کراچی : پاک فضائیہ نے تھیلیسیمیا کے مرض میں مبتلا 16سالہ بچے عبداللہ نوید کی فائٹر پائلٹ بننے کی خواہش پوری کردی۔
اس حوالے سے ترجمان پاک فضائیہ کا کہنا ہے کہ سربراہ پاک فضائیہ نے عبداللہ نوید کے پائلٹ بننے کاخواب پورا کردیا ہے،فائٹرپائلٹ بننا عبداللہ نوید کا خواب تھا، آپریشنل بیس پر ایک دن کیلئے عبداللہ نوید کو پائلٹ بنایا گیا۔
ترجمان پاک فضائیہ کے مطابق میک اے وش فاؤنڈیشن کے تعاون سے عبداللہ نوید نے پی اے ایف آپریشنل بیس کا دورہ کیا، پی اے ایف مسرور ایئر بیس کراچی میں منعقد پروقار تقریب میں ایئر وائس مارشل خالد محمود، ایئر کموڈور عاصم رانا نے بچے کو اعزازی رینک پہنائے۔
بعد ازاں عبداللہ نوید کو پاک فضائیہ کے لڑاکا طیارے میں بٹھایا گیا، بچے کو بیس کے مختلف یونٹس کا دورہ بھی کرایا گیا، اس موقع پر عبداللہ نوید نے سربراہ پاک فضائیہ کا خصوصی شکریہ ادا کیا۔
ترجمان پاک فضائیہ کا کہنا ہے کہ پاک فضائیہ پوری قوم کے دلوں میں خاص مقام رکھتی ہے، قوم کے ہمراہ عبداللہ نوید کی جلد صحت یابی کیلئے نیک خواہشات کا اظہار کرتے ہیں۔
واضح رہے کہ میک اے وش فاؤنڈیشن پاکستان، خواہشات کی تکمیل کے عالمی ادارے میک اے وش فاؤنڈیشن انٹرنیشنل کا الحاق رکن ہے اور پاکستان میں اپنے قیام سے لے کر اب تک 16 ہزار سے زائد شدید بیمار بچوں کی خواہشات کی تکمیل کرکے ان کے چہرے پر خوشیاں بکھیر چکا ہے۔
