ARYNews.tv | Urdu – Har Lamha Bakhabar

Tag: Meghan Markle

  • ملکہ برطانیہ اپنی بہو میگھن مارکل کے مد مقابل

    ملکہ برطانیہ اپنی بہو میگھن مارکل کے مد مقابل

    نیویارک : برطانیہ کے شاہی محل سے علیحدگی اختیار کرنے والی میگھن مارکل ملکہ برطانیہ الزبتھ اور شہزادی کیٹ مڈلٹن کے مد مقابل آگئیں۔

    اس حوالے سے غیر ملکی میڈیا میں شائع ہونے والی ایک رپورٹ میں بتایا گیا ہے کہ برطانوی شاہی خاندان کی شہزادی مڈلٹن اور ملکہ الزبتھ دوم کا اسپیشل ٹی وی شو اُسی دن دکھایا جائے گا جس دن میگھن مارکل کا انٹرویو نشر ہوگا۔

    ذرائع کے مطابق ملکہ الزبتھ اور کیٹ کا خصوصی پروگرام آئندہ ماہ7مارچ کو نشر کیا جائے گا، شاہی خاندان کے خصوصی شو میں پرنس چارلس، کمیلا، دی ڈیوک اینڈ ڈچز آف کیمبرج اور صوفیا ویکسس بھی شرکت کریں گی۔

    دوسری جانب اسی دن میگھن مارکل کا انٹرویو معروف میزبان اوپرا ونفرے کے ساتھ نشر کیے جانے کا اعلان پہلے ہی کیا جاچکا ہے، انٹرویو میں میگھن مارکل ذاتی زندگی کے بارے میں انکشافات کریں گی۔

    واضح رہے کہ بکنگھم محل کی جانب سے چند روز قبل ہی یہ اعلان کیا گیا تھا کہ شہزادہ ہیری اور ان کی اہلیہ میگھن مارکل نے شاہی خاندان سے باضابطہ طور پر علیحدگی اختیار کرلی ہے۔

    ترجمان بکنگھم پیلس کا کہنا ہے کہ سابق شاہی جوڑے نے ملکہ الزبتھ کو باقاعدہ طور پر آگاہ کردیا ہے کہ اب وہ

    فعال ارکان کی حیثیت سے کبھی شاہی خاندان کا حصہ نہیں بنیں گے۔ ہیری اور میگھن کے حوالے سے بکنگھم پیلیس کی جانب سے جاری بیان کے مطابق جوڑے کی اعزازی فوجی تقرری اور شاہی سرپرستی 94 سالہ ملکہ کو واپس کردی جائے گی۔

    مزید پڑھیں : ہیری اور میگھن کا بڑا اعلان، ملکہ نے بھی فیصلہ سنا دیا

    اس حوالے سے توقع کی جارہی ہے کہ شہزادہ ہیری اور میگھن مارکل شاہی خاندان سے علیحدگی اختیار کرنے سے متعلق اپنی خاموشی اوپرا ونفرے کے پروگرام میں توڑیں گے۔

    یاد رہے کہ شہزادہ ہیری اور میگھن مارکل نے9 جنوری 2020 کو شاہی حیثیت سے دستبردار ہونے کا اعلان کرتے ہوئے کہا تھا کہ وہ مالی طور پر خود مختار ہونے کے لیے عملی اقدامات کریں گے تاہم وہ ملکہ برطانیہ اور شاہی خاندان کی عزت و احترام کرتے رہیں گے۔

  • میگھن مارکل کے بچپن کا خواب کیسے پورا ہوا؟ (ویڈیو دیکھیں)

    میگھن مارکل کے بچپن کا خواب کیسے پورا ہوا؟ (ویڈیو دیکھیں)

    لندن: اپنے شوہر کے ساتھ شاہی خاندان چھوڑنے والی برطانوی شہزادی میگھن مارکل کے بارے میں معلوم ہوا ہے کہ انھیں ملکہ بننے کا شوق بچپن ہی سے تھا، اس سلسلے میں ان کے بچپن کی ایک پرانی ویڈیو سامنے آ گئی ہے۔

