شوبز انڈسٹری کی ابھرتی ہوئی اداکارہ ماہا حسن نے کم عمری میں ہراسانی کا شکارہونے کا انکشداف کیا ہے۔
حالیہ انٹرویو میں اداکارہ ماہا حسن نے زندگی کے دردناک لمحے سے پردہ اٹھایا اور کہا کہ انہیں کم عمری میں ہراسانی کا سامنا کرنا پڑا۔
اداکارہ نے بتایا کہ ان سے بچپن میں نامناسب انداز میں بات کی گئی اور غلط انداز میں چھو کر جسمانی طور پر ہراساں کیا گیا تاہم اس وقت وہ اتنی کم عمر تھیں کہ انہیں اندازہ نہ ہو سکا کہ یہ سب کچھ غلط اور غیر اخلاقی ہے۔
ماہا حسن کے مطابق اس واقعے نے ان کی سوچ اور اقدار کو بری طرح متاثر کیا۔
اداکارہ نے بتایا کہ شروع میں وہ اپنے ساتھ ہونے والے سلوک کا جواز ڈھونڈتی رہیں اور سوچتی تھیں کہ شاید اس شخص کو ذہنی علاج کی ضرورت ہے تاہم وقت گزرنے کے ساتھ انہیں احساس ہوا کہ ان کے ساتھ زیادتی ہوئی ہے۔
اداکارہ کا کہنا تھا کہ انہوں نے کبھی اس شخص کیخلاف ایف آئی آر درج نہیں کروائی جس پر آج بھی انہیں پچھتاوا ہے کہ شاید دیگر لڑکیاں بھی اس شخص کا نشانہ بنی ہوں۔
ماہا حسن نے بتایا کہ تھراپی اور نماز کے ذریعے انہوں نے ذہنی کیفیت پر قابو پایا اور اب دوبارہ ایمان کی جانب لوٹ چکی ہیں۔
