ARYNews.tv | Urdu – Har Lamha Bakhabar

Tag: meeting

  • سوشل میڈیا پر شہریوں کی کردار کشی کرنے والوں کے خلاف گھیرا تنگ

    سوشل میڈیا پر شہریوں کی کردار کشی کرنے والوں کے خلاف گھیرا تنگ

    اسلام آباد: وفاقی وزیر داخلہ رانا ثنااللہ کی زیر صدارت اجلاس میں سوشل میڈیا پر غیر اخلاقی مواد کی تشہیر، شہریوں کی ہراسگی اور کردار کشی کی ذریعے ساکھ خراب کرنے والوں کے خلاف کریک ڈاؤن کا فیصلہ کیا گیا ہے۔

    تفصیلات کے مطابق وفاقی وزیر داخلہ رانا ثنا اللہ کی زیر صدارت اجلاس منعقد ہوا جس میں وفاقی سیکریٹری داخلہ، آئی جی پنجاب، ڈی جی ایف آئی اے اور دیگر حکام نے شرکت کی۔

    اجلاس میں سوشل میڈیا پر شہریوں کو ہراساں کرنے، غیر اخلاقی ویڈیوز اپ لوڈ کرنے، بلیک میلنگ اور کردار کشی سے متعلق معاملات کا جائزہ لیا گیا۔

    اجلاس میں غیر اخلاقی مواد کی تشہیر، شہریوں کی ہراسگی اور کردار کشی کی ذریعے ساکھ خراب کرنے والوں کے خلاف کریک ڈاؤن کا فیصلہ کیا گیا۔

    سائبر کرائم میں ملوث افراد کے خلاف سخت اور فوری ایکشن کے لیے ہدایات جاری کردی گئیں، سائبر کرائم اور سوشل میڈیا پر توہین آمیز مواد سے متعلق قوانین کو مؤثر بنانے کا فیصلہ کیا گیا۔

    پیکا 2016 میں ضروری ترامیم لانے کے لیے ورکنگ گروپ بھی تشکیل دیا گیا ہے، ورکنگ گروپ قانون سازی اور انتظامی اقدامات کے معاملات کا جائزہ لے گا۔ ورکنگ گروپ اپنی مرتب شدہ سفارشات وزارت داخلہ کو پیش کرے گا۔

    شہریوں کی شکایات کے لیے ایف آئی اے نے رابطہ نمبرز بھی جاری کر دیے ہیں۔

    وزیر داخلہ رانا ثنا اللہ کا کہنا تھا کہ سوشل میڈیا پر توہین آمیز مواد اور شہریوں کی کردار کشی قابل قبول نہیں، غیر اخلاقی اور توہین آمیز مواد کی موجودگی سے انارکی کا اندیشہ ہے، ایسے جرائم میں ملوث افراد کے خلاف سخت ایکشن لیا جائے گا۔

    انہوں نے ہدایت کی کہ اخلاقی اقدار پامال کرنے والوں کے خلاف زیرو ٹالرنس پالیسی اپنائیں، شہریوں کے تحفظ کے لیے ایف آئی اے، پی ٹی اے اور دیگر ادارے اپنا کردار ادا کریں۔

    وزیر داخلہ کا مزید کہنا تھا کہ شہری اپنی شکایات ایف آئی اے کے رابطہ نمبرز پر بھیجیں، عملدر آمد کریں گے۔

  • مسلم لیگ ن اجلاس، حکومت یا الیکشن فیصلہ آئی ایم ایف پیکیج سے مشروط

    مسلم لیگ ن اجلاس، حکومت یا الیکشن فیصلہ آئی ایم ایف پیکیج سے مشروط

    مسلم لیگ ن کا مشاورتی اجلاس ہوا جس میں سابق وزیراعظم نواز شریف نے بھی ویڈیو لنک کے ذریعے شرکت کی، جس میں حکومت برقرار رکھنے یا الیکشن کا فیصلہ آئی ایم ایف پیکیج سے مشروط کیا گیا ہے۔

    اے آر وائی نیوز کے مطابق لاہور میں مسلم لیگ ن کا مشاورتی اجلاس ہوا جس میں مسلم لیگ ن کی نائب صدر مریم نواز سمیت پارٹی کے اہم رہنماؤں نے شرکت کی جب کہ لندن سے سابق وزیراعظم نواز شریف نے بذریعہ ویڈیو لنک اس اجلاس میں شرکت کی۔

