اسلام آباد: وزیر اعظم عمران خان کی زیر صدارت اجلاس ہوا جس میں وزیر اعظم نے اداروں میں بہتری کے لیے فوری اقدامات کرنے کی ہدایت کی۔
تفصیلات کے مطابق وزیر اعظم عمران خان کی زیر صدارت اجلاس ہوا۔ اجلاس میں وفاقی وزرا اور پارٹی کی سینئر قیادت شریک ہوئی۔
اجلاس میں ملکی معاشی، سیاسی اور امن و امان کی صورتحال پر تبادلہ خیال ہوا۔ وزیر اعظم کو منی بجٹ بل کی منظوری کے معاملے پر بریفنگ دی گئی۔
اجلاس میں پارٹی امور اور سو نکاتی ایجنڈے پر بھی غور کیا گیا جبکہ ڈیم فنڈ اور سرسبز پاکستان کے حوالے سے بھی تبادلہ خیال کیا گیا۔
اس موقع پر وزیر اعظم کا کہنا تھا کہ حکومت عوام کی فلاح و بہبود کے لیے کام کر رہی ہے۔ کرپشن کو کسی صورت برداشت نہیں کیا جائے گا۔
وزیر اعظم نے اداروں میں بہتری کے لیے فوری اقدامات کرنے کی بھی ہدایت کی۔
خیال رہے کہ گزشتہ روز وزیر اعظم عمران خان نے اہم قومی عمارات کو عوام کے استعمال سے متعلق چاروں گورنرز، وزرائے اعلیٰ اور وفاقی وزرا کو خط لکھا تھا۔
وزیر اعظم نے اپنے خط میں کہا تھا کہ پاکستان کو اس وقت بڑے معاشی بحران کا سامنا ہے، ہمارا قرضہ 30 کھرب روپے سے زائد ہو چکا ہے، ہم صرف 6 ارب روپے روزانہ سود کی مد میں ادا کر رہے ہیں، ان ہی حالات کے باعث وزیر اعظم ہاؤس میں رہنے کے بجائے معمولی گھر میں رہنے کا فیصلہ کیا۔
انہوں نے کہا تھا کہ گورنرز اور وزرائے اعلیٰ کے زیر استعمال عمارات سے فائدہ اٹھایا جاسکتا ہے، مستقبل میں عمارات کو استعمال میں لانے کے لیے اقدامات کیے جائیں۔
