رمضان المبارک میں سعودی عرب میں حرمین شریفین امور کی جنرل اتھارٹی کی جانب سے مسجد الحرام کے کچھ دروازے اور ایکسکلیٹرز عمرہ زائرین کے لیے مخصوص کردیئے ہیں۔
غیر ملکی ذرائع ابلاغ کے مطابق اتھارٹی کی جانب سے باب ملک فہد، باب العمرہ، باب ملک عبدالعزیز، اور باب السلام عمرہ زائرین کے لیے مختص کیا ہے۔
اس کے علاوہ عمرہ زائرین دروازہ نمبر 88 کے علاوہ 85 سے 93 تک کسی بھی دروازے سے مسجد الحرام میں داخل ہونے کی سعادت حاصل کرسکتے ہیں، جبکہ اجیاد، شبیکہ اور ملک فہد ایکسکلیٹرز بھی عمرہ زائرین کے لیے مخصوص ہیں۔
عمرہ زائرین اگر مسجد الحرام کی پہلی منزل تک جانے کا ارادہ رکھتے ہیں تو باب ملک فہد کی لفٹ کے علاوہ شبیکہ اور عثمان پل کو استعمال میں لا سکتے ہیں۔
دوسری منزل پر الارقم ایکسکلیٹر، باب العمرہ، اجیاد اور المروہ لفٹس کے ذریعے جانا ممکن ہوگا، جبکہ چھت معذور عمرہ زائرین کے لیے مخصوص ہوگی۔
دوسری جانب سعودی وزارت حج کا کہنا ہے کہ رمضان المبارک میں عمرہ کی ادائیگی کے لیے پیشگی پرمٹ حاصل کیا جائے۔
وزات حج کا کہنا ہے کہ رمضان میں عمرہ ادائیگی کو آسان بنانے کے لیے پرمٹ کا سلسلہ بحال رکھا ہے، پیشگی عمرہ پرمٹ حصول کا مقصد عمرہ زائرین کو سہولت فراہم کرنا ہے۔
وزارت کا کہنا ہے کہ مملکت کے مختلف شہروں سے آنے والے عمرہ زائرین کو چاہئے کہ جب پرمٹ کے لیے ’نسک‘ پورٹل پربکنگ کریں تو اس بات کا خاص خیال رکھیں کہ ایسے اوقات کا انتخاب کیا جائے جب مسجد الحرام میں ازدحام نہ ہو۔
شاہی مہمانوں کا چوتھا گروپ عمرہ ادا کرنے کیلئے مدینہ پہنچ گیا
زائرین کو چاہئے کہ پرمٹ کے اجرا کے دوران ایسے وقت کا انتخاب کریں جب ازدحام زیادہ نہ ہو۔ پرمٹ حاصل کرنے کے بعد مقررہ وقت کی پابندی کریں۔