    اجلاس کے حوالے سے ذرائع نے اے آر وائی نیوز کو بتایا کہ اجلاس پی ٹی آئی کے اسلام آباد لانگ مارچ اور قبل از وقت الیکشن پر مشاورت کی گئی اور پنجاب کے بڑے شہروں میں مزید جلسے کرنے کا فیصلہ بھی کیا گیا۔

    ذرائع کے مطابق اجلاس میں بذریعہ ویڈیو لنک شریک نواز شریف نے موقف اختیار کیا کہ گزشتہ حکومت کا ملبہ ہم کیوں اپنے سر لیں اگر آئی ایم ایف سے ریلیف پیکج نہیں ملتا تو بڑے فیصلے کیے جائیں۔

    ذرائع نے بتایا کہ پی ٹی آئی کے لانگ مارچ کے حوالے سے نواز شریف نے کہا کہ ملک کوانتشار کرنے والوں کےرحم و کرم پرنہ چھوڑا جائے، انہوں نے اجلاس میں موجود وفاقی وزیر داخلہ کو مخاطب کرتے ہوئے کہا کہ رانا صاحب آپ تیار ہیں نا، جس پر رانا ثنا اللہ نے کہا کہ میاں صاحب آپ شہباز صاحب سے اجازت لے دیں۔

    اجلاس میں نواز شریف نے کہا کہ لانگ مارچ کا شور آئی ایم ایف مذاکرات کو متاثر کرنے کیلیے مچایا گیا، لانگ مارچ پر اتحادیوں کو مکمل اعتماد میں لیا جائے بالخصوص ہر فیصلے میں آصف زرداری کو ساتھ رکھا جائے۔

    ذرائع کے مطابق نواز شریف نے اجلاس میں شریک وزرا کو ہدایت کی کہ انتخابی اصلاحات کا بل جلد از جلد تیار کرکے قومی اسمبلی سے منظورکرایا جائے ساتھ ہی چیئرمین نیب کی تعیناتی پر اپوزیشن لیڈر سے فوری مشاورت کاآغاز کیا جائے۔

    ذرائع کے مطابق اجلاس میں وزیراعظم شہباز شریف اور وزیراعلیٰ حمزہ شہباز نے پنجاب میں نمبر گیم کے حوالے سے نواز شریف کو آگاہ کیا جب کہ مریم نواز نے موقف اختیار کیا کہ فوری الیکشن اور فریش مینڈیٹ ہی قومی وعوامی مسائل کا حل ہے۔

  • ملک میں پیٹرولیم مصنوعات کی قیمتوں میں اضافے کا خدشہ

    ملک میں پیٹرولیم مصنوعات کی قیمتوں میں اضافے کا خدشہ

    واشنگٹن: پاکستان میں پیٹرولیم مصنوعات کی قیمتوں میں اضافے کا خدشہ ہے، وفاقی وزیر خزانہ مفتاح اسماعیل نے فیول سبسڈی ختم کرنے کا عندیہ دے دیا۔

    تفصیلات کے مطابق وفاقی وزیر خزانہ مفتاح اسماعیل نے انٹرنیشنل مانیٹری فنڈ (آئی ایم ایف) کے ایگزیکٹو ڈائریکٹرز کے ساتھ ملاقات کی، ملاقات میں وزیر مملکت برائے خزانہ ڈاکٹر عائشہ غوث پاشا، سیکریٹری خزانہ اور اسٹیٹ بینک آف پاکستان کے گورنر بھی شامل تھے۔

    میٹنگ کے بعد وفاقی وزیر خزانہ نے فیول سبسڈی ختم کرنے کا عندیہ دیا ہے، مفتاح اسماعیل کا کہنا ہے کہ انٹرنیشنل مانیٹری فنڈ (آئی ایم ایف) کی میٹنگ میں سبسڈی ختم کرنے پر رضا مندی ظاہر کی گئی ہے۔

    ان کا کہنا تھا کہ آئی ایم ایف پروگرام ڈی ریل ہوچکا تھا جسے ٹریک پر واپس لائیں گے۔

    بعد ازاں وزیر خزانہ نے واشنگٹن میں امریکی تھنک ٹینک اٹلانٹک کونسل کے زیر اہتمام تقریب سے خطاب کیا، انہوں نے پاکستان میں نئی حکومت کے اقتصادی ایجنڈے پر روشنی ڈالی۔

