لاہور کی عدالت میں گلوکار علی ظفر کے میشا شفیع کے خلاف ہتک عزت کے دعوے پر سماعت ہوئی، گلوکارہ کی والدہ اداکارہ صباحمید پرجرح مکمل کرلی گئی۔
اس موقع پر گلوکارہ کے وکیل اسد جمال نے کہا کہ مارچ میں چالان جمع کرایا گیا، میشا شفیع اور ماہم جمال دونوں ملک سے باہر تھیں، دونوں ملک سے باہر تھیں مگر عدالت میں پیش ہوگئیں۔
عدالت نے پیشی کے لیے ضمانتی مچلکے جمع کرانے کا حکم دیا، گلوکارہ کے وکیل اسد جمال نے استدعا کی کہ عدالت مچلکے جمع کرانے کے حکم پر نظر ثانی کرے۔
وکیل کا کہنا تھا کہ میشا شفیع اپنے بچوں کے ساتھ کینیڈا میں مقیم ہیں، کورونا کی وجہ سے بھی وہ سفر نہیں کر پا رہی تھیں، گلوکارہ اور ماہم جمال نے واپس جانا ہے ہر بار پیش نہیں ہوسکتیں لہٰذا دونوں کوحاضری سے مستقل استثنیٰ دیا جائے۔
سماعت کے دوران گلوکارہ میشا شفیع کی والدہ صباحمید پرجرح مکمل کرلی گئی، علی ظفر کے وکیل نے صبا حمید سے پوچھا کہ کیا میشا شفیع کینیڈا کی شہری ہیں ؟آخری بار پاکستان کب آئیں؟
جس پر صبا حمید نے کہا کہ جی درست ہے ،آخری بار میشا ستمبر2020 میں پاکستان آئی تھی، وکیل نے کہا کہ کیا یہ درست ہے کہ فنکاروں کے درمیان حسد اور لڑائیاں ہوتی رہتی ہیں؟ تو صباحمید کا کہنا تھا کہ ہر ایک کا اپنا مقام ہے مگر ہوتی بھی ہوں گی مجھے پتہ نہیں۔
وکیل علی ظفر نے پوچھا کہ کیا آپ کا داماد بھی میوزک انڈسٹری سے وابستہ ہے، جس پر انہوں نے کہا کہ جی ہاں وہ بھی اسی میوزک انڈسٹری سے ہے۔
وکیل کا کہنا تھا کہ میوزک انڈسٹری میں فرہاد ہمایوں پر میوزک چوری کرنے کا الزام تھا، صبا حمید نے کہا کہ جی مجھے پتہ ہے اس کے خلاف بھی درخواست تھی۔
وکیل علی ظفر نے سوال کیا کہ کیا آپ ان خواتین کو جانتی ہیں جنہوں نے کہا کہ ان کو بھی ہراساں کیا گیا ؟ جس کے جواب میں صبا حمید نے کہا کہ ذاتی حیثیت میں نہیں جانتی مگر دوستوں سے ان کے بارے میں سنا ہے۔
ایک اور سوال کہ کیا یہ درست ہے کہ مختلف خواتین نے میشا شفیع کو ہراساں کیے جانے کا بتایا جس پر میشا شفیع کی والدہ نے کہا کہ مختلف خواتین نے میشا کو بتایا میں بھی اس موقع پر موجود تھی۔
وکیل علی ظفر کا کہنا تھا کہ مختلف خواتین کو ہراساں کیے جانے کا الزام لگایا گیا مگر کسی نے ابھی تک شناخت نہیں کیا، بعد ازاں عدالت نے کیس کی سماعت 16 دسمبر تک ملتوی کردی۔
