اسلام آباد: حکومت نے سو دہشتگردوں کے سرکی قیمت مقرر کردی، سرفہرست ملافضل اللہ اور منگل باغ ہیں ، جن کے سر کی قیمت ایک ایک کروڑ روپےمقرر کی گئی ہے۔
دہشتگردوں کی سرکوبی کیلئے ملک بھر میں مختلف اقدامات اٹھائے جارہے ہیں، وہیں مطلوب دہشتگردوں کی فہرستیں بھی بنالی گئی ہیں ۔ حکومت کی جانب سے دہشتگردوں کے سروں کی قیمت لگا کر نئی فہرست جاری کردی گئی۔
فہرست میں سو دہشتگردوں کے نام شامل ہیں، دہشتگردی کے ایک سو اناسی مقدمات میں مطلوب کالعدم تحریکِ طالبان کے سربراہ ملافضل اللہ کے سر کی قیمت ایک کروڑ روپےمقرر کی گئی ہے جبکہ کالعدم لشکرِ اسلام کے منگل باغ کے سر کا انعام بھی ایک کروڑ روپے مقرر کیا گیا ہے۔
اس سے قبل پاکستان میں پہلی بار چھ سو پندرہ دہشتگردوں کی تصاویر پر مشتمل البمز بھی جاری کئے جا چکے ہیں۔
اس سے قبل خیبر پختونخواہ حکومت نے ملا فضل اللہ اور منگل باغ سمیت چھ سو پندرہ دہشت گردوں کی سروں کی قیمت مقرر کی تھی۔
خیبر پختونخوا حکومت نے بھی تحریکِ طالبان پاکستان کے امیر ملا فضل اللہ کے سر کی قیمت ایک کروڑ روپے مقرر کی تھی جبکہ صوبائی حکومت نے ملا فضل اللہ کو زندہ یا مردہ پکڑنے میں مدد فراہم کرنے والے کو ایک کروڑ روپے انعام دیا جائے گا۔
