ARYNews.tv | Urdu – Har Lamha Bakhabar

Tag: match

  • کھیل کے دوران دل کا دورہ پڑنے سے کھلاڑی کی موت

    کھیل کے دوران دل کا دورہ پڑنے سے کھلاڑی کی موت

    نئی دہلی: بھارت میں ایک بیڈ منٹن میچ کے دوران کھلاڑی دل کا دورہ پڑنے سے انتقال کر گیا، کھلاڑی کو اسپتال منتقل کیا گیا جہاں ڈاکٹرز نے اس کی موت کی تصدیق کردی۔

    بھارتی میڈیا کے مطابق حیدر آباد میں منگل کی شام کو ایک مقامی اسٹیڈیم میں بیڈ منٹن کھیلتے ہوئے دل کا دورہ پڑنے سے ایک کھلاڑی کی موت ہوگئی۔

    38 سالہ کھلاڑی ساتھیوں کے ساتھ بیڈ منٹن کھیل رہا تھا کہ اچانک زمین پر گر گیا او وہیں اس نے اپنی آخری سانسیں لیں۔

    ساتھیوں کی جانب سے اسے فوراً اسپتال لے جایا گیا جہاں ڈاکٹروں نے اس کی موت کی تصدیق کرتے ہوئے کہا کہ وہ دل کا دورہ پڑنے کی وجہ سے پہلے ہی انتقال کرچکا تھا۔

    بھارتی میڈیا کے مطابق متوفی کی شناخت شیام یادو کے نام سے ہوئی ہے جو روزانہ آفس کے بعد اپنے دوستوں کے ساتھ بیڈ منٹن کھیلنے جاتا تھا۔

  • ارجنٹینا فٹبال ورلڈ کپ کی تیاری ابو ظہبی میں کرے گا

    ارجنٹینا فٹبال ورلڈ کپ کی تیاری ابو ظہبی میں کرے گا

    رواں برس قطر میں کھیلے جانے والے ورلڈ کپ کی تیاری کے لیے ارجنٹینا کی فٹبال ٹیم ابو ظہبی میں قیام کرے گی اور دوستانہ میچ کھیلے گی۔

    بین الاقوامی ویب سائٹ کے مطابق ارجنٹینا فٹبال ایسوسی ایشن اور ابو ظہبی اسپورٹس کونسل کے درمیان اسٹریٹجک تعاون معاہدہ کے بعد ارجنٹینا کی فٹبال ٹیم اس سال قطر میں کھیلے جانے والے ورلڈ کپ کی تیاری کے لیے ابو ظہبی میں قیام کرے گی۔

    2 بار ورلڈ کپ فٹ بال جیتنے والی ارجنٹینا کی ٹیم اپنی تیاریوں کے لیے ابو ظہبی میں دوستانہ میچ کھیلے گی۔

    ارجنٹینا کے سپر اسٹار لیونل میسی کے لیے ٹرافی جیتنے کا یہ آخری موقع ہوگا کیونکہ وہ ٹورنامنٹ شروع ہونے تک 35 سال کے ہو جائیں گے۔

    ابو ظہبی اسپورٹس کونسل کی جانب سے جاری کردہ ایک بیان کے مطابق مشترکہ کام کے کئی مہینوں کے تبادلے کے بعد ابو ظہبی اسپورٹس کونسل نے ارجنٹینا فٹ بال ایسوسی ایشن کے ساتھ مل کر ایک طویل معاہدے کو مضبوط کیا ہے۔

    بیان میں مزید کہا گیا ہے کہ ابو ظہبی 2022 کے ورلڈ کپ کے لیے ارجنٹینا کی قومی ٹیم کی تیاری کے کیمپ کی میزبانی کرے گا جس میں نومبر میں دوستانہ میچ بھی شامل ہوں گے۔

    ارجنٹینا کے متحدہ عرب امارات کے ساتھ تعاون کے ایک حصے کے طور پر ابو ظہبی میں سپر کوپا ارجنٹینا فائنلز 2023 سے 2026 تک مسلسل 4 سال تک کھیلے جائیں گے۔

