ARYNews.tv | Urdu – Har Lamha Bakhabar

Tag: Malaysia

  • وزیراعظم عمران خان کا پشاور سے ملائیشیا کیلئے پروازیں شروع کرنے کا اعلان

    وزیراعظم عمران خان کا پشاور سے ملائیشیا کیلئے پروازیں شروع کرنے کا اعلان

    اسلام آباد : وزیراعظم عمران خان کاپشاورسےملائیشیاکیلئےپروازیں شروع کرنےکااعلان کرتے ہوئے کہا فلائٹ سےبیرون ملک کام کرنےوالےلوگوں کو سہولت میسر آئے گی۔

    تفصیلات کے مطابق وزیراعظم عمران خان نے اعلان کیا ہے کہ پشاور سے ملائیشیا کے لئے پروازیں جلد شروع کی جائیں گی، پروازوں سے بیرون ملک کام کرنے والے لوگوں کوسہولت میسر آئےگی۔

    وزیراعظم کا کہنا تھا کہ خیبرپختونخوامیں سیاحت کے فروغ پرخصوصی توجہ دی جارہی ہے، نئی ویزا پالیسی سیاحت کے فروغ میں اہم سنگ میل ثابت ہوگی۔

    عمران خان نے کہا مالاکنڈ میں توانائی ضروریات کو پورا کرنے کیلئے اقدامات کررہے ہیں، ہائیڈل پروجیکٹس اور ماحول دوست سستے منصوبوں پر توجہ دی جائےگی، حلقوں سے متعلق مسائل کے حل کو یقینی بنانے کیلئے تجاویز مرتب کی جائیں۔

    وزیراعظم کا سرکاری محکموں میں خالی آسامیوں پر مقامی افراد کو موقع دینے کا فیصلہ

    وزیراعظم نے سرکاری محکموں میں خالی آسامیوں پر مقامی افراد کو موقع دینے اور معدنی دولت کو بروئےکار لانے کے لیے جدید ٹیکنالوجی کے استعمال کا بھی فیصلہ کرتے ہوئے کہا درجہ چہارم تک خالی آسامیوں کو پر کرنے کیلئے مقامی لوگوں کو ترجیح دی جائے، سوات، مالاکنڈ و دیگر علاقوں میں جدید ٹیکنالوجی کی کوششیں کی جارہی ہیں۔

    مزید پڑھیں : حکومت پاکستان کا 97 ممالک کے لیے ویزا شرائط نرم کرنے کا فیصلہ

    یاد رہے چند روز قبل وزیراعظم عمران خان نے 97 ممالک کے لیے ویزا شرائط نرم کرنے کا فیصلہ کیا تھا اور ویزا پالیسی میں نرمی کے لیے مختلف کیٹگریز بنانے کی ہدایت کی تھی۔

    وزیرِ اعظم عمران خان نے اجلاس میں کہا تھا کہ دنیا کی پاکستان تک رسائی آسان بنائیں گے، سیاحوں، سرمایہ کاروں کے لیے پاکستان کو پُر کشش بنانا ہے، دنیا بھر کے تاجروں، سیاحوں کے لیے ویزے میں آسانی پیدا کی جائے گی۔

    یاد رہے کہ 13 جنوری 2019 کو وفاقی وزیرِ اطلاعات نے کہا تھا کہ حکومت ملک میں سیاحت کے فروغ کے لیے 66 ممالک کے لیے پاکستان کا ویزا ختم کر رہی ہے، تاکہ ان ممالک سے لوگ آئیں اور پاکستان میں منعقد ہونے والے فیسٹیولز کو انجوائے کریں۔

  • کم سِن بچوں کو زبردستی پاکستان سے ملائیشیا لے جانے والا انٹرپول کے ہاتھوں گرفتار

    کم سِن بچوں کو زبردستی پاکستان سے ملائیشیا لے جانے والا انٹرپول کے ہاتھوں گرفتار

    لاہور: کم سِن بچوں کو زبردستی پاکستان سے ملائیشیا لے جانے والے ملزم کو انٹرپول نے گرفتار کر لیا، ملزم کو پولیس کی درخواست پر ملائیشیا میں گرفتار کیا گیا۔

