Tag: major power breakdown

  • پاکستان میں بجلی کا بڑا بریک ڈاؤن

    اسلام آباد : پاکستان کے دارالحکومت اسلام آباد ، کراچی، لاہور،کوئٹہ سمیت ملک کے بڑے شہروں میں اچانک بجلی کی فراہمی منقطع ہوگئی۔

    تفصیلات کے مطابق گدو سے کوئٹہ جانیوالی ٹرانسمیشن لائن میں خرابی کے باعث ملک میں بجلی کا بڑا بریک ڈاؤن ہوا، جس کے باعث اسلام آباد ، کراچی، لاہور،کوئٹہ سمیت ملک کے بڑے شہروں میں بجلی کی فراہمی معطل ہوگئی۔

    ذرائع نے بتایا کہ ٹرانسمیشن لائن میں خرابی سے بجلی کی ترسیل میں تعطل آیا، ٹرانسمیشن لائن اور پاور پلانٹ کے درمیان رابطہ منقطع ہونے سے بجلی کی فریکوئنسی کم ہوگئی، بجلی کی فریکوئنسی متعلقہ سطح سےکم ہونے پرکیسکیڈنگ ہوئی۔

    کیسکیڈنگ کےباعث پاور پلانٹ یکے بعد دیگرے ٹرپ کرتے گئے، ٹرپنگ سے گدو،جام شورو، مظفر گڑھ،حویلی شاہ بہادر، بلوکی پاور پلانٹس بھی بند ہے۔

    ذرائع کا کہنا ہے کہ تربیلااورمنگلا ڈیم سے پن بجلی کی پیداوار 500میگاواٹ ہورہی تھی، تربیلا اور منگلا ڈیم کی ٹرانسمیشن لائنز بھی ٹرپ کرگئیں تاہم سسٹم بچانے کے لیے این پی سی سی کا فیوز بند کیا گیا ہے۔

    کراچی، جنوبی پنجاب، سندھ اور خیبرپختونخوا کے مختلف علاقوں میں بھی بجلی بند ہے جبکہ آئیسکو، لیسکو، میپکو اور گیپکو ریجنزمیں بجلی کی فراہمی بھی معطل ہوگئی ہے۔

    این ٹی ڈی سی اور بجلی کی تقسیم کار کمپنیوں نے بحالی کا کام شروع کردیا، بجلی کی مکمل بحالی میں 27 گھنٹے سے زائد وقت لگ سکتا ہے۔

    دوسری جانب ایکسٹراہائی ٹینشن لائن میں ٹرپنگ کرنے سے کےالیکٹرک کے540 سےزائدگرڈ اسٹیشن بند ہوگئے اور کراچی کے50فیصدسےزائدحصےمیں بجلی کی فراہمی معطل ہوگئی۔

    نارتھ ناظم آباد، نیو کراچی، لیاقت آباد، کلفٹن، کورنگی، اورنگی ، گلشن اقبال، صدر، اولڈ سٹی ایریا اور لانڈھی میں بھی بجلی کی فراہمی معطل ہے۔

    ٹھہ، سجاول، بدین، حیدرآباد، ٹنڈو محمد خان، مٹھی ، عمرکوٹ،مٹیاری،ٹنڈوالہیار،میرپورخاص، نوشہروفیروز،نواب شاہ میں بھی بجلی بند ہے جبکہ لاہور سمیت پنجاب بھر میں بجلی کی ترسیل معطل ہے۔

  • نیپرا  ملک بھر میں ہونے والے بجلی کے بڑے بریک ڈاؤن کی تحقیقات کرے گی

    نیپرا ملک بھر میں ہونے والے بجلی کے بڑے بریک ڈاؤن کی تحقیقات کرے گی

    اسلام آباد : نیپرا نے ملک بھر میں ہونے والے بجلی کے بڑے بریک ڈاؤن کی تحقیقات کیلئے کمیٹی تشکیل دے دی، کمیٹی میں نیپرا کےافسران ،نجی ماہرین اورانجینئرز شامل ہیں۔

    تفصیلات کے مطابق ملک بھر میں بجلی کے بڑے بریک ڈاؤن کی تحقیقات کے لیے ایک کمیٹی تشکیل دے دی گئی ہے، نیپرا ملک بھر میں بجلی کے بریک ڈاون کی تحقیقات کرے گی، نیپرا کے افسران ، نجی ماہرین اور انجینئرز کمیٹی میں شامل ہوں گے، کمیٹی ملک میں ہوئے بلیک آؤٹ کے حوالے سے تحقیقات کرکے رپورٹ دے گی۔