    ارجنٹینا فٹ بال ایسوسی ایشن لاطینی امریکا کی پہلی فیڈریشن بن گئی ہے جس نے مشرق وسطیٰ کے خطے میں اعلی عالمی اثر والے کھیلوں کے ایونٹ کو برآمد کیا۔

    ارجنٹینا کو گروپ سی میں رکھا گیا ہے جو 22 نومبر کو سعودی عرب کے خلاف اپنی مہم کا آغاز کرے گا، اس کے بعد وہ 26 نومبر کو میکسیکو کا سامنا کرے گا اور 30 نومبر کو پولینڈ کے خلاف کھیلے گا۔

    یاد رہے کہ فٹ بال کا عالمی کپ رواں برس 21 نومبر سے 18 دسمبر تک قطر میں کھیلا جائے گا۔

  • کرکٹ میچ کے دوران کھلاڑی جان کی بازی ہار گیا

    کرکٹ میچ کے دوران کھلاڑی جان کی بازی ہار گیا

    نئی دہلی: بھارت میں مقامی سطح پر کھیلے جانے والے ایک میچ کے دوران 27 سالہ کرکٹر جان کی بازی ہار گیا، کھلاڑی گیند لینے کے لیے جھکا تو گر گیا اور دوبارہ نہ اٹھ سکا۔

    بھارتی میڈیا کے مطابق افسوسناک واقعہ ریاست حیدر آباد میں پیش آیا، 27 سالہ للت کمار ساکن بینک کا ملازم تھا اور اکثر مقامی سطح پر کھیلے جانے والے کرکٹ میچز میں حصہ لیا کرتا تھا۔

    اتوار کے روز کرکٹ گراؤنڈ میں کرکٹ کھیلتے وقت وہ گیند کو پکڑنے کے لیے جھکا تو نیچے گر گیا اور دوبارہ نہیں اٹھا۔

    دیگر کھلاڑیوں نے اسے فوری طور پر قریبی اسپتال منتقل کیا، وہاں پر ڈاکٹروں نے اس کا معائنہ کیا اور مردہ قرار دے دیا۔ پولیس نے مقدمہ درج کرتے ہوئے کارروائی کا آغاز کردیا۔

    یاد رہے کہ اس سے قبل اڑیسہ میں بھی اسی نوعیت کا واقعہ پیش آچکا ہے جب دوران میچ 18 سالہ کرکٹر دل کا دورہ پڑنے سے زندگی کی بازی ہار گیا۔

    ستیا جیت پردھان نمای کرکٹر کو اس وقت دل کا دورہ پڑا جب وہ نان اسٹرائیک اینڈ سے سنگل رن لینے کے لیے بھاگے اور وکٹ کے درمیان میں پہنچ کر گرگئے۔

    ستیا جیت کو فوری طور پر مقامی اسپتال پہنچایا گیا جہاں ڈاکٹرز نے ان کی موت کی تصدیق کردی۔ ڈاکٹرز کے مطابق کرکٹ کی موت اچانک دل کا دورہ پڑنے سے ہوئی۔

  • اسٹار فٹبالر کرسٹیانو رونالڈو چھاگئے

    اسٹار فٹبالر کرسٹیانو رونالڈو چھاگئے

    چگلیارا: اٹالین سیریا اے میں اسٹار فٹبالر کرسٹیانو رونالڈو چھاگئے۔ رونالڈو نے سیریا اے میں اپنی پہلی ہیٹ ٹرک اسکور کی اور شاندار پرفارمنس کی بدولت حریف ٹیم کو 4 صفر سے آؤٹ کلاس کردیا۔

    تفصیلات کے مطابق کرسٹیانو رونالڈو نے ایلینز اسٹیڈیم میں کمال کردیا۔ کیگلیری کے خلاف رونالڈو نے اٹلین سیریا اے میں پہلی ہیٹ ٹرک اسکور کی۔ رونالڈو کے کیریئر کی یہ چھپنویں ہیٹ ٹرک ہے۔

