اسلام آباد: مجلس وحدت المسلمین کے رہنماؤں نے پریس کانفرنس کرتے ہوئے کہالاقانونیت اورٹارگٹ کلنگ کے واقعات نے امن و امان کی صورتحال کو مفلوج کر رکھا ہے، حکومتی نااہلی اور دہشت گردوں کی کاروائیوں نے اس مادر وطن کو جہنم بنا کر رکھ دیا ہے۔انھوں نےامجد صابری کے قاتلوں کی فوری گرفتاری کا مطالبہ کیا۔
مجلس وحدت المسلمین کے رہنماؤں نے کہا ہے کہ حکومت یوم علی و القدس کے روزفل پروف سیکورٹی انتظامات کرے۔ ملک میں بڑھتی ہوئی لاقانونیت اور ٹارگٹ کلنگ کے واقعات نے امن و امان کی صورتحال کو مفلوج کر رکھا ہے۔ حکومتی نااہلی اور دہشت گردوں کی کاروائیوں نے اس مادر وطن کو جہنم بنا کر رکھ دیا ہے، دنیا بھر میں پاکستان کو شناخت دینے والے امجد صابری کی ٹارگٹ کلنگ کی گئی اور چیف جسٹس کے بیٹے کااغوا کے معاملے میں کوئی پیش رفت نہیں ہوئی۔
ان خیالات کا اظہار علامہ مبشر ،علامہ علی انور،علامہ احسان دانش،مولانا صادق جعفری،آصف صفوی،ناصر الحسینی سمیت دیگر نے پردیسی ہائٹس کراچی میں منعقدہ پریس کانفرنس سے خطاب میں کیا۔
مرکزی رہنما علامہ مبشر کا کہنا تھا کہ دہشت گردوں نے اس ملک کو تختہ مشق بنا رکھا ہے آئے دن بے گناہ مظلوم شہریوں کو دن دیہاڑے قتل کر دیا جاتا ہے حکومت اور قومی سلامتی کے ذمہ دار ادارے خاموش تماشائی بنے ہوئے ہیں کراچی جیسے پررونق شہر کودہشت گردوں نے اپنی محفوظ پناہ گاہ بنایا ہوا ہے اسی طرح پنجاب بھر میں لشکر جھنگوی سمیت دیگر دہشت گرد جماعتیںآ زادانہ طور پر اپنی کاروائیوں میں مصروف ہیں۔
انہوں نے کہا کہ ملک میں دہشت گردی کی مسلح کاروائیوں کی پیچھے کالعدم مذہبی جماعتوں کا ہاتھ ہے، انہوں نے کہا کراچی میں جسٹس سجاد علی شاہ کے صاحبزادہ اویس شاہ کااغوا اور امجد صابری کا قتل قانون نافذ کرنے والے اداروں کیلئے سوالیہ نشان ہے۔ خلاف مجلس ووحدت مسلمین کے قائد علامہ راجہ ناصر عباس جعفری نے نیشنل پریس کلب اسلام آباد کے سامنے گزشتہ 43 دن سے بھوک ہڑتال کی ہوئی ہے اوراحتجاجی کیمپ کی طرف حکومت کی کسی مقتدر شخصیت کا رْخ نہ کرنا اس امر کی دلیل ہے کہ اس ملک میں صرف دہشت گردوں کے مطالبات تسلیم کیے جاتے ہیں۔
رہنماؤں نے امجد صابری کے قاتلوں کی فوری گرفتاری کا مطالبہ کیا اور یوم علی علیہ السلام و یوم القدس کے موقعہ پر ملک بھر میں ہونی والی مجالس اور جلوسوں احتجاجی مظاہروں و ریلیوں کو فول پروف سیکورٹی مہیا کرے تمام جلوسوں کے روٹس کی بھرپور نگرانی کی جائے داخلی راستوں پر واک تھرو گیٹ نصب کیے جائیں۔
