ARYNews.tv | Urdu – Har Lamha Bakhabar

Tag: Makkah

  • مکہ مکرمہ: غلاف کعبہ کی تبدیلی کی روح پرورتقریب

    مکہ مکرمہ: غلاف کعبہ کی تبدیلی کی روح پرورتقریب

    مکہ مکرمہ: خالص سونے، چاندی کے تاروں اور 670 کلو گرام ریشم سے تیار کردہ غلاف کعبہ تبدیل کر دیا گیا۔

    تفصیلات کے مطابق مکہ مکرمہ میں غلاف کعبہ کی تبدیلی کی روح پرور تقریب ہوئی، غلاف کی تیاری میں 120 کلو خالص سونا، 100 کلو چاندی اور 670 کلو گرام خالص ریشم استعمال ہوا۔

    غلاف کعبہ کی تیاری پر تقریباََ 70 لاکھ سعودی ریال لاگت آئی، غلاف کعبہ کی لمبائی 50 فٹ اور چوڑائی 35 سے 40 فٹ ہے۔

    غلاف کعبہ میں قرآن پاک کی آیات کو سونے، چاندی اور خالص ریشم سے تحریر کیا گیا ہے۔ غلاف کعبہ کو مکہ مکرمہ کی دارالکسوہ فیکٹری میں تیار کیا گیا۔

    غلاف کعبہ ہرسال 9 ذوالحج کو یوم عرفہ کے موقع پر تبدیل کیا جاتا ہے جبکہ کعبہ کو غسل ہر سال دو مرتبہ شعبان اور ذوالحجہ کے مہینوں میں دیا جاتا ہے۔

    اتارے جانے والے غلافِ کعبہ کسوہ کو ٹکڑوں کی شکل میں بیرونی ممالک سے آئے ہوئے سربراہان مملکت اور دیگر معززین کو بطور تحفہ پیش کردیا جاتا ہے۔

    واضح رہے کہ ہرسال اس اہم اور روحانی منظر کے لیے بے چین رہنے والے کروڑوں مسلمان تبدیلی غلاف کعبہ کا منظر براہ راست ٹی وی اسکرین پر دیکھتے ہیں یہ مناظر دنیا بھر میں براہ راست دکھائے جاتے ہیں جو توحید کے پروانوں کے دلوں کی تسکین اور آنکھوں کی ٹھنڈک کا باعث بنتے ہیں۔

  • وزیراعظم عمران خان سے مصری صدر کی ملاقات، اعلامیہ جاری

    وزیراعظم عمران خان سے مصری صدر کی ملاقات، اعلامیہ جاری

    مکہ مکرمہ : وزیراعظم عمران خان سے مصری صدر  عبدالفتاح السیسی نے ملاقات کی، ملاقات میں علاقائی، عالمی معاملات اور مسلم امہ کو درپیش مسائل پر بات چیت کی گئی۔

    تفصیلات کے مطابق مکہ مکرمہ میں وزیراعظم عمران خان سے مصری صدر  عبدالفتاح السیسی کی ملاقات کے متعلق اعلامیہ جاری کردیا گیا، اعلامیہ کے مطابق دونوں رہنماؤں کی ملاقات میں باہمی تعلقات کے فروغ پر تبادلہ خیال کیا گیا ۔

    ملاقات میں علاقائی و عالمی معاملات اور مسلم امہ کو درپیش مسائل پر بات چیت کی گئی، دونوں رہنماؤں کے درمیان رابطے جاری رکھنے پر بھی اتفاق کیا گیا۔

    اس موقع پر وزیراعظم عمران خان کا کہنا تھا کہ پاکستان اور مصر مسلم دنیاکے دو اہم ممالک ہیں، دونوں ممالک مسلمانوں کے مسائل کے حل کے لئےکردار ادا کررہے ہیں، دوطرفہ اعلیٰ سطح وفود کی ملاقاتوں سے تعلقات مزید مضبوط ہوں گے۔

    اعلامیہ کے مطابق ملاقات میں مشترکہ وزارتی کمیشن کا اجلاس جلد بلانے اور تجارتی و معاشی تعلقات کی مضبوطی کو فروغ دینے پر اتفاق کیا گیا اس کے علاوہ ملاقات میں خطے کی سیکیورٹی صورت حال پر بھی تبادلہ خیال کیا گیا۔