    یووینٹس کی ٹیم پورے میچ میں چھائی رہی۔ رہی سہی کسر ہیگوائن کے گول نے پوری کردی۔

    کرسٹیانو کی شاندار پرفارمنس کے باعث یووینٹس نے 4-0 سےکامیابی سمیٹی۔ ایک اور میچ میں انٹرمیلان اور نپولی کی ٹیمیں مدمقابل آئیں۔ لوکاکو کے 2 گول کی بدولت انٹرمیلان نے 3-1 سے فتح حاصل کرلی۔

    خیال رہے کہ گزشتہ سال نومبر میں بھی لیتھوینیا کے خلاف کرسٹیانو رونالڈو نے ہیٹ ٹرک کی تھی۔

  • انڈر19 کرکٹ ٹیم کے کپتان ورلڈکپ جیتنے کیلئے پرعزم

    انڈر19 کرکٹ ٹیم کے کپتان ورلڈکپ جیتنے کیلئے پرعزم

    لاہور: قومی انڈر19 کرکٹ ٹیم کے کپتان روحیل نذیر کا کہنا ہے کہ ورلڈکپ 2020 میں جنوبی افریقہ کی کنڈیشنز پر اچھا کھیل پیش کرکے ٹائٹل اپنے نام کریں گے۔

    تفصیلات کے مطابق قومی انڈر19 کرکٹ ٹیم کے کپتان روحیل نذیر نے ورلڈکپ جیتنے کے عزم کا اظہار کردیا۔ اپنے ایک بیان میں ان کا کہنا تھا کہ کھلاڑی پرجوش ہیں، عمدہ کھیل پیش کرکے ٹائٹل کی جنگ لڑیں گے۔

    انہوں نے سینئرکھلاڑی عماد وسیم کی تعریف کرتے ہوئے کہا کہ مجھے پرفارم کرتا دیکھ کر عماد وسیم بہت خوش ہوتے ہیں، اور متعدد بار تعریف بھی کی۔ جبکہ احمد شہزاد کو کھیلتا دیکھ کر خوشی ہوتی ہے۔

    واضح رہے کہ آئی سی سی انڈر 19 کرکٹ ورلڈکپ 17 جنوری سے جنوبی افریقہ میں شروع ہوگا۔

    دوسری جانب سینئر کھلاڑی انڈر19 ٹیم کو بھرپور سپورٹ کررہے ہیں۔ جبکہ نیشنل کرکٹ اکیڈمی میں ملاقاتوں کا سلسلہ بھی جاری ہے۔ گزشتہ روز سرفرار احمد نے ٹیم سے ملاقات کی اور جیت کے لیے مفید مشورے دیے۔

    جبکہ آج ہیڈکوچ مصباح الحق اور بولنگ کوچ وقار یونس نے کھلاڑیوں کو ٹپس دیں اور جیت کے گر بتائے۔

  • انڈر 19 ورلڈ کپ: قومی ٹیم 19 جنوری کو اسکاٹ لینڈ سے ٹکرائے گی

    انڈر 19 ورلڈ کپ: قومی ٹیم 19 جنوری کو اسکاٹ لینڈ سے ٹکرائے گی

    لاہور: آئی سی سی انڈر 19 کرکٹ ورلڈکپ 2020 اگلے ماہ جنوبی افریقہ میں شروع ہوگا، قومی ٹیم اپنے پہلے میچ میں 19 جنوری کو اسکاٹ لینڈ سے ٹکرائے گی۔

    تفصیلات کے مطابق آئی سی سی انڈر 19 کرکٹ ورلڈکپ 17 جنوری سے جنوبی افریقہ میں شروع ہوگا جو 9فروری تک جاری رہے گا، 24 روز تک جاری رہنے والے ایونٹ میں 16 ممالک کی ٹیمیں شرکت کریں گی۔

    آئندہ سال 17 جنوری سے شروع ہونے والے ایونٹ کا فائنل بینونی کے جے پی مارک اوول میں کھیلا جائے گا۔

