Tag: Mahmood Khan

پشاور: وزیر اعلیٰ خیبر پختون خوا محمود خان نے کہا ہے کہ آج خیبر پختون خوا کی اسمبلی تحلیل کر دی جائے گی، بطور وزیر اعلیٰ یہ میرا آخری خطاب ہے۔

تفصیلات کے مطابق ملکی سیاسی میدان میں ایک نئی ہلچل پیدا ہو گئی ہے، صوبائی اسمبلیاں تحلیل ہونے جا رہی ہیں، گورنر پنجاب نے صوبائی اسمبلی تحلیل کرنے کی پرویز الہٰی کی سمری پر دستخط کر دیے ہیں، جب کہ وزیر اعلیٰ کے پی نے بھی آج ہی کے دن کے پی اسمبلی تحلیل کرنے کا اعلان کر دیا ہے۔

محمود خان نے کہا آئین سے تجاوز کر کے سابق فاٹا سے متعلق نوٹیفکیشن جاری کیا گیا، گورنر خیبر پختون خوا کے پاس کوئی اختیارات نہیں ہیں، وفاقی نوٹیفکیشن کی کوئی آئینی اور قانونی حیثیت نہیں، اس کے خلاف عدالت سے رجوع کریں گے۔

گورنر پنجاب نے اسمبلی تحلیل کرنے کی سمری پر دستخط کردیے

خطاب میں وزیر اعلیٰ کے پی نے کہا خیبر پختون خوا کی پولیس دہشت گردوں کا بہادری سے مقابلہ کر رہی ہے، وزیر داخلہ رانا ثنااللہ کے بیان کی مذمت کرتا ہوں، کے پی میں امن نہیں ہوگا تو ملک میں امن نہیں ہوگا۔

پشاور:اپوزیشن جماعتوں نے وزیر اعلیٰ محمود خان کے خلاف تحریک عدم اعتماد نہ لانے کا فیصلہ کر لیا ہے۔

ذرائع کے مطابق کے پی اسمبلی کی ممکنہ تحلیل کے حوالے سے اپوزیشن جماعتوں نے اپنی مشاورت مکمل کر لی ہے، اور فیصلہ کیا ہے کہ وزیر اعلیٰ کے پی کے خلاف عدم اعتماد کی تحریک نہیں لائی جائے گی۔

اپوزیشن جماعتوں نے آئندہ انتخابات کی تیاری اور صوبے میں‌ گورنر راج سمیت دیگر آئینی آپشنز پر مشاورت کا فیصلہ کیا ہے، اور اس سلسلے میں عنقریب اپوزیشن جماعتوں کا ایک اجلاس طلب کیا جائے گا۔

ذرائع نے بتایا کہ اپوزیشن جماعتوں نے اسمبلی کی تحلیل کے معاملے پر خاموش رہنے پر اتفاق کیا ہے۔

اپوزیشن جماعتیں اس بات پر بھی متفق ہو گئی ہیں کہ خیبر پختون خوا اسمبلی اجلاس بلانے کے لیے نہ تو ریکوزیشن جمع کرائی جائے گی، نہ ہی محمود خان کے خلاف عدم اعتماد کی تحریک لائی جائے گی۔

دوسری طرف ذرائع ن لیگ کا کہنا ہے کہ وزیر اعلیٰ پنجاب پرویز الہٰی کے خلاف تحریک عدم اعتماد تیار ہے اور کسی بھی وقت جمع کرائی جا سکتی ہے۔

ذرائع کا کہنا ہے کہ نواز شریف کی ہدایت کا انتظار کیا جا رہا ہے، سگنل ملتے ہی تحریک عدم اعتماد پیش کر دی جائے گی، اس سلسلے میں نواز شریف آصف زرداری اور چوہدری شجاعت سے رابطے میں ہیں، مل کر فیصلہ کیا جائے گا۔