    دونوں رہنماؤں نے خطے کو درپیش مسائل کے پر امن حل پر زور دیا،اعلامیہ کے مطابق وزیراعظم عمران خان نے مصری صدر کو دورہ پاکستان کی دعوت دی جو انہوں نے قبول کرلی۔

    یاد رہے کہ وزیرعمران خان نے مکہ مکرمہ میں عمرے کی ادائیگی کی، خاتون اول اوروزراء بھی ان کےہمراہ تھے، سعودی عرب کے تین روزہ دورے کے موقع پر دوزیراعظم عمران خان آج اسلامی سربراہی کانفرنس میں شرکت کریں گے۔

    عمران خان مدینہ منورہ سے مکہ پہنچ کر عمرےکی سعادت حاصل کی۔ خاتون اول بشریٰ بی بی اور وفاقی وزرا کا وفد بھی ہمراہ ہے، گزشتہ روز وزیراعظم نے مدینہ منورہ میں روضہ رسول صلی اللہ علیہ وآلہ وسلم پرحاضری دی۔

    عمران خان کیلئے روضہ رسول کے دروازےخصوصی طور پر کھولے گئے۔ انہوں نے مسجد نبوی میں نماز عصر ادا کی اور ریاض الجنہ میں نوافل اداکئے۔ اس کے علاوہ عمران خان سعودی فرمانروا شاہ سلمان اور ولی عہد شہزادہ محمد بن سلمان سےاہم ملاقات بھی کریں گے۔

  • وزیراعظم عمران خان آج اسلامی سربراہی کانفرنس میں شرکت کریں گے

    وزیراعظم عمران خان آج اسلامی سربراہی کانفرنس میں شرکت کریں گے

    اسلام آباد: وزیراعظم عمران خان مکہ مکرمہ میں آج 14ویں  اسلامی سربراہی کانفرنس میں پاکستان کی نمائندگی بھی کریں گے،  اجلاس کی سربراہی خادم حرمین شریفین شاہ سلمان کریں گے، عمران خان نے عمرے کی سعادت بھی حاصل کرلی۔

    تفصیلات کے مطابقب سعودی عرب میں موجود وزیراعظم عمران خان آج مکہ مکرمہ میں نمازجمعہ کی ادائیگی کے بعد چودہویں اسلامی سربراہی کانفرنس میں شرکت کریں گے، اجلاس کی سربراہی خادم حرمین شریفین شاہ سلمان کررہے ہیں۔

    عمران خان اسلامی سربراہی کانفرنس سے خطاب بھی کریں گے ، جس میں مسلم امہ میں اتحاد اور یکجہتی پر زور دیں گے جبکہ مسلم دنیا کو مقبوضہ کشمیر کی صورت حال سے آگاہ کریں گے۔

    وزیراعلیٰ کے پی کے محمود خان، وزیراعلیٰ پنجاب عثمان بزدار سمیت دیگر سینئر وزراء وزیراعظم کے ہمراہ ہیں ، عمران خان سعودی فرمانروا شاہ سلمان اورولی عہد شہزادہ محمد بن سلمان سے اہم ملاقات بھی کریں گے۔

    مزید پڑھیں : وزیراعظم عمران خان کی اہلیہ اور وفد کے ہمراہ عمرہ کی ادائیگی

    یاد رہے گذشتہ روز وزیراعظم عمران خان مدینہ منورہ پہنچے تو روضہ رسول صلی اللہ علیہ وآلہ وسلم پرحاضری دی، اس موقع پر روضہ رسول کے دروازے خصوصی طور پرکھولے گئے، انہوں نےمسجد نبوی میں نمازعصرپڑھی اورریاض الجنہ میں نوافل اداکئے۔

    بعد ازاں وزیراعظم عمران خان مدینے میں روضہ رسول پر حاضری دینے کے بعد سعودی شہر جدہ پہنچے تو مکہ کے گورنرپرنس خالد بن فیصل نے اہم حکومتی اہلکاروں کے ہمراہ ایئر پورٹ پر ان کا شاندار استقبال کیا۔

    وزیراعظم عمران خان نے اپنی اہلیہ بشری بی بی اور وفاقی وزرا کے ہمراہ عمرہ کی سعادت حاصل کی اور پاکستان کی ترقی وخوشحالی کے لیے خصوصی دعائیں کیں۔