    ایونٹ کے فاتح کا فیصلہ9 فروری کو ہوگا، ایونٹ میں پاکستان کا پہلا میچ 19جنوری کوسکاٹ لینڈ کے خلاف پوچیف اسٹروم میں کھیلاجائے گا، قومی انڈر 19 کرکٹ ٹیم ایونٹ میں اپنا دوسرا میچ 22 جنوری کو زمباوے کے خلاف بلوم فاؤنٹین میں کھیلے گی۔

    گروپ مرحلے میں پاکستان کا آخری میچ بنگلہ دیش کے خلاف ہوگا۔ دونوں ٹیمیں 24 جنوری کو جے پی مارک اوول میں مدمقابل آئیں گی۔ ہر گروپ سے 2 بہترین ٹیمیں سپر لیگ مرحلے میں رسائی حاصل کریں گی۔

    جبکہ باقی تمام ٹیمیں پلیٹ چمپئن شپ کے لیے نبردآزمائی کریں گی۔ ایونٹ میں سپر لیگ مرحلے کا آغاز 28 جنوری کو ہوگا۔ سپر لیگ مرحلے کے اختتام پر 4 ٹاپ ٹیمیں سیمی فائنل کے لیے کوالیفائی کریں گی۔

  • ایشیئن کراٹے چیمپئن شپ میں ثابت ہوگیا پاکستان کسی سے پیچھے نہیں: علی زیدی

    ایشیئن کراٹے چیمپئن شپ میں ثابت ہوگیا پاکستان کسی سے پیچھے نہیں: علی زیدی

    کراچی: وفاقی وزیر برائے بحری امور علی زیدی کا کہنا ہے کہ پاکستانی کراٹے کاز ٹیم نے ثابت کردیا پاکستان ہر شعبے بالخصوص کھیل وتفریح میں بھی کسی سے پیچھے نہیں ہے۔

    تفصیلات کے مطابق علی زیدی نے یورو ایشیا چیمپئن شپ میں دوسری پوزیشن حاصل کرنے والی پاکستانی کراٹے کاز ٹیم سے کے پی ٹی آفس میں ملاقات کی، ملاقات میں رکن سندھ اسمبلی راجہ اظہر اور مولوی محمود بھی موجود تھے۔

    اس موقع پر وفاقی وزیر علی زیدی نے کھلاڑیوں کو کامیابی پر مبارکباد دی اور نوجوانوں کی کارکردگی کو سراہا علی زیدی کی جانب سے کھلاڑیوں میں تحفے و انعامات بھی دیے گئے۔

    ساؤتھ ایشیا گیمز میں 3 گولڈ میڈلسٹ کراٹے کاز کا ائیر پورٹ پرشان دار استقبال

    علی زیدی نے کہا کہ کھلاڑی راجہ عامر، شفقت، عمر فاروق اور کوچ راجہ آصف قوم کا فخر ہیں، 22 ممالک سے مقابلہ کرکے پاکستانی کراٹے کاز ٹیم نے ثابت کیا کہ پاکستان ہر شعبہ و تفریحی کھیل میں کسی سے پیچھے نہیں، نوجوانوں کی کوششوں و کاوشوں کی حوصلہ افزائی کرنا بے حد ضروری ہے۔

    ان کا کہنا تھا کہ پاکستان کا نوجوان ہی پاکستان کی مضبوط بنیاد ہے۔ وفاقی وزیر نے پاکستانی ٹیم کے ساتھ ورلڈ چمپئن شپ میں تعاون کرنے کی یقین دہانی کروائی۔ اس موقع پر رکن سندھ اسمبلی راجہ اظہر نے کہا کہ وفاقی وزیر علی زیدی کا کھلاڑیوں کی حوصلہ افزائی کرنے کے لیے شکریہ ادا کرتے ہیں۔

    ان کا مزید کہنا تھا کہ کھلاڑیوں نے غیر ملکی سرزرمین پر پاکستان کا جھنڈا لہرایا ملک کو قوم کی دعاؤں کے نتیجے میں کھلاڑیوں نے وطن کا پرچم سر بلند کیا، متوسط طبقے سے تعلق رکھنے والے نوجوان ملک کا سرمایہ ہیں۔

