واشنگٹن : سڑک پر ہارن بجنے سے تنگ آکر ڈرائیور نے دوسری گاڑی کے شیشے پر کلہاڑی سے حملہ کردیا اور فرار ہوگیا۔
امریکی شہر واشنگٹن میں ہونے والے تشدد کے ایک خوفناک واقعے نے شہریوں کو خوفزدہ کردیا، سوشل میڈیا پر تشدد کی ویڈیو وائرل ہوگئی۔
ویڈیو میں دیکھا جاسکتا ہے کہ ایک شخص شدید غصے کے عالم میں اپنی گاڑی سے نکلتا ہے اور ایک بڑی سی کلہاڑی پیچھے کھڑی دوسری گاڑی کے شیشے زور سے پھینکتا ہے۔
یہ خوفناک واقعہ 27 جولائی کو کنگ کاؤنٹی انٹراسٹیٹ پر اس وقت پیش آیا جب ایک جیپ کے ڈرائیور نے دوسری گاڑی کو اوورٹیک کرنے کیلئے ہارن بجانا شروع کیا جب وہ ہائی وے جا رہے تھے۔
غیر ملکی خبر رساں ادارے کی رپورٹ کے مطابق متاثرہ شخص نے جیپ سے بچنے کے لیے مبینہ طور پر متبادل راستہ اختیار کیا لیکن دوسری گاڑی کے ڈرائیور نے غصے میں آکر اپنی گاڑی سے سڑک بلاک کردی۔
ڈرائیور غصے سے اترا تو اس کے ہاتھ میں ایک کلہاڑی تھی جسے اس نے پوری طاقت سے پیچھے والی گاڑی پر دے مارا تاہم اس سے کوئی جانی نقصان یا کسی کے زخمی ہونے کی اطلاع نہیں ہے۔
واقعے کے بعد مذکورہ ڈرائیور فرار ہونے میں کامیاب ہوگیا، یہ منظر پیچھے گاڑی میں موجود ڈرائیور نے اپنے موبائل فون میں ریکارڈ کرلیا، جو سوشل میڈیا پر خوب وائرل ہورہا ہے۔