برازیل : ریو اولمپکس میں میڈلز کےحصول کی جنگ جاری ہے، ریو اولمپکس میں خواتین کے سو میٹر بٹر فلائی سوئمنگ ایونٹ میں سوئیڈش سوئمر نے شاندار کارکردگی سے سب کو حیران کردیا جبکہ امریکا بارہ تمغوں کے ساتھ پہلی پوزیشن پر، چین دوسرے اورآسٹریلیا تیسرے نمبر پر ہے تاہم میزبان برازیل تاحال طلائی تمغہ جیتنے میں ناکام رہی۔
ریو اولمپکس میں خواتین کے سو میٹر بٹر فلائی سوئمنگ ایونٹ میں سوئیڈش سوئمر نے شاندار کارکردگی سے سب کو حیران کردیا، نوجوان سارا سجوسٹروم نے بھرپور مہارت سے سوئمنگ کرتے ہوئے سو میٹر کا فاصلہ پچپن اعشاریہ چار اٹھ سیکنڈز میں طے کرکے نہ صرف گولڈ میڈل جیتا بلکہ نیا عالمی ریکارڈبھی قائم کیا۔
ویمنز جوڈو کی باون کلوگرام کٹیگری میں کوسووا کی مجلیندا کلمیندی نے ملک کے لئے پہلا طلائی تمغہ جیتا، یہ اولمپکس کی تاریخ میں کوسووا کا پہلا گولڈ میڈل ہے، مجلیندا نے فائنل میں اٹالین جوڈوکا کو زیر کیا۔
تیراندازی کے ویمنز ٹیم ایونٹ میں جنوبی کوریا نے سونے کا تمغہ حاصل کیا، روس نے چاندی اور تائیوان نے کانسی کا تمغہ سینے پر سجایا۔
مینز ویٹ لفٹنگ کی چھپن کلو گرام کٹیگری میں چین کے لانگ چنگچون نے ایک سو ستر کلو گرام وزن اٹھا کر گولڈ میڈ جیتا، انہوں نے مجموعی طور پر تین سو سات کلو گرام وزن اٹھا کر مشترکہ ورلڈ ریکارڈ بھی بنایا۔
مینز جوڈو کی چھیاسٹھ کلو گرام کٹیگری میں اٹلی کے فیبیو باسیل نے جنوبی کورین حریف کو مات دے کر طلائی تمغہ حاصل کیا۔