  • قائداعظم ٹرافی کا سہرا کس کے سر سجےگا؟ فیصلہ کن مرحلہ

    قائداعظم ٹرافی کا سہرا کس کے سر سجےگا؟ فیصلہ کن مرحلہ

    کراچی: قائد اعظم ٹرافی کافائنل کل سے نیشنل اسٹیڈیم کراچی میں شروع ہوگا، فائنل میں سینٹرل پنجاب اور ناردرن ایریاز کی ٹیمیں مد مقابل آئیں گی۔

    تفصیلات کے مطابق کل سے کھیلے جانے والے قائداعظم ٹرافی کے فائنل سے قبل دونوں ٹیموں کےکپتان نے مزار قائد پر حاضری دی اور ٹرافی کے ہمراہ فوٹوسیشن بھی کروایا۔

    قائداعظم ٹرافی کا سہرا کس کے سر سجےگا؟ فیصلے کی گھڑی قریب آگئی، سینٹرل پنجاب اور ناردرن ایریاز کا فائنل جمعہ سے نیشنل اسٹیڈیم کراچی میں شروع ہوگا، بابراعظم کی قیادت میں سینٹرل پنجاب کی ٹیم تجربےکار ہے جس کے باعث ان کا پلڑا بھاری ہے، کامران اکمل آٹھ سوپینسٹھ اور سلمان بٹ آٹھ سوستائیس رنز بنا کر ٹاپ اسکورر ہیں۔

    قائد اعظم ٹرافی، سرفراز احمد پہلی سنچری بنانے میں کامیاب

    ظفرگوہر اور بلال آصف کی گھومتی گیندیں نادرن ایریاز کے لیے مشکلات کھڑی کرسکتی ہیں، ناردرن کی ٹیم نوجوان لیکن باصلاحیت ہے، ناردرن کے کپتان نعمان علی ایونٹ میں سب سے زیادہ وکٹیں لے چکے ہیں۔

    بیٹنگ میں ذیشان ملک اور فیضان ریاض پر سب کی نظریں ہوں گی، فائنل سے قبل دونوں ٹیموں کے کپتانوں نے مزارقائد پرحاضری دی اور فاتحہ خوانی بھی کی، ملک کے سب سے بڑے فرسٹ کلاس کرکٹ ٹورنامنٹ قائد اعظم ٹرافی کا 5 روزہ فائنل 27 دسمبر سے نیشنل سٹیڈیم، کراچی میں شروع ہو رہا ہے جہاں پوائنٹس ٹیبل پر پہلے نمبر کی ٹیم سینٹرل پنجاب کا مقابلہ ناردن کے ساتھ ہے۔

  • شاندار فتح کے بعد قومی ٹیم کی ٹیسٹ چیمپئن شپ میں پوزیشن بہتر

    شاندار فتح کے بعد قومی ٹیم کی ٹیسٹ چیمپئن شپ میں پوزیشن بہتر

    کراچی: پاکستان کی سری لنکا کے خلاف ہوم سیریز میں فتح نے ٹیسٹ چیمپئن شپ میں پوزیشن بہتر کردی، قومی ٹیم نے 80 پوائنٹس کے ساتھ ٹیبل پر تیسرا نمبر حاصل کرلیا۔

    تفصیلات کے مطابق ٹیسٹ چیمپئن شپ کی پوائنٹس ٹیبل پر شاہینوں کی پوزیشن بہتر ہوگئی، ڈرا ہونے والے پنڈی ٹیسٹ سے ملے 20 پوائنٹس جبکہ کراچی ٹیسٹ کی جیت نے 60 پوائنٹس دیے۔

    پاکستان ٹیم 80 پوائنٹس کے ساتھ تیسری پوزیشن پر پہنچ گئی، قومی ٹیم نے اب تک ٹیسٹ چیمپئن شپ میں 4 ٹیسٹ کھیلے، 2 ہارے، 1 ڈرا اور ایک جیتے، پوائنٹس ٹیبل پر 216 پوائنٹس کے ساتھ آسٹریلوی ٹیم کی دوسری پوزیشن ہے جبکہ 360 پوائنٹس کے ساتھ بھارتی ٹیم پہلے نمبر پر براجمان ہے۔