    تفصیلات کے مطابق انٹرپول نے پاکستانی انتظامیہ کی درخواست پر ملزم طاہر کو ملائیشیا میں گرفتار کر لیا، ملزم طاہر  اپنے دو کم سِن بچوں کو زبردستی پاکستان سے ملائیشیا لے گیا تھا۔

    [bs-quote quote=”وزارتِ خارجہ نے بھی ملزم کی گرفتاری کے حوالے سے پولیس کو آگاہ کر دیا۔” style=”style-7″ align=”left” color=”#dd3333″][/bs-quote]

    بتایا گیا ہے کہ ملزم طاہر حسین اپنی بیوی اقرا کو نشہ آور گولیاں کھلا کر بچے لے کر فرار ہوا تھا، غالب مارکیٹ پولیس نے واقعے کا مقدمہ طاہر اور دیگر افراد کے خلاف درج کر رکھا ہے۔

    دریں اثنا وزارتِ خارجہ نے بھی ملزم کی گرفتاری کے حوالے سے پولیس کو آگاہ کر دیا، ملائیشیا میں گرفتار ملزم طاہر حسین کو جلد پاکستان لایا جائے گا۔

    ملزم کی بیوی اقرا مظفر نے اس موقع پر کہا کہ انصاف کی فراہمی پر وزیرِ اعظم عمران خان اور وزیرِ خارجہ شاہ محمود کی شکر گزار ہوں۔

    بچوں کی والدہ اقرا کا کہنا تھا کہ ملزم طاہر حسین وزیرِ خارجہ شاہ محمود قریشی کی ذاتی کوششوں کی وجہ سے گرفتار ہوا، یقین ہے اب انصاف ملےگا۔

    یہ بھی پڑھیں:  ملائیشیا: سفاک ملزمان نے معمولی جھگڑے پر دو پاکستانیوں کے ہاتھ کاٹ دیئے

    انھوں نے کہا کہ بچوں کو جلد واپس لانا چاہتی ہوں، حکومت میرے بیٹوں کو پاکستان لانے کے لیے اقدامات کرے، طاہر نے میرے دونوں بیٹے اپنی پہلی بیوی کو ملائیشیا میں دے رکھے ہیں۔

    خیال رہے کہ اقرا رواں برس مارچ میں چیف جسٹس پاکستان اور آرمی چیف سے بھی بچوں کو واپس لانے کی اپیل کر چکی ہیں۔

  • جو سب سے زیادہ شور مچا رہا ہے اسے معلوم ہے کچھ دن میں جیل جائے گا، وزیر اعظم

    جو سب سے زیادہ شور مچا رہا ہے اسے معلوم ہے کچھ دن میں جیل جائے گا، وزیر اعظم

    کوالالمپور : وزیر اعظم عمران خان نے ملائشیا میں پاکستانی کمیونٹی سے خطاب کرتے ہوئے کہا ہے کہ آج بڑا عظیم دن ہے، حضوراکرم نے دنیا کی پہلی فلاحی ریاست بنائی۔

    تفصیلات کے مطابق وزیر اعظم عمران خان نے دوراہ ملائشیا کے دوران دارالحکومت کوالالمپور میں پاکستانی کمیونٹی سے خطاب کرتے ہوئے کہا ہے کہ بیرون ملک سے پاکستانی زر مبادلہ بھیجتے ہیں جس سے ملک چلتا ہے۔

    وزیر اعظم عمران خان کا کہنا تھا کہ اپوزیشن تو پہلے دن سے لگی ہے کسی طرح پی ٹی آئی کی حکومت گر جائے، ان سب کو معلوم ہوچکا ہے انہیں تھوڑی دیر بعد جیلوں میں جانا ہے، اس لیے یہ جمہوریت بچانے کے لئے جمع ہو رہے ہیں، جو سب سے زیادہ شور مچا رہا ہے اسے معلوم ہے کچھ دن میں جیل جائے گا۔

