اسلام آباد : وزیراعظم عمران خان سے ایم کیوایم کے وفد نے ملاقات کی ، ملاقات میں وزیراعظم کا کہنا ہے کہ آئندہ ہفتے کراچی آرہا ہوں، کراچی کے حالات بہتر بنانا ہماری حکومت کی ترجیح ہے۔
تفصیلات کے مطابق وزیراعظم عمران خان سے ایم کیوایم کے وفد کی وزیراعظم آفس میں ملاقات ہوئی ، ملاقات میں ایم کیوایم وفد نے وزیراعظم کو عہدہ سنبھالنے پر مبارکباد دی۔
ملاقات کے دوران وزیراعظم کے معاون نعیم الحق اور گورنر سندھ نعیم الحق بھی موجود تھے جبکہ ایم کیو ایم کے وفد میں خالد مقبول صدیقی، ڈاکٹر فروغ نسیم، امین الحق، کنور نوید، نسرین جلیل اور وسیم اختر شامل ہیں۔
ملاقات میں صدارتی انتخاب کراچی اور حیدرآباد کی صورتحال پر تفصیلی تبادلہ خیال کیا گیا اور وزیراعظم نے مسائل کے حل کےلئے وفاقی حکومت کی طرف سے ہر ممکن تعاون کا یقین دلایا۔
اس موقع پر وزیراعظم نےتعاون کی یقین دہانی کراتےہوئےکہاکہ آئندہ ہفتے کراچی آرہا ہوں، کراچی کے حالات بہتر بنانا ہماری حکومت کی ترجیح ہے۔
مزید پڑھیں : ایم کیو ایم نے پی ٹی آئی کے ساتھ چلنے کے وعدے پر کئی شرائط رکھ دیے
خیال رہے کہ رواں ماہ کے آغاز میں متحدہ قومی موومنٹ(پاکستان) نے تحریک انصاف کے ساتھ چلنے کے وعدے پر کئی شرائط رکھی تھی، جن میں ایم کیو ایم نے کارکنوں کی بازیابی، ٹارگٹڈآپریشن بند کرنے پر زور، کراچی کے بارہ حلقے کھولنے جبکہ حیدرآباد میں یونیورسٹی کے قیام اور کوٹہ سسٹم کے خاتمے کے مطالبے پر زور دیا تھا۔
دوسری جانب گورنر سندھ عمران اسماعیل نے وزیراعظم سے ون آن ون ملاقات بھی کی، جس میں سندھ کی مجموعی صورتحال بالخصوص کراچی کے حوالے سے امور کا جائزہ لیا گیا۔
ملاقات میں وزیراعظم کا کہنا تھا کہ شہر قائد کے عوام کو درپیش مسائل کا مکمل ادراک ہے اور کراچی جیسے شہر میں بعض مقامات پر بنیادی سہولیات کا فقدان لمحہ فکریہ ہے۔
ان کا کہنا تھا کہ ملکی معیشت، ترقی اور استحکام میں کراچی کا کردار کلیدی ہے اور شہر قائد میں امن و امان کی فضا کو مزید بہتر بنانے کےلئے موجودہ حکومت ہر ممکن تعاون فراہم کرے گی۔
گورنر سندھ نے اہم ذمہ داریاں سونپنے پر وزیراعظم کا شکریہ ادا کیا۔
