لاہور : چیئرمین سینیٹ صادق سنجرانی اور سابق وزیراعلیٰ پنجاب پرویز الہٰی کے درمیان گزشتہ روز ہونے والی ملاقات کا اندورنی احوال سامنے آگیا۔
اس حوالے سے ذرائع کا کہنا ہے کہ حکومت اور اپوزیشن کے درمیان بیک ڈور رابطوں کیلئے صادق سنجرانی اورپرویزالٰہی متحرک ہوگئے ہیں، پرویزالٰہی سے قبل صادق سنجرانی کی وزیراعظم شہباز شریف سے2 ملاقاتیں ہوئی ہیں۔
ذرائع کے مطابق دونوں جانب سے باقاعدہ مذاکرات کے لیے ماحول سازگار بنانے سمیت الیکشن اور دیگر معاملات پر درمیانی راستہ نکالنے کی کوششیں جاری ہیں۔
ذرائع کا کہنا ہے کہ چوہدری پرویزالٰہی صادق سنجرانی کا پیغام چیئرمین پی ٹی آئی عمران خان تک پہنچائیں گے، عمران خان آمادہ ہوئے تو بات آگے مزید بڑھائی جائے گی۔
یاد رہے کہ چوہدری پرویزالٰہی سے چیئرمین سینیٹ صادق سنجرانی نے ملاقات کی ہے، ملاقات میں موجودہ ملکی سیاسی صورتحال پر تبادلہ خیال کیا گیا، اس موقع پر سینیٹر پرنس احمد عمر احمد زئی، سینیٹر منظور احمد کاکڑ، سینیٹرعبدالقادر اور محمد نعمان خان بھی موجود تھے۔
اس موقع پر صادق سنجرانی کا کہنا تھا کہ پرویزالٰہی ایک منجھے ہوئے سیاستدان ہیں، انہیں ملکی استحکام اور ترقی کیلئے اپنا کردار ادا کرنا چاہیے۔
سابق وزیر اعلیٰ پنجاب اور مرکزی صدر پاکستان تحریک انصاف چوہدری پرویز الہٰی نے کہا کہ ملکی ترقی اور استحکام کیلئے ہمیشہ اپنا مثبت کردار ادا کیا اور کرتے رہیں گے۔
ان کا کہنا تھا کہ عمران خان کا آنے والی سیاست میں بڑا اہم کردار ہوگا، جس کی وجہ سے پاکستان کی معیشت میں استحکام آئے گا، اس کے علاوہ مستقبل میں عمران خان کی وجہ سے بین الاقوامی سطح پر بھی پاکستان اہم رول ادا کرتا نظر آئے گا۔