    وزیر اعظم عمران خان نے تقریب کے انعقاد پر سفارت کار کو خراج تحسین پیش کرتے ہوئے کہا ہے کہ ملائیشیا میں پاکستانی سفارت کار نے جنون سمجھ کر کام کیا۔

    وزیر اعظم کا کہنا تھا کہ مثبت امیج اجاگر کرنے پر بیرون ملک پاکستانیوں کو خراج تحسین پیش کرتا ہوں، میرے دورے کے لئے پاکستانیوں کا ہوم ورک اور محنت نظر آئی۔

    عمران خان نے تقریب سے خطاب کرتے ہوئے کہا ماضی میں پاکستان کی مثالیں دی جاتی تھیں، ملک تیزی سے ترقی کر رہا تھا، لیکن ماضی میں اوورسیز پاکستانیوں کو ملک میں سہولتیں فراہم نہیں کرسکے۔

    وزیر اعظم کا کہنا تھا کہ جو قومیں اپنی غلطیوں کو ٹھیک نہیں کرتی وہ تباہ ہوجاتی ہیں، ملائیشیا کی خوش قسمتی ہے کہ انہیں مہاتیر محمد جیسا لیڈر ملا، ملائیشیا کو دیکھتا ہوں تو سوچتا ہوں ملائیشیا کہاں ہے اور ہم کہاں ہیں۔

    عمران خان نے ملائشین وزیر اعظم مہاتیر محمد کی تعریف کرتے ہوئے کہا کہ ملائیشیا کے وزیراعظم نے اپنے ملک کو ذاتی مفاد پر ترجیح دی، ملائیشیا میں کرپشن کا خاتمہ کیا گیا، جنہوں نے کرپشن کی وہ آج جیل میں ہیں۔

    وزیر اعظم عمران خان کا کہنا تھا کہ بد قسمتی سے ہم نے پاکستان کے وسائل پر توجہ نہیں دی، پاکستان میں ملائیشیا سے زیادہ وسائل ہیں بد قسمتی سے انھیں استعمال نہیں کیا گیا۔

    وزیراعظم عمران خان کا کہنا تھا کہ آج بڑا عظیم دن ہے، حضور اکرم ﷺ نے دنیا کی پہلی فلاحی ریاست بنائی، مدینہ کی ریاست کے لئے سب سے پہلے انسانیت کو سامنے رکھا گیا۔

    عمران خان نے پاکستانی کمیونٹی سے گفتگو کرتے ہوئے کہا کہ حضور اکرم ﷺ نے عوام کو بتایا آپ کے اندر احساس ہونا چاہیے۔ وسائل بڑی بات نہیں، ایک معذور بھی سمجھتا تھا کہ میں اس ریاست کا حصہ ہوں اور قوم کھڑی ہوگئی۔

    وزیر اعظم عمران خان کا کہنا تھا کہ پاکستان کو معاشی مسائل سے نکالنے کے لئے 4 بڑے اقدامات کرنا ہوں گے، منی لانڈرنگ کا راستہ روکنے کے لئے اقدامات کر رہے ہیں۔

    پاکستانی وزیر اعظم کا کہنا تھا کہ غیر قانونی راستے سے ترسیلات زر بھیجنے کے اقدامات ختم کریں گے، بیرون ملک سے آنے والے پاکستانی سرمایہ کاروں کو سہولتیں دیں گے، ایک سرمایہ کاری بورڈ بنائیں گے جو پاکستانی سرمایہ کاروں کو سہولت دے گا۔

  • پاکستان اور ملائیشیا کے درمیان ویزوں کے جزوی خاتمے کا معاہدہ

    پاکستان اور ملائیشیا کے درمیان ویزوں کے جزوی خاتمے کا معاہدہ

    کوالالمپور: پاکستان اور ملائیشیا کے درمیان ویزوں کے جزوی خاتمے کا معاہدہ طے پایا گیا جبکہ دونوں ممالک نے مستقبل میں مذاکرات کا سلسلہ جاری رکھنے پراتفاق کیا ہے۔