    وزیر خزانہ نے کہا کہ حکومت کا مقصد معاشی اور مالیاتی استحکام لانا اور کاروبار دوست ماحول پیدا کرنا ہے، حکومت برآمدات میں اضافے کے لیے مرحلہ وار اقدامات کرے گی۔

    انہوں نے کہا کہ فن ٹیک اور ڈیجیٹل معیشت کو مزید سہولت فراہم کی جائے گی، پاکستان اور امریکا کے درمیان مشترکہ اقدار پر مبنی شراکت داری ہے۔

  • ‘سیکیورٹی اداروں کی تحقیقات میں یہ نتیجہ نکلا کہ کوئی بیرونی سازش نہیں’

    ‘سیکیورٹی اداروں کی تحقیقات میں یہ نتیجہ نکلا کہ کوئی بیرونی سازش نہیں’

    وزیراعظم شہباز شریف کی زیرصدارت قومی سلامتی کمیٹی کے اجلاس کا اعلامیہ جاری کردیا گیا ہے جس میں کہا گیا ہے کہ سیکیورٹی اداروں کی تحقیقات کے مطابق کوئی بیرونی سازش نہیں ہوئی ہے۔

    اے آر وائی نیوز کے مطابق وزیراعظم کی قومی سلامتی کمیٹی کے اجلاس کے جاری اعلامیے میں کہا گیا ہے کہ قومی سلامتی کمیٹی نے توثیق کی ہے کہ امریکی مراسلہ سازش نہیں مداخلت ہے۔

    اعلامیے میں مزید کہا گیا ہے کہ خفیہ اداروں نے اعلامیہ کی تحقیقات کی ، واشنگٹن میں پاکستانی سفارتخانے کو ٹیلی گرام موصول ہوا تمام ترمعلومات، مراسلوں کی بنیاد پر کمیٹی نے فیصلہ کیا کہ غیرملکی سازش نہیں تھی۔

    No description available.

    قومی سلامتی کمیٹی کے اجلاس کے جاری اعلامیے میں یہ بھی کہا گیا ہے کہ دوران تحقیقات غیر ملکی سازش کے کوئی ثبوت نہیں ملے امریکا میں پاکستان کے سابق سفیر نے قومی سلامتی کمیٹی کو بریفنگ دی۔

    قومی سلامتی کمیٹی کےاجلاس میں گزشتہ اجلاس کےفیصلوں کا اعادہ بھی کیا گیا۔

  • پولیو جائزہ اجلاس: وفاقی وزیر صحت عبدالقادر پٹیل اجلاس کی صدارت کریں گے

    پولیو جائزہ اجلاس: وفاقی وزیر صحت عبدالقادر پٹیل اجلاس کی صدارت کریں گے

    اسلام آباد: ملک میں پولیو وائرس کی موجودہ صورتحال کا جائزہ لینے کے لیے اجلاس طلب کرلیا گیا، اجلاس کی صدارت وفاقی وزیر صحت عبدالقادر پٹیل کریں گے۔

    تفصیلات کے مطابق ترجمان وزارت صحت کا کہنا ہے کہ پولیو کی موجودہ صورتحال کا جائزہ لینے کے لیے اجلاس طلب کرلیا گیا ہے جس کی صدارت وفاقی وزیر صحت عبدالقادر پٹیل کریں گے۔

    ترجمان کا کہنا ہے کہ ڈی جی ہیلتھ پولیو کے کوآرڈینیٹر وزیر صحت کو موجودہ صورتحال بریفنگ دیں گے، اجلاس میں پولیو کے خاتمے کے لیے مؤثر حکمت عملی ترتیب دی جائے گی۔

    خیال رہے کہ گزشتہ برس انسداد پولیو کے لیے ہنگامی اور مؤثر اقدامات اٹھائے گئے جن کی بدولت سال 2021 میں پورے ملک سے صرف ایک پولیو کیس رپورٹ ہوا۔

    اس سے قبل سنہ 2020 میں 84 پولیو کیسز رپورٹ کیے گئے تھے، رواں سال اب تک کوئی بھی پولیو کیس رپورٹ نہیں کیا گیا۔

  • وزیر اعظم نے قومی سلامتی کمیٹی کا اجلاس طلب کرلیا

    وزیر اعظم نے قومی سلامتی کمیٹی کا اجلاس طلب کرلیا

    اسلام آباد: پاکستان کوموصول ہونے والے دھمکی آمیز خط پر وزیراعظم نے قومی سلامتی کمیٹی کا اجلاس طلب کر لیا ہے۔

