وفاقی وزیر فواد چوہدری نے کہا ہے کہ اور قائداعظم کا مزار کسی کم ظرف سیاسی قیادت کے کھیل کا میدان نہیں ہے، علی زیدی کا کہنا تھا کہ ذمہ داران کو سخت سے سخت سزاہونی چاہیے۔
ن لیگ کی رہنما مریم نواز کے شوہر کیپٹن (ر) صفدر کی گرفتاری پر پی ٹی آئی کے رہنماؤں نے اپنے رد عمل میں پولیس کارروائی کی حمایت کی ہے، ان کا کہنا ہے کہ مزار قائد کی توہین کسی طور قابل قبول نہیں۔
سماجی رابطے کی ویب سائٹ ٹوئٹر پر اپنے پیغام میں وفاقی وزیر سائنس اینڈ ٹیکنالوجی فواد چوہدری کا کہنا تھا کہ سندھ پولیس کی جانب سے گرفتاری قانون کے احترام کا بیانیہ ہے۔
فواد چوہدری نے کہا کہ مزار قائد پر اٹھکیلیاں، نعرے بازی اور غیرسنجیدہ طرز عمل قانون کی سنگین خلاف ورزی ہے، قائداعظم کا مزار کم ظرف سیاسی قیادت کے کھیل کا میدان نہیں، مزارقائد ہر پاکستانی کے لئے مقدس جگہ ہے، اس غیرسنجیدہ طرزعمل پر سزا ہونی چاہئے۔
فواد چوہدری نے اے آر وائی نیوز سے گفتگو کرتے ہوئے کہا کہ مزارقائد پر کیپٹن ریٹارئرڈ صفدر کا طرز عمل انتہائی قابل اعتراض تھا، مزار قائد کے تقدس کی پامالی پر کارروائی لازمی تھی۔
انہوں نے کہا کہ اتنا وقت گزر گیا پر مریم نواز اور کیپٹن صفدر نے قوم سے معافی تک نہ مانگی، ان کو اپنے عمل پر کوئی افسوس ہی نہیں ہے، جب دیکھا کوئی شرمندگی ہی نہیں ہے تو پھرکارروائی ضروری کرنا ضروری ہے۔
وفاقی وزیر نے کہا کہ سندھ پولیس نے پیشہ ورانہ طرز عمل کا مظاہرہ کیا، پاکستان کا ہرسچا شہری اس کارروائی کی حمایت کرے گا، ان کا عمل قانونی اور اخلاقی دونوں طور پر قابل مذمت ہے۔
ایک سوال کے جواب میں فواد چوہردی نے کہا کہ مریم نواز خاتون ہیں ان کو کیا گرفتارکرنا، نعرے کیپٹن صفدر لگارہا تھا، کیپٹن صفدر مزار قائد پر نعرے لگا کرمریم کو بھی اکسا رہا تھا۔
انہوں نے کہا کہ کیپٹن صفدر کی گفتگو سے لگتا ہے ذہنی طورپر ہلے ہوئے ہیں، گرفتاری کے بعد لگےہاتھوں کیپٹن صفدر کا دماغی معائنہ بھی کیا جائے۔
دوسری جانب وفاقی وزیر پورٹ اینڈ شپنگ علی زیدی نے کہا کہ کیپٹن (ر)صفدرکی گرفتاری بالکل ٹھیک ہے کیونکہ مزار قائد پر ہلڑبازی ناقابل برداشت ہے، ان کوعدالت سے سخت سے سخت سزا ہونی چاہیے۔
انہوں نے اے آر وائی نیوز سے گفتگو کرتے ہوئے کہا کہ مزار قائد کے اندر نعرے لگانے اور تالیاں بجانے والوں کو کٹہرے میں لانا چاہیے، اگر یہ مانتے ہیں کہ مزار قائد پر جو ہوا غلط ہوا تومعافی مانگیں، معافی مانگنے کے لئے ان کے پاس سوشل میڈیا کا پلیٹ فارم موجود ہے۔
مزید پڑھیں : کراچی کے نجی ہوٹل سے کیپٹن (ر) صفدر گرفتار، تھانے منتقل
واضح رہے کہ مریم نواز کی مزار قائد پر حاضری کے موقع پر مزار کے احاطے میں کیپٹن (ر) صفدر نے سیاسی نعرے لگوائے تھے، ان کے اس عمل پر عوام اور حکومتی شخصیات کی جانب سے شدید مذمت کی گئی۔
پولیس نے آج صبح کارروائی کرتے ہوئے ایک نجی ہوٹل پر چھاپہ مارا اور مزار قائد کی بے حرمتی کے الزام میں ن لیگ کی نائب صدر مریم نواز کے شوہر اور پارٹی رہنما کیپٹن(ر) صفدرکو حراست میں لے لیا۔