    تفصیلات کے مطابق وزیراعظم عمران خان کے دورہ ملائیشیا کا مشترکہ اعلامیہ جاری کردیا گیا جس کے مطابق دونوں ممالک کے وزرائے اعظم کے درمیان دوطرفہ، علاقائی اور بین الاقوامی امور پر تبادلہ خیال ہوا۔

    مشترکہ اعلامیے کے مطابق دونوں ممالک کے درمیان ویزوں کے جزوی خاتمے کا معاہدہ ہوا جس کے نتیجے میں دو طرفہ تعلقات میں بہتری آئی گی جبکہ آئندہ سال اسلام آباد میں پاکستان، ملائیشیا مشاورتی اجلاس کے انعقاد پر اتفاق کیا گیا جبکہ اقتصادی تعاون، تجارت، اور سرمایہ کاری کی ضرورت پرزور دیا گیا۔

    اعلامیے میں کہا گیا کہ مہاتیر محمد نے توانائی بحران پرقابو پانے کے لیے پاکستان سے تعاون کے عزم کا اظہار کیا جبکہ وزیراعظم عمران خان نے ایل این جی، پن بجلی اور قابل تجدید توانائی میں ملائیشیا کے تعاون کا خیرمقدم کیا۔

    مہاتیر محمد اورمجھےعوام نے کرپشن کے خلاف ووٹ دیا‘ وزیراعظم عمران خان

    مشترکہ اعلامیے کے مطابق پاکستان نے ملائیشین کمپنیوں کو خصوصی اقتصادی زون میں سرمایہ کاری کی دعوت دی جبکہ دونوں ممالک کا دفاعی تعاون کے لیے مفاہمت کی یادداشت کا اعادہ کیا گیا۔

    اعلامیے میں عمران خان اور مہاتیرمحمد نے مسلم امہ کے مضبوط اتحاد، دونوں ممالک کا مسلم امہ کو درپیش مسائل کے حل کے لیے مشترکہ کوششوں پر اتفاق کیا گیا جبکہ ملائیشیا نے دہشت گردی کے خاتمے کے لیے پاکستان کی کامیاب کوششوں کو سراہا۔

    مشترکہ اعلامیے کے مطابق مقبوضہ کشمیر میں انسانی حقوق کی خلاف ورزیوں سے مہاتیر محمد کو آگاہ کیا گیا اور مسئلہ کشمیر کو اجاگر کرنے کے لیے اوآئی سی کا کردار بھی زیرغور آیا۔

    اعلامیے میں تعلیم، سیاحت، عوامی روابط، سماجی واقتصادی ترقی کے شعبوں میں تعاون، حلال مصنوعات کے شعبے میں ایک دوسرے کے تجربات سے سیکھنے پر اتفاق کیا گیا۔

  • وزیر اعظم عمران خان 2 روزہ سرکاری دورے پر ملائیشیا روانہ

    وزیر اعظم عمران خان 2 روزہ سرکاری دورے پر ملائیشیا روانہ

    اسلام آباد: وزیر اعظم عمران خان دو روزہ سرکاری دورے پر ملائیشیا روانہ ہوگئے، وزیر اعظم ملایشیئن ہم منصب ڈاکٹر مہاتیر محمد کی خصوصی دعوت پر دورہ کررہے ہیں۔

    تفصیلات کے مطابق وزیر اعظم عمران خان دو روزہ سرکاری دورے پر ملائیشیا روانہ ہوگئے۔ وزیر خارجہ شاہ محمود قریشی، وزیر اطلاعات فواد چوہدری اور وزیر خزانہ اسد عمر بھی وزیر اعظم کے ہمراہ ہیں۔