    وفاقی وزیر اطلاعات فواد چوہدری نے سماجی رابطے کی ویب سائٹ ٹوئٹر پر کئے گئے ٹوئٹ میں بتایا کہ وزیراعظم نے قومی سلامتی کمیٹی کا اجلاس طلب کرلیا ہے، اجلاس آج بعد دوپہر وزیراعظم ہاؤس میں ہوگا۔

    فواد چوہدری کے ٹوئٹ میں کہا گیا کہ قومی سلامتی کمیٹی کے اجلاس میں سول وعسکری قیادت شرکت کرے گی اہم ترین اجلاس میں پاکستان کو موصول ہونے والا دھمکی آمیز خط پیش کیا جائیگا۔

    یاد رہے کہ 27 مارچ کو اسلام آباد میں جلسہ عام سے خطاب میں وزیراعظم عمران خان نے خط لہرایا تھا اور دعویٰ کیا تھا کہ ملک میں باہر سے پیسے کی مدد سے حکومت تبدیل کرنے کی کوشش کی جارہی ہے، ہمیں لکھ کر دھمکی دی گئی، میرے پاس خط ہے اور وہ ثبوت ہے۔

    یاد رہے کہ سال دوہزار بیس میں وزیراعظم عمران خان نے قومی سلامتی کمیٹی کی تشکیل نو کی تھی، اہم قومی و اسٹریٹجک فیصلوں کا فورم 12 ارکان پر مشتمل کیا گیا تھا۔

    وزیر اعطم قومی سلامتی کمیٹی کے چیئرمین مقرر کئے گئے جبکہ وزیر دفاع ، وزیر داخلہ ، وزیر خارجہ ، مشیر خزانہ ، معاون خصوصی برائے اطلاعات و نشریات ، چیئرمین جوائنٹ چیفس آف اسٹاف کمیٹی ، تینوں مسلح افواج کے سربراہان بھی سلامتی کمیٹی کا حصہ بنائے گئے تھے۔

  • 360 ڈگری زاویے پر گھومنے والا کیمرا

    360 ڈگری زاویے پر گھومنے والا کیمرا

    کرونا وبا کے دوران دنیا بھر میں آن لائن میٹنگز میں اضافہ ہوا جس کی وجہ سے نئی نئی ایپس اور پروڈکٹس متعارف کروائی گئیں، اب حال ہی میں ایک انوکھا کیمرا بھی متعارف کروایا گیا ہے۔

    بین الاقوامی ویب سائٹ کے مطابق کرونا وبا کے بعد دنیا بھر میں آن لائن میٹنگز اور تعلیم میں اضافے کے پیش نظر میٹنگ اول پرو نامی ایک کیمرا متعارف کروایا گیا ہے۔

    یہ الو کی شکل کا ایک ایسا کیمرہ ہے جو آن لائن میٹنگ کو 360 درجے پر حقیقی انداز میں دکھاتا ہے، اس کے علاوہ اگر ایک دفتر میں ہی چار لوگ بیٹھے ہیں تو ان سب کی گفتگو اور ویڈیو ایسے ظاہر کرتا ہے کہ ان پر حقیقت کا گمان ہوتا ہے۔

    اس کیمرے کو میز پر رکھا جاسکتا ہے، ٹرائی پوڈ سے سہارا دا جاسکتا ہے اور چھت سے بھی لٹکایا جاسکتا ہے، ایک الو از خود گھومتے ہوئے ہر بولنے والے کی ویڈیو آن لائن نشر کرتا رہتا ہے۔

    اس کے خاص کیمرے کسی بھی مقام کو گہرائی میں ظاہر کر کے اسے تھری ڈی اور گہرائی میں دکھاتے ہیں۔

    اس میں ایک دو نہیں بلکہ 8 مائیکرو فون نصب ہیں جو 18 فٹ دوری سے بھی گفتگو سن سکتے ہیں، علاوہ ازیں اس کے اندر ایک اسپیکر بھی نصب ہے۔

    دلچسپ بات یہ ہے کہ اسے آن لائن میٹنگ کے تمام سافٹ ویئرز یعنی زوم، گوگل ہینگ، ایئر میٹ اور دیگر مشہور پلیٹ فارم پر یکساں انداز میں استعمال کیا جاسکتا ہے۔