    خیال رہے وزیراعظم عمران خان سعودی فرمانرواشاہ سلمان کی دعوت پردورہ کررہے ہیں۔

  • وزیر اعظم مکہ مکرمہ میں اوآئی سی کےسربراہ اجلاس میں شرکت کریں گے،ترجمان

    وزیر اعظم مکہ مکرمہ میں اوآئی سی کےسربراہ اجلاس میں شرکت کریں گے،ترجمان

    اسلام آباد : وزیر اعظم عمران خان اکتیس مئی کومکہ مکرمہ میں اسلامی کانفرنس تنظیم کے چودہ ویں سربراہ اجلاس میں شرکت کریں گے، سربراہ اجلاس سے پہلے آج وزرائے خارجہ کونسل کا اجلاس ہوگا۔

    تفصیلات کے مطابق ترجمان دفتر خارجہ نے کہا وزیر اعظم عمران خان اسلامی کانفرنس تنظیم کے چودہ ویں سربراہ اجلاس میں شرکت کریں گے، سربراہ اجلاس اکتیس مئی کومکہ مکرمہ میں منعقد ہورہا ہے۔

    ترجمان کا کہنا تھا وزیر اعظم اوآئی سی سربراہ اجلاس میں اپنے خطاب میں اتحاد اور درپیش چیلنجز پر توجہ مرکوز رکھیں گے اور امت مسلمہ کے مشترکہ مقاصد اور مسائل بشمول کشمیر اور فلسطین پر بھی بات کریں گے۔

    دوہزار انیس او آئی سی کے قیام کا پچاس واں سال ہے، او آئی سی اقوام متحدہ کے بعد دنیا کو دوسرا بڑا فورم ہے۔

    مزید پڑھیں : وزیراعظم عمران خان 30 مئی کو سعودی عرب روانہ ہوں گے، ذرائع

    سربراہ اجلاس سے پہلے آج وزرائے خارجہ کونسل کا اجلاس ہوگا، جس میں وزیر خارجہ شاہ محمود قریشی پاکستان کی نمائندگی کریں گے۔

    اسلامی ممالک کی تعاون تنظیم (او آئی سی )کی وزرائےخارجہ کونسل کا اجلاس آج سعودی عرب میں ہورہاہے ، اس اجلاس میں باہمی مشاورت سے اسلامی سربراہی کانفرنس کے مسودہ “مکہ اعلامیہ” کو حتمی شکل دی جائے گی۔

    گزشتہ روز وزیر خارجہ شاہ محمود قریشی سعودی عرب پہنچے تھے، سعودی وزارت خارجہ کے چیف آف پروٹوکول جمال ناصر نے ان کا استقبال کیا، اس موقع پر پاکستان کے سفیر علی اعجاز اور جدہ قونصل خانےکےقونصل جنرل شہریار اکبر موجود تھے۔

    وزیرخارجہ شاہ محمود قریشی نے سعودی عرب روانگی سے قبل میڈیا سے بات چیت کرتے ہوئے کہا تھاکہ اوآئی سی سربراہ اجلاس کے ایجنڈے کوحتمی شکل دی جائے گی، جلاس میں مشرق وسطیٰ کی صورت حال پرتبادلہ خیال کیا جائے گا، ایران کی صورت حال اورخطے میں کشیدگی پربات چیت ہوگی۔

    وزیرخارجہ شاہ محمود قریشی کا کہنا تھا جلاس کی سائیڈ لائنزپرکچھ وزرائے خارجہ سے ملاقاتیں بھی طے ہیں، سعودی عرب میں کشمیررابطہ گروپ کا اجلاس بھی متوقع ہے، کشمیر رابطہ گروپ کے ارکان اپنا نقطہ نظر پیش کریں گے۔

  • مکہ کلاک ٹاور میں موجود عجائب گھر زائرین کے لئے کھول دیا گیا

    مکہ کلاک ٹاور میں موجود عجائب گھر زائرین کے لئے کھول دیا گیا

    ریاض : مکہ مکرمہ میں واقع کلاک ٹاور میوزیم عوام کے لیے کھول دیا گیا جس میں اذان کے وقت ایل ای ڈیز جگمگاتی ہیں جن کی روشنی میلوں دور سے دکھائی دیتی ہے۔