    وزیر اعظم ملایشیئن ہم منصب ڈاکٹر مہاتیر محمد کی خصوصی دعوت پر دورہ کررہے ہیں۔ دورہ کے دوران وزیر اعظم عمران خان ملایشیئن ہم منصب اور اعلیٰ حکام سے ملاقاتیں کریں گے، وہ ملائیشیا میں بزنس کمیونٹی اور سرمایہ کاروں کے وفود سے بھی ملاقات کریں گے۔

    یاد رہے کہ 2 روز قبل وزیر اعظم عمران خان نے متحدہ عرب امارات کا بھی ایک روزہ دورہ کیا تھا۔ اس موقع پر ان کے ہمراہ آرمی چیف آف اسٹاف جنرل قمر جاوید باجوہ، وزیر خزانہ اسد عمر، وفاقی وزیر پیٹرولیم غلام سرور، وزیر برائے توانائی اور مشیر تجارت رزاق داؤد جبکہ یو اے ای میں پہلے سے موجود وفاقی وزیر خارجہ شاہ محمود بھی شامل تھے۔

    وزیر اعظم عمران خان کی ولی عہد شیخ محمد بن زید بن سلطان النہیان سے ملاقات صدارتی محل میں ہوئی جس میں باہمی امور اور خطے کی صورتحال پر تفصیلی تبادلہ خیال اور دو طرفہ تجارت سمیت معیشت کی بہتری کے معاملات پر بات چیت ہوئی۔

    اعلامیے میں کہا گیا تھا کہ دونوں مملک نے دہشت گردی کے خلاف مشترکہ لائحہ عمل اپنانے کا فیصلہ کرتے ہوئے اسے جڑ سے اکھاڑ پھینکنے کے ہنگامی اقدامات شروع کرنے پر اتفاق کیا ہے جبکہ دونوں ممالک کے درمیان وائٹ کالر کرائم پر قابو پانے کا بھی معاہدہ طے پایا۔

    علاوہ ازیں ڈرگ، انسانی اسمگلنگ اور منی لانڈرنگ کی روک تھام کے لیے ہنگامی اقدامات پر بھی اتفاق کیا گیا۔

  • وزیر خارجہ سے ملائیشین ہائی کمشنر کی ملاقات

    وزیر خارجہ سے ملائیشین ہائی کمشنر کی ملاقات

    اسلام آباد: وزیر خارجہ شاہ محمود قریشی سے ملائیشیا کے ہائی کمشنر کی ملاقات ہوئی جس میں تجارت، سرمایہ کاری اور عوامی روابط کو وسعت دینے پر تبادلہ خیال کیا گیا۔

    تفصیلات کے مطابق ترجمان دفتر خارجہ نے سماجی رابطے کی ویب سائٹ ٹویٹر پر ٹویٹ کرتے ہوئے بتایا کہ وزیر خارجہ شاہ محمود قریشی سے ملائیشیا کے ہائی کمشنر کی ملاقات ہوئی۔

    ملاقات میں دونوں کے درمیان تجارت، سرمایہ کاری اور عوامی روابط کو وسعت دینے پر تبادلہ خیال کیا گیا۔ ملاقات میں وزیر اعظم عمران خان کے متوقع دورہ ملائیشیا سے متعلق بھی گفتگو ہوئی۔

    اس موقع پر وزیر خارجہ شاہ محمود قریشی کا کہنا تھا کہ پاکستان کے ملائیشیا سے گہرے تعلقات ہیں، پاکستان ان تعلقات میں مزید اضافے کا خواہاں ہے۔

    انہوں نے کہا کہ ہماری دوستی مشترکہ عقائد، ورثے اور تاریخ پر مبنی ہے۔

    خیال رہے کہ وزیر اعظم عمران خان 20 نومبر سے ملائیشیا کا دورہ کریں گے اور ملائیشین ہم منصب مہاتیر محمد کی دعوت پر 2 روز تک قیام کریں گے۔

    ذرائع کے مطابق اپنے دورہ ملائیشیا کے دوران وزیر اعظم خان ملائیشین ہم منصب سمیت اعلیٰ حکام سے ملاقاتیں گے۔