    یو ایس بی سلاٹ سے جڑنے کے بعد یہ از خود اس کی طرح گھوم جاتا ہے جہاں سے آواز آرہی ہوتی ہے، اور اس کی شاندار ویڈیو آن لائن پلیٹ فارم پر نشر کردیتا ہے۔ اس صلاحیت کے لیے میٹول اول کمپنی نے مصنوعی ذہانت کا سہارا لیا ہے۔

    یہ دلچسپ کیمرہ کئی سائزز اور ماڈلز میں دستیاب ہے۔

  • وزارت اعلیٰ پنجاب: حکومت نے (ق) لیگ کو جواب دے دیا

    وزارت اعلیٰ پنجاب: حکومت نے (ق) لیگ کو جواب دے دیا

    لاہور: حکومت نے پنجاب کے وزرات اعلیٰ کے مطالبے پر ق لیگ کو صاف صاف جواب دے دیا ہے۔

    گذشتہ روز ق لیگ نے ایک بار پھر حکومت کے سامنے پنجاب کی وزارت اعلیٰ کا مطالبہ رکھا تھا ، حکومتی وفد کو ق لیگ نے دو ٹوک الفاظ میں کہا تھا کہ ہمیں کلئیر بتائیں ہمارے ساتھ کیا کرنا چاہتے ہیں؟۔

    ق لیگی قیادت کی مذاکراتی ٹیم کا موقف تھا کہ معاملہ عدم اعتماد پر ووٹنگ سے پہلےکلئیر کریں،بعد میں کوئی فائدہ نہیں ، جس پر وفاقی وزرا نے کہا ہم لگے ہوئے ہیں ، آپ کو طے کر ہی بتائیں گے۔

    تاہم اب حکومتی ذرائع کا کہنا ہے کہ مسلم لیگ ق کو وزارت اعلیٰ نہیں دے سکتے، وزارت اعلیٰ کے علاوہ کسی بھی اور فارمولے پر تیارہیں۔

    یہ بھی پڑھیں: ق لیگ نے ایک بار پھر پنجاب کی وزارت اعلیٰ کا مطالبہ حکومت کے سامنے رکھ دیا

    حکومتی ذرائع کا یہ بھی کہنا ہے کہ ق لیگ کو پیغام پہنچادیا ہے کہ ن لیگ وزارت اعلیٰ دے رہی ہے تو ضرور لےلیں۔

    کل ہونے والے مذاکرات میں پنجاب سے متعلق ق لیگ نے واضح مؤقف حکومتی ٹیم کے سامنے رکھتے ہوئے کہا تھا کہ بطور اتحادی پہلے دن جو معاہدہ ہوا اس کو پورا نہیں کیا گیا، دو وزارتیں مرکز میں طے ہوئیں اور دوسری وزارت سوا تین سال بعد دی گئی۔

    مسلم لیگ ق کا موقف تھا کہ حکومت کو جب بھی مشکل پڑی ہم نے ساتھ دیا مگر حکومت نے ہمارے ساتھ اپوزیشن جیسا سلوک کیا، حالانکہ کے ہم حکومت کے اتحادی ہیں پھر بھی اپوزیشن جیسا سلوک کیوں؟

    ق لیگ نے سوال کیا کہ مشکل یا بحران کے علاوہ کب حکومت نے اتحادیوں سے رابطہ کیا۔

  • اسلام آباد : متحدہ قومی موومنٹ کے وفد کی اپوزیشن رہنماؤں سے ملاقات

    اسلام آباد : متحدہ قومی موومنٹ کے وفد کی اپوزیشن رہنماؤں سے ملاقات

    اسلام آباد : متحدہ قومی موومنٹ (ایم کیو ایم ) پاکستان کے وفد نے رات گئے پارلیمنٹ لاجز میں اپوزیشن رہنماؤں سے ملاقات کی۔

    اس حوالے سے ذرائع کا کہنا ہے کہ ملاقات میں سیاسی صورتحال، تحریک عدم اعتماد اور دیگر سیاسی امور پر تبادلہ خیال کیا گیا۔

    ایم کیو ایم، اپوزیشن جماعتوں میں ملاقاتوں اور پیش رفت کا جائزہ لیا گیا، دیگر اتحادی جماعتوں سے ملاقاتوں پر بھی تبادلہ خیال کیا گیا۔

