میر پور ڈھاکہ: پاکستان اور بنگلہ دیش کے مابین ہونے والے واحد ٹی ٹونٹی میچ میں بنگلہ دیش نے پاکستان کو باآسانی سات وکٹوں سے شکست دیدی۔
پاکستان کرکٹ ٹیم رسوائی کی نئی کھائی میں جاگری۔ ون ڈے سیریز کے بعد بنگلادیش نے واحد ٹی ٹوئنٹی میچ میں بھی پاکستان کو سات وکٹ سے ہرادیا۔
ون ڈے سیریز میں عبرتناک شکست کے بعد بنگالی ٹائیگرز نے ٹی ٹونٹی میں بہترین پرفارمنس کا مظاہرہ کر کے شاہینوں کو کہیں کا نہ چھوڑا۔
آفریدی نے ٹاس جیتا لیکن میچ نہ جیت سکے۔ اوپنر نے ٹی ٹوئنٹی میچ میں پچاس رنز کا سست آغاز دیا۔ آفریدی کے چہیتے احمد شہزاد نے اکتیس گیندوں پر سترہ رنز کی ٹیسٹ اننگز کھیلی۔
بلے بازوں نے ون ڈے سیریز سے بھی سبق نہ سیکھا۔قومی ٹیم بیس اوورز میں پانچ وکٹ پر ایک سو اکتالیس رنز بناسکی، پاکستان کی جانب سے 142 رنز کے جواب میں بنگلہ دیش کی ٹیم نے مطلوبہ ہدف 16.2 اوورز میں تین کھلاڑیوں کے نقصان پر پورا کرلیا۔
تممیم اقبال نے پہلے ہی اوورز میں حفیظ کو چودہ رنز جڑ کر شاہینوں کے چھکے چھڑا دئیے، شکیب الحسن ستاون اور صابر الرحمان اکیاون رنز بنا کر ناٹ آؤٹ رہے، جبکہ تمیم اقبال چودہ اور مشفق الرحیم انیس رنز بنا کر آؤٹ ہوئے۔
پاکستان کی جانب سے عمر گل اور وہاب ریاض نے ایک ایک وکٹ لی۔ بنگال ٹائیگرز نے ہدف بائیس گیندیں قبل تین وکٹ پر حاصل کرکے ٹی ٹوئنٹی میچ بھی اپنے نام کرلیا۔
پاکستان ٹی ٹونٹی ٹیم کے کپتان شاہد آفریدی کا کہنا ہے کہ ہمیں بنگلہ دیش سے سیکھنا پڑے گا، مہمان ٹیم نے بہتر کھیل کا مظاہرہ کیا،بنگلہ دیش کو جیت پر مبارکباد پیش کرتا ہوں۔