    تفصیلات کے مطابق مکہ میں حرم کے سامنے قائم کلاک ٹاور جہاں سال بھر زائرین کا تانتا بندھا رہتا ہے، اب اپنے چار منزلہ عجائب گھر کے ساتھ سیاحتی مقام کے طور پر بھی لوگوں کا استقبال کرے گا۔

    عرب خبر رساں ادارے کا کہنا تھا کہ کلاک ٹاور میں بنایا گیا یہ میوزیم اس سال رمضان میں زائرین کے لیے کھولا گیا ہے، جو پورا مہینہ مسلسل کھلا رہے گا۔

    سعودی میڈیا کا کہنا ہے کہ عجائب گھر کی پہلی منزل پر نظام شمسی کی مجسم عکاسی کی گئی ہے جس کے بعد وقت کے تعین ،کائنات، کہکشاں کے علاوہ نظام شمسی کی گردش کو بیان کرنے کیلئے بہترین اور جدید ترین طریقوں کے ذریعے وضاحت کی گئی ہے۔

    اس کے علاوہ زائرین کو دنیا کی سب سے بڑی گھڑی جوکہ مکہ ٹاور پرنصب کی گئی ہے، اس کے مختلف مراحل اور تنصیب کے بارے میں بھی تفصیل سے آگاہ کیاجاتا ہے، گھڑی کی تیاری میں دنیا کہ بڑی کمپنیوں کی مشترکہ کاوش ہے۔

    مقامی میڈیا کے مطابق کلاک ٹاور میوزیم کی دوسری منزل وقت کے بارے میں ہے یہاں مختلف ادوار میں گھڑیوں کی ایجاد کے بارے میں وضاحت کی گئی ہے۔

    کلاک ٹاور کی تیسری منزل پر کائنات کے رازوں کے بارے میں مجسم عکاسی کرتے ہوئے مختلف مناظر کو پیش کیا گیا ہے علاوہ ازیں چاند اور سورج گرہن سے متعلق مختلف ادوار کو بھی دکھایا گیا ہے، چوتھی منزل پر زائرین کو خلا اور سیاروں کے بارے میں معلومات مہیا کی گئی ہیں۔

    عرب میڈیا کا کہنا ہے کہ ٹاورکے سب سے بلند مقام کو شرفہ کہتے ہیں یہاں پہنچ کر زائرین مکہ کا مشاہدہ کرسکتے ہیں، یہاں سے پورا شہر دیکھا جاسکتا ہے جبکہ زائرین حرم کاانتہائی خوبصورت منظر بھی دیکھ سکتے ہیں۔

    سعودی خبر رساں ادارے کے مطابق اپنی اونچائی کی وجہ سے کلاک ٹاور مکہ سے 25کلومیٹر دور سے بھی دکھائی دیتا ہے۔ عمارت کا نام اس پر نصب دنیا کی سب سے بڑی گھڑی پر رکھا گیا ہے، جو چاروں سمتوں سے دکھائی دیتی ہے۔

    کلاک ٹاور میں یہ خصوصیت رکھی گئی ہے کہ اذان کے وقت ایل ای ڈیز کی جگمگاتی ہیں جن کی روشنی میلوں دور سے دکھائی دیتی ہے۔

  • سعودی عرب نے حرمین شریفین کی تاریخی اٹلس امریکا اور برطانیہ کو بھجوادی

    سعودی عرب نے حرمین شریفین کی تاریخی اٹلس امریکا اور برطانیہ کو بھجوادی

    ریاض: شاہ عبدالعزیز ریسر چ فاؤنڈیشن اینڈ آرکائیو ( دراہ) نے عربی اور انگریزی زبان پر مشتمل مکہ اور دیگر مذہبی زیارات کی باتصویر اٹلس امریکا اور برطانیہ بھجوادی۔

    تفصیلات کے مطابق دراہ کی جانب سے بھیجی جانے والی یہ اٹلس برطانوی میوزیم اور امریکی لائبریری آف کانگریس میں سائنسدانوں اور محققین کی رہنمائی کے لیے رکھی جائے گی۔