    پاکستان محفوظ ملک ہے، سیکیورٹی بھی بہت اچھی ہے: کپتان سری لنکن ٹیم

    واضح رہے کہ پاکستان نے 13 سال بعد ہوم گراؤنڈ پر ٹیسٹ میچ اپنے نام کیا، قومی ٹیم نے سری لنکا کو کراچی ٹیسٹ میں 263 رنز سے شکست دی، سری لنکا کے خلاف دوسرے ٹیسٹ میچ میں قومی ٹیم کے بولرز اور بلے باز دونوں چل گئے۔

    سری لنکا کی بیٹنگ لائن ریت کی دیوار ثابت ہوئی، پاکستانی بولرز نے کسی کھلاڑی کو کریز پر ٹکنے نہیں دیا اور فتح اپنے نام کی، قومی ٹیم کی اس شاندار فتح کے بعد ٹیسٹ رینکنگ میں بھی پاکستان کی پوزیشن مستحکم ہوگئی ہے۔

  • پاکستان محفوظ ملک ہے، سیکیورٹی بھی بہت اچھی ہے: کپتان سری لنکن ٹیم

    پاکستان محفوظ ملک ہے، سیکیورٹی بھی بہت اچھی ہے: کپتان سری لنکن ٹیم

    کراچی: سری لنکن ٹیم کے کپتان کرونارتنے کا کہنا ہے کہ پاکستان محفوظ ملک ہے اور سیکیورٹی بھی بہت اچھی ہے، یہاں ہمیں گھر جیسا ماحول ملا۔

    تفصیلات کے مطابق قومی ٹیم کے ہاتھوں دوسرے ٹیسٹ میچ میں شکست کے بعد میڈیا سے گفتگو کرتے ہوئے سری لنکن ٹیم کے کپتان کا کہنا تھا کہ پہلے 2دن اچھا کھیلا پھر ہم اچھا کھیل پیش نہ کرسکے، پاکستان ٹیم سے عابد علی نے شاندار بیٹنگ کا مظاہرہ کیا، ہمیں معلوم تھا کہ انہیں رنز کی بھوک تھی۔

    انہوں نے کہا کہ دیگر ٹیمیں ٹیسٹ، ون ڈے اور ٹی20 کھیلنے یہاں آئیں، نسیم شاہ کم عمری میں بھی بہت میچور باؤلنگ کررہا تھا، بابراعظم بہت زبردست کرکٹر ہے، عابد علی بہت محنتی ہے، محنت اس کی بیٹنگ میں نظر آتی ہے۔

    ہمیں اس جیت کی بہت ضرورت تھی: کپتان اظہرعلی

    کرونارتنے کا کہنا تھا کہ ہمارے کرکٹرز میں تجربےکی کمی رہی، ٹیسٹ صبر وتحمل کا کھیل ہے۔

    دوسری جانب قومی کرکٹ ٹیم کے کپتان اظہر علی کا کومنٹیٹر سے گفتگو کرتے ہوئے کہنا تھا کہ میچ کے دوران پریشر نہیں لیا، بھروسہ تھا کہ اچھا کھیل کر فتح اپنے نام کریں گے، سنچری بنا کر بہت اچھا لگا، ہمیں اس جیت کی بہت ضرورت تھی، سری لنکا کی ٹیم کا بھی بےحدشکر گزار ہوں۔

    واضح رہے کہ پاکستان نے 13 سال بعد ہوم گراؤنڈ پر ٹیسٹ میچ اپنے نام کرلیا، قومی ٹیم نے سری لنکا کو کراچی ٹیسٹ میں 263 رنز سے شکست دے دی، سری لنکا کے خلاف دوسرے ٹیسٹ میچ میں قومی ٹیم کے بولرز اور بلے باز دونوں چل گئے، سری لنکا کی بیٹنگ لائن ریت کی دیوار ثابت ہوئی، پاکستانی بولرز نے کسی کھلاڑی کو کریز پر ٹکنے نہیں دیا اور فتح اپنے نام کرلی۔