تہران: ایران میں مزید 12 افراد کو سزائے موت سنائے جانے کا خدشہ ہے۔
عرب نیوز کے مطابق ایرانی عدلیہ نے کہا ہے کہ اب تک 11 مظاہرین کو سزائے موت سنائی گئی ہے، لیکن انسانی حقوق کی تنظیموں کا کہنا ہے کہ تقریباً 12 مزید افراد کو سزائے موت سنائے جانے کا خدشہ ہے۔
مہسا امینی کی پولیس کی حراست میں ہلاکت کے بعد گزشتہ تین ماہ سے مظاہرے کیے جا رہے ہیں جو 1979 میں شاہ ایران کی حکومت کے خاتمے کے بعد موجودہ ایرانی حکومت کے لیے سب سے بڑا چیلنج بن چکے ہیں۔
ایران نے ان احتجاجی مظاہروں کو ’ہنگامے‘ قرار دیا ہے اور کہا ہے کہ اس کے دشمن ان مظاہروں کی حوصلہ افزائی کر رہے ہیں۔
ایمنسٹی انٹرنیشنل نے کہا ہے کہ ایران اب 22 سالہ مہان سدرات کو پھانسی دینے کی تیاری کر رہا ہے، جس پر مظاہرے میں چاقو نکالنے کا الزام لگایا گیا ہے۔
ایمنسٹی انٹرنیشنل کے مطابق ایک اور ایرانی شہری سہند نور محمد کی زندگی کو بھی خطرہ لاحق ہے، انھیں نومبر میں سزائے موت سنائی گئی تھی، ان کے علاوہ 2 گلوکاروں سمن سیدی اور تماج صالحی کو بھی سزائے موت سنائی جا چکی ہے۔
آئی ایچ آر کے مطابق ایران کا لوگوں کو سزائے موت دینا اس کریک ڈاؤن کا حصہ ہے، جس کے تحت اب تک سیکیورٹی فورسز 458 افراد کو مار چکی ہیں۔