    بتایا جارہا ہے کہ یہ اٹلس 325 صفحات پر مشتمل ہے اور اس میں مکہ اور حرمین شریفین کی تاریخی تصاویر اور تاریخ مرتب کی گئی ہے۔ یہ اٹلس 16 سال قبل مرتب کی گئی تھی اور اس میں عرب اور غیرملکی مسلم زائرین کی تاریخی تحاریر بھی شامل ہیں۔

    اسلام کی تاریخ کو عمومی اور مکہ شہر کی تاریخ کو خصوصی طور پر اجاگر کرنے کے لیے دراہ نے یہ اٹلس کئی بین الاقوامی کتب میلوں میں بھی بھجوائی ہے، یہ ریاض کے بین الاقوامی کتاب میلے میں بھی میسر تھی اور دراہ کی ویب سائٹ سے بھی اسے حاصل کیا جاسکتا ہے۔

    یہ اٹلس ڈاکٹر معراج نواب مرزا اور ڈاکٹر عبداللہ صالح شویش کی مشترکہ تالیف ہے اور اسے چھ ابواب میں منقسم کیا گیا ہے۔ مکہ مسلم اور مغربی پینٹرز کی نظر میں، ابتدائی فوٹوز اور خاکے ، اور مسجد الحرام اور مکہ شاہ عبدالعزیز اور ان کے بیٹوں کے دور میں، شامل ہیں۔

    اس اٹلس میں اس دور کی بھی تصاویر شامل ہیں جب نیا نیا کیمرہ ایجاد ہوا تھااور بلیک اینڈ وائٹ فلم ہوا کرتی تھی۔ یہ تصاویر مقامی اور غیر ملکی مسلم فوٹو گرافرز نے کھینچی تھیں۔

    اس ڈاکیومنٹ میں جدید سعودی حکومت کی مکے کے لیے خدمات کا تذکرہ بھی کیا گیا ہے جیسا کہ مکے تک روڈز کی تعمیر، زائرین کے لیے پانی کا اہتمام، چھت کی تعمیر، مسجد میں روشنی کا انتظام، کعبے کا غلاف تیار کرنے کے لیے فیکٹری کی تشکیل ، دروازے کی تعمیر اور مکہ کلاک کی تعمیر شامل ہیں۔

  • مکہ معظمہ، حرمِ کعبہ پرکالے جھینگروں کی یلغار، زائرین پریشان

    مکہ معظمہ، حرمِ کعبہ پرکالے جھینگروں کی یلغار، زائرین پریشان

    مکہ مکرمہ : مکہ مکرمہ حرم شریف میں اچانک کالے جھینگروں کی یلغار نے عوام کے لئے مشکلات پیدا کردیں، جس کی ویڈیو انٹرنیٹ پروائرل ہوگئی جبکہ انتظامیہ نے حرم شریف سمیت شہرمیں جھینگروں کے خاتمے کے لئے جراثیم کش دوا کا اسپرے کیا۔

    تفصیلات کے مطابق مکہ میں کالے جھینگروں کی بہتات گھروں، اسکولز اور سڑکوں پر عوام کے لئے پریشانی کاباعث بن گئی، کالے جھینگروں کی ویڈیو انٹرنیٹ پروائرل ہوگئی۔

    مکہ مکرمہ میونسپلٹی نے حرم شریف سمیت شہر میں جھینگروں کے خاتمے کے لئے جراثیم کش دوا کا اسپرے کیا گیا جبکہ مسجد الحرام کے زائرین کو جھینگروں سے نجات دلانے کیلئے 138افراد پر مشتمل 22ٹیمیں تعینات کردیں اور انہیں 111مشینیں بھی دیدی گئیں۔

    میونسپلٹی نے ایسے تمام مقامات کی نشاندہی کرلی ہے، جہاں جہاں مکھی مچھر اور جھینگر زیادہ تعداد میں پیدا ہورہے ہیں۔

    عبدالوہاب سورور نے بتایا کہ”ہفتہ کی رات مسجد میں دعا کر رہا تھا کہ اچانک ہر جگہ کیڑوں نے حملہ کردیا، مسجد میں نہ صرف گارڈوں پر بلکہ کعبہ کے ارد گرد بھی کیڑے ہی کیڑے نظر آرہے تھے، میں نے اپنی زندگی مکہ میں گزار دی لیکن ایسا نظارہ پہلے کبھی نہیں دیکھا۔