    وزیر اعظم اپنے ہم منصب مہاتیر محمد سے ملاقات میں اقتصادی تعاون کے فروغ پر تبادلہ خیال کریں گے جبکہ ملائیشیا کی ترقی کے تجربات سے استفاده پر بات چیت بھی کریں گے۔

    وزیر اعظم کے ہمراہ وزیر خارجہ شاہ محمود قریشی، وزیر اطلاعات فواد چوہدری اور مشیر تجارت عبد الرزاق داؤد سمیت دیگر حکام بھی ملائیشیا جائیں گے۔

  • وزیر اعظم عمران خان کے دورہ ملائیشیا کا شیڈول تیار

    وزیر اعظم عمران خان کے دورہ ملائیشیا کا شیڈول تیار

    اسلام آباد: وزیر اعظم عمران خان کے دورہ ملائیشیا کا شیڈول تیار کرلیا گیا جس کے مطابق وزیر اعظم عمران خان 20 نومبر کو ملائیشیا پہنچیں گے اور ملائیشین ہم منصب مہاتیر محمد سے ملاقات کریں گے۔

    تفصیلات کے مطابق وزیر اعظم عمران خان کے دورہ ملائیشیا کا شیڈول تیار کرلیا گیا۔ وزیر اعظم عمران خان 20 نومبر سے ملائیشیا کا دورہ کریں گے اور ملائیشین ہم منصب مہاتیر محمد کی دعوت پر 2 روز تک قیام کریں گے۔

    ذرائع کا کہنا ہے کہ وزیر اعظم خان ملائیشین ہم منصب سمیت اعلیٰ حکام سے ملاقاتیں گے۔ وزیر اعظم اپنے ہم منصب مہاتیر محمد سے ملاقات میں اقتصادی تعاون کے فروغ پر تبادلہ خیال کریں گے جبکہ ملائیشیا کی ترقی کے تجربات سے استفاده پر بات چیت بھی کریں گے۔

    ذرائع کے مطابق وزیر اعظم کو ملائیشیا میں ترقی کے تیز ترین ماڈل پر بریفنگ دی جائے گی۔

    وزیر اعظم کے ہمراہ وزیر خارجہ شاہ محمود قریشی، وزیر اطلاعات فواد چوہدری اور مشیر تجارت عبد الرزاق داؤد سمیت دیگر حکام بھی ملائیشیا جائیں گے۔

    اس سے قبل وزیر اعظم کو 28 اکتوبر کو ملائشیا کے دورے پر روانہ ہونا تھا، بعد ازاں دورہ ملائیشیا کی تاریخ تبدیل کردی گئی تھی۔

    خیال رہے کہ وزیر اعظم عمران خان اب تک 2 بار سعودی عرب اور چین کا دورہ کرچکے ہیں۔

    اس سے قبل اپنے 5 روزہ دورہ چین میں وزیر اعظم نے چینی صدر شی جن پنگ کے علاوہ دیگر اعلیٰ عہدیداروں سے ملاقاتیں کیں اور ملکی معیشت پر تبادلہ خیال کیا۔ اس دوران 15 معاہدوں اور یاداشتوں پر بھی دستخط کیے۔

    اس سے قبل دورہ سعودی عرب میں دوست ملک نے پاکستان کو مشکل وقت سے نمٹنے کے لیے بڑا پیکج دے کر تحریک انصاف حکومت پر اعتماد کا اظہار کیا تھا اور پاکستان کے لیے 12 ارب ڈالر کے ریلیف پیکج کا اعلان کیا تھا۔

    پیکج کے مطابق پاکستان کو 3 ارب ڈالر ایڈونس دیے جائیں گے، تین ارب ڈالر کا ادھار تیل تین سال تک دیا جائے گا جبکہ بیلنس آف پیمنٹ کے لیے ایک سال تک تین ارب ڈالر بھی پاکستان کے اکاؤنٹ میں رکھے جائیں گے۔

