لاہور/ ملتان / بہاولنگر: پنجاب میں فارما انڈسٹری کی ہڑتال کے باعث میڈیکل اسٹور پر تالے پڑے ہوئے ہیں، مریضوں کے اہل خانہ ادویات کے لئے رل گئے، وزیر صحت کا کہنا ہے کہ کسی سے بلیک میل نہیں ہونگے، بعد ازاں لاہور دھماکے کے بعد دوا ساز کمپنیوں نے ہڑتال کی کال واپس لے کر کل سے کاروبار شروع کرنے کا اعلان کردیا۔
تفصیلات کے مطابق پنجاب کے مختلف شہروں لاہور ، ملتان بہاولنگر سمیت دیگر شہروں میں دوا ساز کمپنیوں کی ہڑتال کے باعث شہریوں کو شدید مشکلات کا سامنا کرنا پڑا۔ میڈیکل اسٹورز بند ہونے کی وجہ سے مریضوں کو ادویات نہ مل سکیں۔
کیمسٹ ایسوسی ایشن کی ہڑتال کے باعث لاہور کے میوسپتال کے باہرمیڈیکل اسٹوربند ہیں جبکہ میڈیکل سٹور پر ہڑتال کے بینرز لگادئیے گئے، چشتیاں میں بھی میڈیکل سٹور بند ہیں اوربازار میں ہی احتجاجی کیمپ شروع کردیا۔ادھرسندھ کے دوا سازوں اور دوا فروخت کرنے والوں نے بھی بحران میں کودنے کا فیصلہ کرلیا۔
کراچی میں پیر کو ہول سیل مارکیٹ اور ڈسٹری بیوشن بند رہیں۔لاہور میں دوا ئیں تیاراور فروخت کرنے والوں کی تنظیمیں ہڑتال کے معاملے پر2دھڑوں میں بٹ گئیں، پنجاب حکومت اور دوا ساز کمپنیوں کے تنازع میں مریض رل گئے۔
پنجاب میں سارا دن مریض دوائی کے لیے تڑپتے رہے اور لواحقین پریشان ہوتے رہے لیکن پنجاب حکومت اور دوا ساز کمپنیوں کے مالکان اپنی اپنی ضد پر اڑے رہے لاہور کے مختلف اسپتالوں میں زیرعلاج مریضوں کے لواحقین اپنے پیاروں کو تکلیف میں دیکھ کر دن بھر میڈیکل اسٹورز کے چکر لگاتے رہے پنجاب حکومت اپنی ضد پر اڑی ہے کہ جعلی ادویات بنانے والوں کے ہاتھوں بلیک میل نہیں ہونگے۔
صوبائی وزیر پرائمری ہیلتھ خواجہ عمران نذیر کا کہنا ہے کہ ترکی سمیت افغانستان سے ادویات منگوا لیں گے لیکن جعلی اور غیر معیاری ادویات بنانے کی اجازت نہیں دیں گے۔
یاد رہے کہ پنجاب اسمبلی نے8 فروری کوڈرگ ایکٹ 1976کا بل منظور کیا تھاجس کے تحت غیر معیاری دوا سازی پر6 ماہ سے 5 سال تک قید اور ایک کروڑ سے 5 کروڑ روپے تک جرمانہ، کوالیفائیڈ پرسن کے موجود نہ ہونے پر30 دن سے5 سال تک قید اور5 لاکھ سے 50 لاکھ روپے تک جرمانہ کیا جاسکے گا۔
ادھرسندھ میں بھی دوا ساز اور دوا فروخت کرنے والوں نے بحران میں کودنے کا فیصلہ کرلیا ہے۔ صدر ہول سیل کیمسٹ ایسوسی ایشن کے مطابق کراچی میں پیر کو ہول سیل مارکیٹ اور ڈسٹری بیوشن بند رہیں۔ ایسوسی ایشن کے رہنما سعید اللہ والا نے کہا کہ لاہورمیں سندھ کے بارے میں اہم فیصلے ہوں گے۔
تازہ ترین اطلاعات کے مطابق لاہو رمیں مال روڈ پر ہونے والے دوا ساز کمپنیوں کے مظاہرے کے دوران خود کش دھماکے کے بعد میڈیسن مارکیٹیں کھولنے کا اعلان کردیا گیا ہے۔
دوا ساز کمپنیوں نے ہڑتال کی کال واپس لے کر کل سے کاروبارمعمول کے مطابق شروع کرنےکی یقین دہانی کرادی ہے۔