    جنگلی کیڑوں کے ماہرین اور ڈبلیو ایف ایف کے سائنسی مشیر ڈاکٹر جیکی جوڈو کا کہنا ہے کہ یہ پہلا موقع ہے جب میں نے کیڑوں کو اتنی بڑی تعداد میں دیکھا ہو اور مجھے حیرت نہیں ہوئی کہ لوگ بھی اسی طرح کہہ رہے ہیں ، کیونکہ میں نے پہلے کبھی ایسے کیڑوں کو اتنی بڑی تعداد نہیں دیکھی۔

    دوسری جانب مسجد الحرام کی انتظامیہ نے حرم شریف کے زائرین کو مچھروں اور مختلف قسم کے کیڑوں سے بچانے کیلئے 24 گھنٹے کیڑے مار ادویہ کے اسپرے کا بندوبست کردیا ہے اور اس کے لیے نظام الاوقات مقرر کئے گئے ہیں تاکہ زائرین کو کسی طرح کا کوئی نقصان نہ ہو۔

  • امام مسجد کی نشاندہی پر 37 برس بعد کعبے کا رخ ٹھیک کردیا گیا

    امام مسجد کی نشاندہی پر 37 برس بعد کعبے کا رخ ٹھیک کردیا گیا

    انقرہ: ترکی کی غلط سمت پر بنائی جانے والی مسجد سوگورین کا رخِ کعبہ امام کی نشاندہی پر ٹھیک کردیا گیا۔

    میڈیا رپورٹس کے مطابق ترکی کے مغربی صوبے یالوؤا کے علاقے سگورین میں سن 1981 کو تعمیر ہونے والی مسجد کا محراب (منبر) غلط بنا گیا گیا تھا جس سے خانہ کعبہ کی سمت غلط ہوئی۔

    مسجد انتظامیہ کو اس بات کا احساس ہی نہیں ہوا کہ نمازی گزشتہ 37 برس سے غلط سمت میں نماز ادا کررہے ہیں، اس بات کا انکشاف گزشتہ برس تعینات ہونے والے امام عیسیٰ کایا نے کیا۔

    انہوں نے انتظامیہ کو غلط سمت سے متعلق آگاہ کیا اور مقامی مفتی سے مشورہ لینے کے بعد فوری طور پر کعبے کے رخ کو درست کیا گیا۔

    انتظامیہ اور امام مسجد نے مشاورت کے بعد محراب کو نہ توڑنےکا فیصلہ کیا جبکہ نمازیوں کو درست سمت سے آگاہ کرنے کےلیے قالین پر سفید رنگ سے تیر کے نشانات بنا دیے تاکہ کعبۃ اللہ کی طرف منہ کر کے نماز ادا کی جائے۔

    مسجد انتظامیہ کو یہ خدشہ تھا کہ اگر نمازیوں کو اس بات کا علم ہوا تو معاملہ خراب ہوسکتا ہے البتہ امام نے غلطی سے متعلق لوگوں کو آگاہ کرتے ہوئے قرآن و احادیث کی روشنی میں مسئلہ بیان کیا جس پر نمازیوں نے انہیں بہت سراہا۔

    حکام نے تصدیق کی کہ مسجد کی تعمیر کے وقت انجینئر کی غلفت اور لاپرواہی کی وجہ سے محراب بنانے میں غلطی ہوئی جس اُس نے چھپا کر رکھا۔

  • مسجد الحرام میں دنیا کی سب سے بڑی چھتری چند روزمیں نصب کردی جائے گی

    مسجد الحرام میں دنیا کی سب سے بڑی چھتری چند روزمیں نصب کردی جائے گی

    مکہ مکرمہ : مسجد الحرام کے شمال مغربی صحن میں دنیا کی سب سے بڑی چھتری چند روزمیں نصب کردی جائے گی، جس کے سائے میں ساڑھے تین ہزار افراد نماز ادا کرسکیں گے۔

    تفصیلات کے مطابق مسجدالحرام کے وسیع و عریض صحن میں دُنیا کی سب سے بڑی چھتری عنقریب نصب کر دی جائے گی، جس کے باعث صحن میں نماز ادا کرنے والے حاجیوں اور عمرہ زائرین کو شدید گرمی اور دھوپ سے بچایا جا سکے گا۔