  • ملائیشیا: سزائے موت ختم کرنے کا اعلان

    ملائیشیا: سزائے موت ختم کرنے کا اعلان

    کوالا لمپور: ملائیشیا کی حکومت نے سزائے موت ختم کرنے کا اعلان کردیا جس کے بعد پارلیمنٹ میں قانون کی منظوری تک تمام قیدیوں کی سزائے موت پر عملدرآمد روک دیا گیا ہے۔

    غیرملکی خبررساں ادارے کے مطابق ملائیشیا کے وزیر قانون داتوک لیووونی نے کہا ہے کہ سزائے موت پر پابندی کے لیے قانون اسمبلی میں پیش کرنے کا فیصلہ کیا ہے، 15 اکتوبر کو ہونے والے پارلیمانی اجلاس میں یہ بل پیش کردیا جائے گا۔

    سزائے موت ختم کرنے کے اعلان کے بعد تمام قیدیوں کی سزائے موت پر عملدرآمد روک دیا گیا ہے ان کے لیے دیگر مناسب سزائیں کرائی جائیں گی جن میں زیادہ سے زیادہ سزا عمر قید ہوگی۔

    واضح رہے کہ ملائیشیا میں قتل، اغوا، ملک سے بغاوت اور منشیات فروشی کی خریدوفروخت کے جرائم میں سزائے موت کا قانون ہے تاہم اب حکومت کسی بھی طرح کے جرم میں سزائے موت کا قانون ختم کردے گی اور ان کی جگہ دوسری سزائیں دی جائیں گی۔

    حال ہی میں ایک آسٹریلوی خاتون کو بھی منشیات کی اسمگلنگ میں سزائے موت سنائی گئی تھی اور ملائیشیا پر آسٹریلوی خاتون کو معاف کرنے اور رہائی کے لیے آسٹریلوی حکومت سمیت انسانی حقوق کی متعدد تنظیموں کا دباؤ ہے۔

    یاد رہے کہ ملائیشیا میں 1200 افراد کو موت کی سزا سنائی گئی ہے قانون اسمبلی میں منظور ہونے کے بعد ان کی سزاؤں کا تعین کیا جائے گا۔

    ملائیشیا میں سوئیڈن کے سفیر نے ملائیشیا کی حکومت کے اس اقدام کو سراہتے ہوئے کہا ہے کہ ملائیشیا کی حکومت نے ایک مثال قائم کی ہے جبکہ ایمنسٹی انٹرنیشنل نے بھی ملائیشیا کی حکومت کے فیصلے کو مثبت قرار دیا ہے۔

  • مسلمان ممالک میں جمہوری نظام کو مضبوط بنانے پر توجہ دینی چاہیے: مہاتیرمحمد

    مسلمان ممالک میں جمہوری نظام کو مضبوط بنانے پر توجہ دینی چاہیے: مہاتیرمحمد

    مانچسٹر: ملائیشیا کے وزیر اعظم مہاتیر محمد نے کہا ہے کہ مسلمان ممالک میں جمہوری نظام کو مضبوط بنانے پر توجہ دینی چاہیے، اس نظام میں حکمران جوابدہ ہوتا ہے۔

    ان خیالات کا اظہار انہوں نے آکسفورڈ یونیورسٹی کے اسلامک سینٹر میں خطاب کرتے ہوئے کیا، مہاتیر محمد کا کہنا تھا کہ جمہوری نظام میں حکمران عوام کو جوابدہ ہوتا ہے۔

    انہوں نے کہا کہ مثبت تبدیلی کے لیے مائنڈ سیٹ کی تبدیلی ضروری ہے، ریاست کی ترقی حکمران کی قابلیت اور دیانتداری سے مشروط ہے۔

    ملائیشیائی وزیر اعظم کا کہنا تھا کہ جمہوری ثمرات عوام تک پہنچانے کے لیے قابلیت ودیانتداری ضروری ہے، عدم برداشت اور ٹانگ کھینچنے کا کلچر آمریت کی راہ ہموار کرتا ہے۔

