کراچی : وزیراعظم عمران خان کی خصوصی کاوشوں سے ملائیشیا میں محصور300 سے زائد رہائی پانے والے مزید پاکستانی شہری وطن واپس پہنچ گئے، اسکیم سے 8ہزار افراد مستفید ہوئے۔
تفصیلات کے مطابق پی آئی اے کا خصوصی طیارہ محصور پاکستانیوں کو ملائیشیا سے اسلام آباد لے کر پہنچ گیا ہے، وزیراعظم عمران خان کی ذاتی کوششیں رنگ لے آئیں۔
پی آئی اے کا خصوصی طیارہ اسلام آباد ایئرپورٹ پر لینڈ کر گیا، پرواز پی کے9895پاکستانیوں کو ملائیشیا سے اسلام آباد لے کر پہنچ گئی، اس موقع پر ایئر پورٹ کے لاؤنج میں رقت آمیز مناظر دیکھنے میں آئے، استقبال کیلئے آنے والے عزیز و اقارب ان کو گلے سے لگا کر آبدیدہ ہوگئے۔
اس حوالے سے دفتر خارجہ کی ترجمان عائشہ فاروقی کا کہنا ہے کہ حکومت پاکستان کی ہدایت پر ملائیشیا میں محصور پاکستانیوں کی واپسی کیلئے پی آئی اے کی خصوصی پرواز کا اہتمام کیا گیا تھا۔
دفتر خارجہ کے مطابق ملائیشیا حکومت نے ان افراد کی رضاکارانہ وطن واپسی کیلئے اسکیم متعارف کرائی تھی، مذکورہ اسکیم یکم اگست2019 سے شروع ہوئی تھی،آج ختم ہوگئی۔
آٹھ ہزار سے زائد پاکستانیوں نےملائیشین اسکیم کا فائدہ اٹھایا،5ماہ میں ہائی کمیشن نے1833ایمرجنسی ٹریول دستاویزات جاری کیے، بیرون ملک مقیم پاکستانیوں کی فلاح وبہبود حکومت کی ترجیح ہے۔
واضح رہے کہ ملائیشیا میں محصور300سے زائد پاکستانی شہری مختلف وجوہات کی بنا پر ملائشیئن حکام کی تحویل میں تھے, کوالالمپور سے اسلام آباد کے لئے پی آئی اے کی خصو صی پرواز کے ذریعے اپنے پیاروں کے پاس واپس وطن پہنچیے۔
اتنی بڑی تعداد میں لوگوں کو اتنی جلدی لانے کیلئے کوئی بھی ائرلائن تیار نہ تھی۔ اس حوالے سے پی آئی اے کے چیف ایگزیکٹو آفیسر ائر مارشل ارشد ملک نے فوری طور پر اس معاملے کو اہم قومی فریضہ سمجھتے ہوئے, ہم وطنوں کو واپس پاکستان پہنچانے کے لئے خصوصی پرواز چلانے کا اعلان کیا تھا۔
ائیرمارشل ارشد ملک کا کہنا تھا کہ پی آئی اے نے ہمیشہ قومی ضرورت کے وقت اپنی ذمہ داریاں نبھانے کیلئے قدم بڑھایا ہے۔ پاکستانی بھائیوں کو بیرون ملک کبھی بے یارو مددگار نہیں چھوڑا، انہوں نے کہا کہ پی آئی اے آئندہ بھی قومی ذمہ داری نبھانے کا عزم رکھتی ہے کیونکہ پی آئی اے پاکستان ہے اور پاکستان پی آئی اے ہے۔
