Tag: Maulana Fazlur Rahman

پشاور: متحدہ مجلس عمل کے صدر مولانا فضل الرحمان نے کہا ہے ہم انتخابات میں کام یاب ہوکر پرچمِ اسلام بلند کریں گے، ہم اپنی شناخت دنیا کے سامنے لانا چاہتے ہیں۔

ان خیالات کا اظہار انھوں نے پشاور میں ایم ایم اے کے جلسے سے خطاب کرتے ہوئے کیا، ان کا کہنا تھا کہ ہماری آزادی ہم سے چھینی جا رہی ہے، ہم اپنی شناخت پوری دنیا کے سامنےلانا چاہتے ہیں۔

انھوں نے کہا کہ طیب اردوان ترکی کے صدر منتخب ہوئے میں ان کو مبارک باد دیتا ہوں، اسلامی دنیا پاکستان اور اہل پاکستان سے توقعات رکھتی ہے۔

مولانا فضل الرحمان نے کہا کہ آئندہ انتخابات میں متحدہ مجلس عمل کام یاب ہوگی، ملک میں حقیقی تبدیلی اسلامی قوانین کے نفاذ سے ہی آئے گی، انتخابات میں آپ نے ثابت کرنا ہے کہ بے حیائی کے ساتھ نہیں ہیں۔

انھوں نے اہلِ پشاور کو کام یاب اجتماع پر مبارک باد پیش کرتے ہوئے کہا کہ ہمیں دنیا کو بتانا ہے کہ ہم اپنی آزادی کی جنگ لڑنا جانتے ہیں، عالمی قوتیں ہمیں پھر سے اندھیرے میں دھکیلنا چاہتی ہیں۔

اللہ نے ہمیں موقع دیا تو پاکستان کی تقدیر بدل دیں گے، سراج الحق

مولانا فضل الرحمان کا کہنا تھا کہ جو لوگ ہمارے مقابلے میں ہیں وہ مغربی نظریہ رکھتے ہیں، ہم اپنی روایات اور حیا کا دفاع کرنا جانتے ہیں، ہمیں اپنی عزت کو بحال کرنا ہے، کوئی ہمارا نظریہ نہیں بدل سکتا۔

انھوں نے کہا کہ ملک اور صوبے کی معیشت تباہ ہو چکی ہے، ملک قرضوں کے بوجھ تلے دبا ہوا ہے، آج خیبر پختونخوا پر 3 سو ارب سے زیادہ کا قرضہ ہے، آپ لوگ ووٹ کو امانت سمجھ کر استعمال کریں۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