صولت مرزاسےازسرنوتحقیقات کرےگی۔

  • صولت مرزا نے جو کچھ کہاسب جھوٹ ہے، الطاف حسین

    صولت مرزا نے جو کچھ کہاسب جھوٹ ہے، الطاف حسین

    کراچی: متحدہ قومی موومنٹ کے قائد الطاف حسین کا کہنا ہے کہ ایم کیوایم کے خلاف میڈیا ٹرائل چل رہا ہے، بنا ثبوت کے ایم کیو ایم اورالطاف حسین پرالزام نہیں لگایا جاسکتا۔

    ٹارگٹ کلنگ کے جرم میں سزائے موت کے منتظر قیدی صولت مرزا کےتہلکہ انگیز بیان کے بعد اے آر وائی نیوز سے خصوصی گفتگو کرتے ہوئے ایم کیوایمکے قائد الطاف حسین کا کہنا تھا کہ صولت مرزا کا بیان چند روز قبل ریکارڈ کیا گیا اورآج ایجنسیوں نےریلیز کیا۔

    انہوں نے کہا کہ ایم کیو ایم کے خلاف کھلا میڈیا ٹرائل کیا جارہا ہے، یہ پہلا واقع ہے کہ جس میں سزا یافتہ قیدی کی ویڈیو جاری کی گئی ہے۔

    انہوں نے  کہا کہ میں اپنی زندگی میں کبھی صولت مرزا سے نہیں ملا اور نہ ان سے بات کی ہے، صولت مرزا نے جو کچھ کہا سب جھوٹ ہے۔

    ایک سوال کے جواب میں الطاف حسین نے کہا کہ میرے آنے اورنہ آنے کافیصلہ قانونی ماہرین کریں گے، میں کبھی مقدمے اورسزا سے نہیں گھبرایا، پہلے بھی جھوٹے مقدمات کی سزا بھگت چکا ہوں۔

  • میں نے کوئی دھمکی نہیں دی دھمکی تو عمران خان نے دی تھی، الطاف حسین

    میں نے کوئی دھمکی نہیں دی دھمکی تو عمران خان نے دی تھی، الطاف حسین

    کراچی: الطاف حسین کا کہنا ہے کہ انہوں نے کوئی دھمکی نہیں دی، دھمکی تو عمران خان نے دی، نائن زیرو پر چھاپہ مارنے پر اعتراض نہیں، ایم کیو ایم میں کوئی عسکری ونگ نہیں۔

    ایم کیو ایم کے اکتیسویں یوم تاسیس کے موقع پر متحدہ قومی مومنٹ کے قائد الطاف حسین کا کہناتھا کہ ملک میں ایک غریبوں کا اور دوسرا امیروں کانظام ہے، آئین وقانون کااطلاق اورآئین کی تمام شقیں صرف غریبوں پرلاگو ہیں۔

    انہوں نے کہا کہ میرے سوا تمام سیاستدان اسٹیٹس کو برقرار رکھنا چاہتے ہیں، ایم کیوایم غریب اورمتوسط طبقےسےتعلق رکھنےوالی واحد جماعت ہے میں ایک نظام کی جدوجہد کررہا ہوں جس کااطلاق امیر، غریب دونوں پرہو، سیاست دانوں نےکروڑوں روپے کے قرضے لیےاورمعاف کرائے۔سندھ میں کاروکاری کےنام پرماری جانےوالی خواتین کےملزمان کوکبھی سزاہوئی، کسی جاگیردارکوآج تک سزا ہوتےہوئے نہیں دیکھاہے۔

    الطاف حسین نے کہا کہ میرے گھرچھاپا مارنا تھا تو مجسٹریٹ سےسرچ وارنٹ لےکرآتے، نائن زیروکوئی کعبہ یامدینہ نہیں ایک لیڈرکی رہائشگاہ ہے، مجھےنائن زیروپرچھاپامارنےپرکوئی اعتراض نہیں, میرے گھرسرچ وارنٹ لےکرآتےاورمیری بہن کےگھربھی سرچ وارنٹ لیکرآتے۔

    الطاف حسین کا کہنا ہے کہ انہوں نے کوئی دھمکی نہیں دی، دھمکی تو عمران خان نے دی ،تقریر کا متن حکومت جہاں چاہے لے جائے،میں نے دھمکی دی ہی نہیں، یہ نہ سمجھیں کہ میں فوج کے ساتھ لڑنا چاہتا ہوں، فوج میری ہے اور میں فوج کا ہوں۔

    ان کا کہنا تھا کہ ن لیگ کے لیڈرز، گلوبٹ کی پرورش کرنے والوں کو کیا ہار ڈالنے چاہییں؟ کیافضل الرحمان کی گاڑی میں اسلحہ ہوتا ہے یانہیں؟ مذہبی رہنماؤں کااسلحے سے کیا تعلق، وہ بھی اسلحہ لےکرچلتےہیں، عمران خان اوردیگرسیاست دان اسلحہ رکھیں توجائزہے؟ ہمارےپاس کوئی عسکری ونگ نہیں۔انہوں نے سوال کیا کہ جماعت اسلامی والوں کےگھروں سےطالبان کےلوگ نکلےیامتحدہ والوں کے لوگ نکلے تھے۔

    ان کا کہنا تھا کہ آپریشن ضرب عضب کی حمایت میں ایم کیوایم نےکراچی میں ملین ریلی نکالی، دہشتگردوں کے خلاف فوج کے شانہ بشانہ لڑنے کو تیار ہوں، یہ نہ سمجھیں کہ میں فوج کے ساتھ لڑنا چاہتا ہوں، فوج میرے وطن کی محافظ ہے،ہاں ان کی وکالت کرتاہوں، فوج کی وجہ سے ہی اب بھی ملک بچا ہوا ہے، اگر الطاف حسین کیخلاف مقدمہ چلا تو عمران خان کیخلاف بھی چلے گا

    الطاف حسین نے آخر میں کارکنان کو وصیت کرتے ہوئے کہا کہ ہمارےدرمیان جرائم پیشہ افرادکےلیےکوئی جگہ نہیں، انہوں نے کہا میں ماردیا جاؤں یا پھانسی لگادیا جاؤں تو تحریک کا مشن ختم نہ کرنا،میرے برطانیہ میں بھی بہت دشمن ہیں۔