اسلام آباد : وفاقی وزیراطلاعات مریم اورنگزیب نے کہا ہے کہ نو مئی کی منصوبہ بندی کرنے والا خود پوچھ رہا ہے کہ فائدہ کس کو ہوا؟
اسلام آباد میں پریس کانفرنس سے خطاب کرتے ہوئے ان کا کہنا تھا کہ جس شخص نے اپنے کارکنوں کو ایجنسی کے لوگ قرار دیا وہ پوچھتا ہے نو مئی کا فائدہ کس کو ہوا؟
انہوں نے کہا کہ گرفتاری کا وارنٹ ملا تو آپ نے حملہ کرنے کا حکم دیا، آپ پاکستانی سیاست کے واحد شخص ہو جس نے ہر جرم کیا ہے، آپ قوم کے مجرم اور گھڑی چور ہو، ملک میں نفرت پھیلانے کے مجرم ہو۔
ان کو سیاسی طور پر گرفتار کرنا ہوتا تو 12 اپریل کے بعد ہی گرفتار کرلیتے، ہم نے تحقیقات کرائیں کیسز کی اور پھر کارروائی کی گئی کیونکہ نومئی کا ماسٹر مائنڈ یہ فارن ایجنٹ ہے، تحریک انصاف پر پابندی لگی تو ذمہ دار اس جماعت کا سربراہ ہوگا۔
وفاقی وزیراطلاعات نے کہا کہ جس شخص نے ملکی معیشت تباہ کی اس کا آج کوئی ترجمان نہیں۔ صرف ٹوئٹر ہینڈل ان کے ترجمان بنے ہوئے ہیں، اسی فارن ایجنٹ نے اپنے ٹوئٹ میں کچھ سوالات اٹھائے ہیں۔
مریم اورنگزیب کا کہنا تھا کہ بیرون ملک میں سابق وزیراعظم کے پراکسیز موجود ہیں، کوئی بھی شخص اس فتنے کیلئے سامنے لانے کو تیار نہیں، ان کے ایسے بیانات سے کوئی دہشت گردی کا واقعہ ہوا تو ذمہ دار یہ فارن ایجنٹ ہوگا۔ اس فارن ایجنٹ کو ہٹانے کا فائدہ پاکستان کو ہوا ہے، چیئرمین پی ٹی آئی کو پتہ ہے کہ اس نے غیرقانونی فنڈنگ لی ہے۔
مریم اورنگزیب نے کہا کہ 9مئی کے واقعات کا فائدہ پاکستان کے دشمن کو ہوا ہے، یہ شخص جھوٹا اور ذہنی مریض ہے یہ لاعلاج ہے، پاگل ہمیشہ کہتا ہے میں پاگل نہیں ہوں اور یہی مسئلہ اس کا ہے، اداروں کیخلاف سوشل میڈیا پر مہم چلائی جارہی ہے۔
انہوں نے چیئرمین پی ٹی آئی کو مخاطب کرتے ہوئے کہا کہ توشہ خانہ، فارن فنڈنگ کیس ،190ملین کے جوابات ہیں تو عدالتوں میں دو، یہ کہتا ہے اسٹیبلشمنٹ اور میرے درمیان شہباز شریف دوریاں پیدا کررہا ہے جبکہ تم نے شہداء کی یادگاروں کو نقصان پہنچایا، جناح ہاؤس پر حملہ کیا، ریڈیو پاکستان جلا دیا۔
دوسروں کو چور کہنے والے لوگ آج نواز شریف کی اچھائی کی گواہیاں دے رہے ہیں، ملک سے باہر بیٹھا فسادی ٹولہ اداروں کے خلاف مہم جوئی کرتا ہے۔
مولانا فضل الرحمان آج وزیراعظم سے ملاقات کر رہے ہیں، وزیراعظم کہہ چکے ہیں کہ حکومت کی آئینی مدت کے خاتمے کے بعد عام انتخابات کی طرف جائیں گے۔