    سعودی عرب کی حکومت کی جانب سے مسجد الحرام میں جاری توسیع کے تیسرے مرحلہ میں لگائی جانے والی چھتری کے سائے میں ساڑھے تین ہزار افراد نماز ادا کرسکیں گے۔

    چھتری کا رقبہ 53×53میٹر اور وزن تقریبا 600 ٹن ہوگا جبکہ اونچائی 45 میٹر ہوگی۔

    صحن میں دی جانے والی دیگر سہولیات میں آب زمزم کی مستقل فراہمی ،وضوخانے،اطلاعاتی بورڈز،صوتی نظام اور سی سی ٹی وی کیمرے لگےہوں گے۔

    دُنیا کی سب سے بڑی چھتری جرمنی میں خصوصی طور پر تیار کی گئی ہیں، جس کو کلوز سرکٹ ٹی وی کیمروں، لاؤڈ سپیکر سسٹم، ہوا کو معطر رکھنے کے نظام سے بھی آراستہ کیا گیا ہے۔

    جس کمپنی نے اسے ڈیزائن کیا ہے، سعودی حکومت نے انہیں پابند کیا ہے کہ اس کا ڈیزائن صرف اور صرف خانہ کعبہ کیلئے ہی کریں گے۔

    واضح رہے کہ 2008 کے دوران سعودی حکومت نے مسجد حرام کے صحن کو ڈھانپنے کیلئے بہت ہی بڑی بڑی چھتریاں لگانے کا منصوبہ بنایا تھا۔

    سال 2014 میں اپنی وفات سے کچھ روز قبل سعودی فرماں روا شاہ عبداللہ نے مسجد الحرام میں عبادت گزاروں کی سہولت کے لیے خصوصی چھتریوں کی تنصیب کا فرمان جاری کیا تھا۔

    اس سے قبل مدینہ منورہ میں تقریباً 250 ایسی ہی چھتریاں نصب کی گئی تھیں۔

  • سعودی عرب میں تیز رفتار ٹرین سروس کا آج سے باقاعدہ آغاز ہوگا

    سعودی عرب میں تیز رفتار ٹرین سروس کا آج سے باقاعدہ آغاز ہوگا

    ریاض: سعودی عرب میں ’حرمین‘ نامی ٹرین سروس کا آج سے باقاعدہ آغاز ہوگا، ٹرین مکہ اور مدینے کے درمیان سفر کرے گی۔

    تفصیلات کے مطابق سولہ ارب ڈالرز سے زائد لاگت سے تیار ہونے والے حرمین ٹرین منصوبے کا افتتاح گذشتہ ہفتے ہوا تھا، اس ٹرین کے ذریعے عام شہری باآسانی سفر کرسکیں گے۔

    عرب میڈیا کے مطابق اس ٹرین کی سروس عازمین حج اور عمرے کے علاوہ عام شہریوں کو بھی میسر ہوگی، یہ ٹرین مکہ اور مدینے کا فاصلہ صرف دو گھنٹے میں طے کرے گی۔

    ٹرین منصوبے کے حوالے سے حکام کا کہنا ہے کہ یہ ٹرین 300 کلومیٹر فی گھنٹا کی رفتار سے چلے گی اور دونوں شہروں کے درمیان سفر میں 120 منٹ صرف ہوں گے۔

    مکہ مدینہ کے درمیان مسافت، حرمین ہائی اسپیڈ ٹرین کا کامیاب تجربہ

    خیال رہے کہ سعودی عرب کے دارالحکومت ریاض میں ساڑھے 22 ارب ڈالرز کی لاگت سے میٹرو نظام بھی زیر تعمیر ہے۔

    حکام کی جانب سے سعودی عرب کے انفراسٹرکچر کو مزید مضبوط بنانے کے لیے بھرپور اقدامات کیے جارہے ہیں، اور جدید منصوبے بھی زیر غور ہیں۔

    گذشتہ ماہ سعودی عرب کے جنرل ٹرانسپورٹ اتھارٹی کے ڈائریکٹر جنرل ڈاکٹر رمیح نے ایک بیان میں کہا تھا کہ تکنیکی مشکلات کے باوجود وہ حرمین ریل گاڑی کے غیرمعمولی منصوبے کو پایہ تکمیل تک پہنچانے میں کامیاب رہے ہیں۔