واشنگ مشین یوں تو سہولت فراہم کرنے والی شے ہے تاہم یہ بہت زیادہ پانی خرچ کرتی ہے جسے کسی صورت دوبارہ استعمال نہیں کیا جاتا، کپڑے دھونے میں استعمال ہونے والا ڈٹرجنٹ بھی ماحول کے لیے نقصان دہ ہوسکتا ہے۔
تاہم بھارتی طلبا نے ایسی واشنگ مشین تیار کی ہے جو بہت کم پانی میں بغیر ڈٹرجنٹ کے کپڑے دھو سکتی ہے۔
چندی گڑھ کی رہائشی انکور سنستھا نے 80 واش نامی واشنگ مشین بنائی ہے جو صرف 1 کپ پانی میں 5 کپڑے دھوتی ہے، وہ بھی بغیر ڈٹرجنٹ کے صرف 80 سیکنڈ میں۔ اگر کپڑا زیادہ گندا ہے تو تھوڑا وقت اور لگ سکتا ہے۔
80 واش مشین کا آغاز روبل گپتا، نتن کمار سلوجا اور ورندر سنگھ نے کیا ہے، جدید ٹیکنالوجی کے ساتھ تیار کی گئی یہ واشنگ مشین ایک طرف پانی کی بچت کرتی ہے تو دوسری طرف واشنگ پاؤڈر بھی بچاتی ہے۔
واشنگ مشین کی یہ نئی قسم بھاپ کی ٹیکنالوجی پر مبنی ہے، یہ کم ریڈیو فریکوئنسی مائیکرو ویب ٹیکنالوجی کی مدد سے بیکٹیریا کو مارتی ہے، یہ نہ صرف کپڑے بلکہ دھات کی بنی چیزیں اور پی پی ای کٹس بھی صاف کرسکتی ہے۔
کمرے کے درجہ حرارت پر پیدا ہونے والی خشک بھاپ کی مدد سے یہ کپڑوں سے دھول، مٹی اور رنگ کے داغ کو دور کرتی ہے۔
ابتدائی طور پر 80 واش کی ٹیم نے اسپتالوں کے لیے الٹرا وائلٹ شعاعوں کی مدد سے کام کرنے والی اسٹرلائزیشن مشین بنانے کا منصوبہ بنایا تھا تاہم ماہرین سے بحث کے بعد واشنگ مشین بنانے کا فیصلہ کیا گیا۔
یہ مشین بیکٹیریا کو مار سکتی ہے لیکن اس سے گندگی نہیں نکلتی، چنانچہ انہوں نے بھاپ کی تکنیک آزمائی اور اس میں انہیں کامیابی ملی۔
80 واش مشین کو زیادہ بجلی درکار ہوتی ہے، اس کی ٹیم اگلے سال اسے بین الاقوامی سطح پر پیٹنٹ کرنے کی کوشش کر رہی ہے۔