    ملاقات کے بعد میڈیا سے گفتگو کرتے ہوئے متحدہ رہنما نے کہا کہ صورتحال پر گہری نظر رکھے ہوئے ہیں، جو فیصلہ قوم، ملک اور شہری سندھ کے عوام کے حق میں ہوگا وہی کریں گے۔

    اس موقع پر اپوزیشن رہنماؤں کا مؤقف تھا کہ عدم اعتماد کے حوالے سے پُرامید ہیں، اسمبلی میں ہمارے نمبرز پورے ہیں۔

    اپوزیشن کے وفد میں اخترمینگل، احسن اقبال، ایازصادق، رانا ثناءاللہ شامل تھے جبکہ خواجہ سعدرفیق، خورشید شاہ، سہیل انور سیال بھی اپوزیشن وفد میں موجود تھے۔

    ایم کیوایم کی جانب سے ڈپٹی کنونیئرعامرخان نے وفد کی قیادت کی جبکہ وسیم اختر اور وفاقی وزیر امین الحق بھی موجود تھے،

    واضح رہے کہ پی ڈی ایم کے سربراہ مولانا فضل الرحمٰن آج متحدہ قومی موومنٹ پاکستان کی قیادت سے کراچی میں بہادرآباد مرکز پر ملاقات کریں گے۔

    حکومت کی اتحادی جماعت ایم کیو ایم پاکستان اور پی ڈی ایم کے سربراہ کی ملاقات میں موجودہ سیاسی صورتحال اور تحریک عدم اعتماد پر گفتگو کی جائے گی۔

  • ‘چاہتا ہوں کہ جلسے میں عوام کی حاضری کے تمام ریکارڈ ٹوٹ جائیں’

    ‘چاہتا ہوں کہ جلسے میں عوام کی حاضری کے تمام ریکارڈ ٹوٹ جائیں’

    اسلام آباد: ڈی چوک جلسہ، وزیراعظم عمران خان نے عوام سے بڑی اپیل کردی۔

    تفصیلات کے مطابق سماجی رابطے کی ویب سائٹ ٹوئٹر پر جاری پیغام میں وزیراعظم نے کہا کہ 27 مارچ کو اسلام آباد میں جلسہ ہوگا، جلسے کا موضوع’’امر بالمعروف‘‘ہے، وزیراعظم نے ٹوئٹ میں لوگو جاری کردیا۔

    اپنے ٹوئٹ میں وزیراعظم نے لکھا کہ لوٹی دولت کے لیے سیاستدانوں کو بےشرمی سےخریدنےکی مذمت کرتے ہیں، ہم حق کے ساتھ کھڑے ہیں، چاہتے ہیں کہ جلسے میں عوام کی حاضری کے تمام ریکارڈ ٹوٹ جائیں۔

    اس سے قبل سماجی رابطے کی ویب سائٹ ٹوئٹر پر وزیر اعظم عمران خان نے صوفی بزرگ شمس تبریز کا قول شیئر کرتے ہوئے لکھا کہ ملک کے غدار اور بدمعاش جال میں پھنس رہے ہیں۔

    گذشتہ روز راولپنڈی میں رنگ روڈ منصوبے کا سنگ بنیاد رکھنے کی تقریب سے خطاب کرتے ہوئے وزیر اعظم عمران خان نے کہا تھا کہ جیسے جیسے عدم اعتماد پر ووٹ کا وقت قریب آئے گا، پی ٹی آئی سے خفا سب لوگ واپس آجائیں گے۔

    یہ بھی پڑھیں: تحریک عدم اعتماد: اسپیکر نے اہم اجلاس طلب کرلیا

    انہوں نے اپنے خطاب میں کہا کہ ضمیر فروشوں کے خلاف قوم کا غصہ دیکھ رہا ہوں اور پیشگوئی کرتا ہوں، پاکستان میں بہت زبردست کام ہوگیا جو تحریک عدم اعتماد آگئی، آج ملک میں ضمیر خریدنے کیلیے کھلے عام منڈی لگی ہوئی ہے، رات کے اندھیرے میں پولیس کسٹڈی میں ضمیر خریدے جارہے ہیں یہ سب سندھ حکومت کے پیسے سے ہورہا ہے جو کہ عوام کا پیسہ ہے، کسی کو شرم نہیں ہے اس کو جمہوریت نہیں کہتے ہیں۔