فیض پور : پاکستان مسلم لیگ کی چیف آرگنائزر مریم نواز نے کہا ہے کہ آج عمران خان چوہے کی طرح ڈر کربل میں بیٹھا ہے، انہوں نے سابق چیف جسٹس ثاقب نثار پر بھی تنقید کرتے ہوئے کہا کہ ڈیم والے بابا کو آئینہ دکھارہی ہوں۔
فیض پور میں مسلم لیگ ن کے ورکرز کنونشن سے خطاب کرتے ہوئے انہوں نے کہا کہ عمران خان آج ٹی وی پر رو رو کر کہتا ہے کہ مریم نواز کو جلسے کرنے کی آزادی ہے، کیا مریم نواز کو آزادی عمران خان نے پلیٹ میں رکھ کردی تھی؟ وہ منہ پرہاتھ پھیرکر کہتا تھا کہ ان لوگوں کو چھوڑوں گا نہیں، آج عمران خان چوہے کی طرح ڈر کر بل میں بیٹھا ہے، کل عمران خان کو لاہور نے مسترد کیا ہے۔
مریم نواز نے چیئرمین پی ٹی آئی عمران خان کی جانب سے گرفتاری نہ دینے پر نواز شریف کی مثال دیتے ہوئے کہا کہ نواز شریف نے کبھی کارکنان کو ڈھال نہیں بنایا، وہ اپنی بیٹی کا ہاتھ پکڑ کر لندن سے گرفتاری دینے پاکستان آیا۔
انہوں نے کہا کہ نوازشریف پر جتنا بھی کڑا وقت آیا ایک دن بھی گھبرا کر چھپا نہیں، مریم نواز نے کارکنان سے پوچھا کہ کیا نوازشریف نے کبھی کہا کہ میں بیمار ہوں اور میری جان کوخطرہ ہے؟ جس پر کارکنان نے کہا کہ کبھی نہیں۔
اپنے خطاب میں مریم نواز نے کہا کہ قوموں کی زندگی میں مشکل وقت آتے رہتے ہیں، لیڈر کی زندگی میں مشکل وقت آتے رہتے ہیں، جو ڈرکر چارپائی کے نیچے چھپ جائے اس کو عمران خان کہتے ہیں، پوچھتی ہوں چوری نہیں کی تو تلاشی کیوں نہیں دیتے، جس نے چوری نہیں کی ہوتی تلاشی بھی دیتا ہے اور بیٹی کا حساب بھی دیتا ہے۔
عمران خان کہتا ہے کہ اس کی جان کوخطرہ ہے اور شام کو ریلی میں نکل جاتا ہے، یہ جان کو کیسا خطرہ ہے کہ عدالت بلاتی ہے تو پیش نہیں ہوتا اور ریلی میں نکل جاتا ہے اور کہتا ہے کہ معذور ہوں میری ٹانگ پر پلاسٹرچڑھا ہوا ہے، میرا باپ ایسا ہوتا تو میں شرم کے مارے کسی کو منہ نہ دکھاتی۔
سابق چیف جسٹس کے حالیہ بیان پر انہوں نے کہا کہ ثاقب نثار کہتے ہیں کہ مریم نواز بدتمیزاور بےادب ہے، ڈیم والے بابا کو کہتی ہوں کہ مریم نواز کی تربیت نوازشریف اور کلثوم نواز نے کی ہے، انہوں نے کہا کہ مریم نواز ڈیم والے بابا کو آئینہ دکھارہی ہے، انصاف کے دو معیار ہوں گے تو مریم نواز کبھی خاموش نہیں بیٹھے گی۔
عام انتخابات کے حوالے سے مریم نواز کا کہنا تھا کہ ہم الیکشن لڑنے کیلئے پوری طرح سے تیار ہیں ن لیگ الیکشن لڑنے کیلئے بلکہ جیتنے کیلئے میدان میں اترچکی ہے، ہم بھاری اکثریت سے کامیاب ہوں گے۔
ان کا مزید کہنا تھا کہ جب تک نوازشریف کے ساتھ انصاف نہیں ہوگا ن لیگ ایسا الیکشن کبھی نہیں چاہے گی، نوازشریف ابھی بھی سزائیں بھگت رہاہے اور مجرم عمران خان دندناتا پھررہا ہے،
ایسےحالات میں الیکشن نہیں ہوں گے پہلے ترازو کے دونوں پلڑے برابرکرو، بےشک پھر صبح الیکشن کرادو۔
