مستونگ میں انسدادِ پولیو مہم کے دوران فائرنگ کا واقعہ پیش آیا ہے جس کے نیتجے میں 2 اہلکار شہید ہوگئے۔
تفصیلات کے مطابق مستونگ میں نامعلوم افراد کی فائرنگ سے دو اہلکار شہید ہوگئے، شہید اہلکار انسداد پولیو ٹیم کی سیکیورٹی پر مامور تھے۔
پولیس حکام کے مطابق واقعہ مستونگ کے علاقے تیری میں پیش آیا، جہاں پولیس اہلکار انسداد پولیو ٹیم کی سیکیورٹی کے فرائض انجام دے رہے تھے کہ نامعلوم مسلح موٹر سائیکل سواروں کی جانب سے فائرنگ کی گئی۔
پولیس کا کہنا ہے کہ شہدا میں نیک محمد اور مقصود احمد شامل ہیں، واقعے کے بعد سیکیورٹی فورسز نے علاقے کی ناکہ بندی کر کے ملزمان کی تلاش شروع کر دی ہے۔
پاکستان اور افغانستان کا بیک وقت انسداد پولیو مہم چلانے کا فیصلہ
دوسری جانب وزیراعظم شہباز شریف نے مستونگ میں انسداد پولیو مہم کی ٹیم پر اس دہشتگرد حملے کی شدید مذمت کی ہے۔
وزیراعظم نے حملے میں سیکیورٹی پر مامور لیویز اہلکاروں کی شہادت پر افسوس کا اظہار کرتے ہوئے شہدا کیلئے دعائے مغفرت اور لواحقین کے لیے صبر و استقامت کی دعا کی ہے۔
شہباز شریف نے کہا کہ انسانیت کے دشمن دہشتگردوں کو کیفر کردار تک پہنچائیں گے، ایسے واقعات پولیو کے مکمل خاتمے کے عزم میں کوئی کمی نہیں لاسکتے۔
انہوں نے کہا کہ عوام مایوس نہ ہوں اپنے بچوں کو پولیو سے بچاؤ کے قطرے پلا کر مستقبل محفوظ بنائیں، انسداد پولیو مہم ہر صورت میں مکمل تحریک کے ساتھ جاری رہے گی۔
