کراچی: سابق صوبائی وزیر میاں زاہد حسین نے کہا ہے کہ شہرقائد کے شہریوں کو روزانہ ایک ارب روپے کی سبزی اور فروٹ فراہم کرنے والی منڈی کو جدید خطوط پر استوار کیا جائے۔
اپنے ایک بیان میں پاکستان بزنس مین اینڈ انٹلیکچولز فورم وآل کراچی انڈسٹریل الائنس کے صدر میاں زاہد حیسن کا کہنا تھا کہ کراچی کی نئی سبزی منڈی کو جدید خطوط پر استوار کیا جائے اور وہاں کاروبار کرنے والوں کو مکمل سیکورٹی اور دیگر سہولیات فراہم کی جائیں۔
انہوں نے کہا کہ نئی سبزی منڈی کو بنے ہوئے بارہ سال سے زیادہ ہو گئے ہیں مگر نہ تو سیکورٹی کا مناسب انتظام ہے، نہ دیگر سہولیات موجود ہیں اور نہ ہی ہنگامی صورتحال سے نمٹنے کے لئے مناسب ساز و سامان مہیا کیا گیا ہے۔
ان کا کہنا تھا کہ کرا چی کے شہریوں کو روزانہ ایک ارب روپے کی سبزی اور فروٹ فراہم کرنے اور لاکھوں لوگوں کو روزگار فراہم کرنے والی سبزی اور فروٹ منڈی میں پانی، بجلی، گیس، سیوریج اور صفائی کے نظام کو بہتر بنانا اور تجاوزات کا خاتمہ ضروری ہے۔
سابق وزیر نے مزید کہا کہ 2013 کی آتشزدگی میں تاجروں کا بھاری مالی نقصان ہوا تھا مگر اس کے باوجود آگ بجھانے کے انتظامات غیر تسلی بخش ہیں، منڈی میں دگر گوں حالات اور رشوت ستانی کے سبب کاروباری لاگت بڑھ جاتی ہے جس کی قیمت عوام کو ادا کرنا پڑتی ہے۔