    ملائیشیا کے انتخابات میں مہاتیرمحمد کی تاریخی فتح پرعمران خان کی مبارکباد

    خیال رہے کہ رواں سال مئی میں ملائیشیا کے عام انتخابات میں مہاتیرمحمد اور ان کی اتحادی جماعت نے واضح کامیابی حاصل کی تھی، جس کے بعد مہاتیر محمد ملک کے نئے وزیر اعظم بنے اور حکمراں جماعت کے اقتدار کا 60 سالہ دور ختم ہوا۔

    مہاتیرمحمد اور ان کے اتحادیوں نے انتخابات میں 155 نشتیں حاصل کی تھیں، جبکہ حکومت بنانے کے لیے222 اراکین کے ایوان میں 112 نشتوں کی ضرورت ہوتی ہے۔

    یاد رہے کہ 92 سالہ مہاتیرمحمد نے سیاست سے کنارہ کشی اختیار کی ہوئی تھی تاہم 2016 میں انہوں نے یہ فیصلہ تبدیل کرتے ہوئے ملائیشین یونائیٹڈ انڈیجنس پارٹی قائم کی تھی۔

  • بدعنوانی کا مقدمہ: ملائیشیا کے سابق وزیراعظم گرفتار، فرد جرم عائد ہونے کا امکان

    بدعنوانی کا مقدمہ: ملائیشیا کے سابق وزیراعظم گرفتار، فرد جرم عائد ہونے کا امکان

    کوالالمپور: بدعنوانی کے مقدمے میں ملوث ملائیشیا کے سابق وزیر اعظم نجیب رزاق کو گرفتار کرلیا گیا، ان پر فرد جرم عائد کی جائے گی۔

    تفصیلات کے مطابق ملائیشیا کے سابق وزیراعظم نجیب زراق کو کرپشن کیس میں گرفتار کیا گیا ہے، انہیں آج عدالت میں پیش کیا جائے گا جہاں ان پر فرد جرم عائد ہوسکتی ہے۔

    غیر ملکی خبر رساں ادارے کے مطابق رزاق پر ملکی خزانے سے تقریباً 628 ملین ڈاکر کے کرپشن کا الزام ہے جس کے تحت انہیں مقدمے کا سامنا ہے۔

    ملائیشیا کے سابق وزیر اعظم پر طاقت کے ناجائز استعمال سميت رقوم کی ہيرا پھيری کے 7 مختلف مقدمات کا بھی سامنا ہے، انہیں آج 20 ستمبر بروز جمعرات کو عدالت ميں پيش کيا جائے گا۔

    اس سے قبل ملائیشیا کے سابق وزیر اعظم نجیب رزاق کو رواں سال 3 جون کو کرپشن کے الزام میں گرفتار کیا گیا تھا، بعد ازاں رہائی مل گئی تھی۔

    کرپشن کے الزامات، ملائیشیا کے سابق وزیر اعظم نجیب رزاق گرفتار

    خیال رہے کہ مہاتیر محمد نے منصبِ وزارت عظمیٰ سنبھالتے ہی نجیب رزاق کے خلاف مبینہ کرپشن کے الزامات کی تفتیش کرانے کا حکم جاری کیا تھا۔

    اس دوران اُن کی رہائش گاہ کے علاوہ مختلف ٹھکانوں پر پولیس نے چھاپے مار کر کئی قیمتی اشیاء اپنے قبضے میں لے لی تھیں، تاہم اب عدالت کی جانب سے ان پر فرد جرم عائد کی جائے گی۔

    خیال ہے کہ نجیب رزاق کے خلاف چھاپوں کے دوران 273 ملین ڈالرز برآمد کیے گئے تھے، جن میں 12 ہزار سے زائد زیورات، 423 مہنگی گھڑیاں، مشہور برانڈ کے 234 چشمے اور 567 ہینڈ بیگز ہیں جو سابق وزیر اعظم اور ان کی اہلیہ روسماء منصور کے زیر استعمال تھے۔