اسلام آباد : ترجمان دفتر خارجہ نفیس زکریا کا کہنا ہے کہ افغانستان کے ساتھ بارڈرمینجمنٹ ضروری ہے، بارڈرمینجمنٹ سے دہشتگردوں کی نقل وحمل روکنے میں مدد ملے گی۔
تفصیلات کے مطابق ترجمان دفتر خارجہ نفیس زکریا نے ہفتہ وار بریفنگ دیتے ہوئے کہا کہ پاکستان نے اپنی طرف سرحدی باڑلگانے کا سلسلہ شروع کیا ہے، بارڈر مینجمنٹ سے دہشتگردوں کی آمد ورفت روکنے میں مدد ملے گی، پاکستان اور چین افغانستان میں قیام امن کے لئے کوششیں کررہے ہیں، افغانستان سے بہتر تعلقات کے لئے وفود کے تبادلے کا خیر مقدم کرتے ہیں۔
ترجمان دفتر خارجہ کا کہنا تھا کہ امریکا کے ساتھ تعلقات کو اہمیت دیتے ہیں، نئی امریکی انتظامیہ کے ساتھ ملکر کام کرنے کو تیار ہیں اور دہشتگردی کے خلاف کارروائیاں پاکستان کے مفاد میں ہیں۔
نفیس زکریا نے کہا مقبوضہ کشمیرمیں بھارتی مظالم جاری ہیں، بھارتی افواج کی جانب سے پیلٹ گنز کا استعمال بھی جاری ہے، رواں ہفتے درجنوں افراد کو نشانہ بنایا، پاکستان کی جیت کا جشن منانے والوں کو گرفتار کیا گیا۔
انکا مزید کہنا تھا کہ انسانی حقوق کمیشن اپنی ٹیم مقبوضہ کشمیر بھیجے، بھارت نے حریت رہنماؤں کو مسلسل نظر بند رکھا ہے۔