    گذشتہ روز پاکستان بھر میں بجلی کے بریک ڈاؤن کی وجہ جاننے کے لیے حکومت نے ایک تحقیقاتی کمیٹی قائم کرتے ہوئے گدو تھرمل پاور کے 7 افسران و ملازمین کو معطل کر دیا گیا تھا۔

    سینٹرل پاور جنریشن کمپنی کا کہنا تھا کہ پلانٹ منیجر سہیل احمد، جونیئر انجینئر دلدار علی چنا، فورمین علی حسن گولو، آپریٹر ایاز حسین، سعید احمد، اٹنڈینٹ سراج احمد اور اٹنڈینٹ الیاس احمد کو معطل کیا گیا، ان افسران و ملازمین کی غفلت سے پاور بریک ڈاؤن ہوا۔

    واضح رہے کہ ملک بھر میں بریک ڈاؤن کیوں ہوا؟ اس کی وجوہ جاننے کے لیے حکومتی سطح پر کوششیں بدستور جاری ہیں، وزیر توانائی عمر ایوب نے کہا تھا کہ فالٹ گدو پاور پلانٹ کی چار دیواری کے اندر نہیں ہوا، بلکہ باہر ہوا ہے جس کے لیے پول ٹو پول اسے ڈھونڈا جا رہا ہے۔

    عمر ایوب کا کہنا تھا کہ اس نوعیت کی ٹرپنگ پہلی بار ہوئی ہے، سسٹم فعال ہو چکا ہے، اب آزادانہ انکوائری کرائی جائے گی۔

  • کراچی سمیت سندھ کےکئی شہروں میں بجلی کا طویل بریک ڈاؤن

    کراچی سمیت سندھ کےکئی شہروں میں بجلی کا طویل بریک ڈاؤن

    کراچی: شہرقائد سمیت سندھ کے مختلف شہروں میں بجلی کے طویل بریک ڈاؤن کے باعث رمضان المبارک کی پہلی سحری میں عوام کو شدید مشکلات کا سامنا کرنا پڑا۔

    تفصیلات کے مطابق کراچی میں کے الیکٹرک کے متعدد گرڈ اسٹیشنز متاثر ہونےکے باعث بڑا بریک ڈاؤن ہوگیا۔ جس کےنتیجے میں ناظم آباد، گلشن اقبال، پی ای سی ایچ ایس، گلستان جوہر، نارتھ کراچی، اسکیم 33، لانڈھی، کورنگی، گارڈن، شو مارکیٹ، رامسوامی، رنچھوڑ لائن، عثمان آباد، کیماڑی، کھارادر، میٹھادر، لی مارکیٹ، لیاری کے علاقوں میں بجلی معطل ہو گئی۔

    کراچی کےعلاقے شاہ فیصل کالونی، ملیر، قائد آباد میں بھی بجلی کی آنکھ مچولی جاری ہے۔ بجلی کی بندش کے باعث شہریوں کو رمضان المبارک کی پہلی سحری میں مشکلات کا سامنا کرنا پڑا۔

    کے الیکٹرک کے ترجمان کا کہنا ہے کہ ایکسٹرا ہائی ٹینشن ٹرپنگ سے بجلی کی فراہمی میں تعطل آیا، کے الیکٹرک کا عملہ جلد از جلد بحالی کے لیےمصروف عمل ہے جبکہ متاثرہ علاقوں میں جلد بجلی بحال کرنے کی کوشش کی جارہی ہے۔


    کراچی میں بجلی کا بڑا بریک ڈاؤن، پورا شہر متاثر، تاجروں‌ کا کے الیکٹرک کو الٹی میٹم


    دوسری جانب اندرون سندھ میں حیدرآباد، نواب شاہ، میرپورخاص ڈویژن کے 14 ڈسٹرکٹ میں بجلی بند ہوگئی، بریک ڈاؤن کے باعث دادو، ٹھٹہ، بدین، جامشورو، ٹنڈو محمد خان میں بھی بجلی کی فراہمی معطل ہے۔

    ترجمان حیسکو کا کہنا ہے کہ 500 کے وی کی ٹرانسمیشن لائن ٹرپ ہونے کی وجہ سے حب کو پاور پلانٹ کا جنریشن یونٹ بند ہوگیا جس کے نتیجےمیں حیسکو کے 76 گرڈ اسٹیشن بھی بند ہو گئے ہیں۔