    تفصیلات کے مطابق میگھن مارکل کے بچپن کی ایک نادر ویڈیو سامنے آئی ہے، جس میں انھوں نے سر پر تاج پہن رکھا ہے، ایسا لگتا ہے کہ میگھن کا شہزادی بننے کا خواب تو پورا ہو گیا ہے لیکن شہزادی بننے کے بعد انھیں اس بات کا بھی احساس ہو چکا ہے کہ شاہی زندگی ان کے لیے نہیں ہے۔

    یہ ویڈیو انٹرنیٹ پر تیزی سے مشہور ہو رہی ہے، جسے ایک برطانوی اخبار نے ڈھونڈ کر نکالا، بچپن کی اس ویڈیو میں سابقہ اداکارہ نے ملکہ کا روپ دھارا ہے، ویسے ہی کپڑے پہن رکھے ہیں اور سر پر تاج رکھا ہے۔

    یہ دراصل بچپن کی میگھا مارکل کی ویڈیو ہے جس میں انھوں نے اپنی بہترین سہیلی نیناکی پریڈی کی سال گرہ میں شرکت کی تھی، اور ایک کھیل کے دوران وہ ملکہ بنیں۔

    اس فوٹیج میں یہ بھی بتایا گیا ہے کہ نیناکی کی والدہ ایک کیمرہ لے کر جب باغ میں داخل ہوئیں تو چپ چپ رہنے والی میگھن نے جوش و خروش میں سب کو اکھٹا کیا اور کہا دیکھو ہم ویڈیو ٹیپ پر ہیں۔

    اس کے بعد وہ کسی فلمی سین کی شوٹنگ سے ایک لمحہ قبل استعمال ہونے والے کلیپر بورڈ کی طرح ہاتھوں سے اشارے کر کے سین کے لیے تیار ہونے کا کہتی ہیں۔

    میگھن کو اس کے بعد فوٹیج میں ملکہ کا کردار ادا کرتے دیکھا جا سکتا ہے، جب کہ ایک سہیلی ان سے کہتی ہے: ملکہ سلامت، کیا اس سلطنت میں مزید کچھ کرنے کے لیے نہیں رہا ہے؟

    میگھن جواب دیتی ہیں کہ ہاں 9 لاکھ کوکیز بناؤ اور میرے لیے ایک اچھا سا لباس تیار کرو۔

    پارٹی میں ایک اور بچہ کہتا ہے: ملکہ میگھن، کیا میں گھوم پھر سکتی ہوں؟ میگھن جواب دیتی ہے ہاں بالکل، اور اس کے بعد وہ دس منٹ کا وقفہ دیتی ہیں لیکن یہ دس منٹ کا وقفہ فوراً ہی ختم ہو جاتا ہے۔

    فوٹیج میں میگھن ادھر ادھر پھر کر چیخ کر ہدایات دیتی نظر آتی ہیں ’تیزی سے کام کرو‘۔ ایک بچی مداخلت کر کے کہتی ہے ملکہ سلامت زبردست پارٹی رہی۔

    میگھن جواب میں کہتی ہیں: اوہ مجھے بہت خوشی ہوئی کہ آپ کو پارٹی پسند آئی۔

  • میگھن مارکل کو مقدمے میں ناکامی کا سامنا

    میگھن مارکل کو مقدمے میں ناکامی کا سامنا

    لندن : برطانیہ کی عدالت نے میگھن مارکل کی سوانح حیات سے متعلق اخبار دی میل کو اس بات کی اجازت دے دی ہے کہ بیان کی گئی باتوں کو قانونی کیس میں ترامیم کے ساتھ شامل کرسکتا ہے۔

    برطانوی نشریاتی  ادارے کے مطابق دی میل اخبار نے لندن ہائی کورٹ میں درخواست دائر کی تھی کہ اسے میگھن مارکل کی جانب سے دائر کیے گئے مقدمے میں ترامیم کی اجازت دی جائے جو عدالت نے منظور کرلی۔

    برطانوی اخبار نے عدالت سے اجازت مانگی تھی کہ اسے میگھن مارکل اور شہزادہ ہیری کی رواں برس اگست میں شائع ہونے والی سوانح حیات کا مواد قانونی مقدمے میں شامل کرنے کی اجازت دی جائے۔

    میگھن مارکل اور شہزادہ ہیری کی دو مشترکہ لکھاریوں کی لکھی گئی سوانح حیات اگست 2020 میں شائع ہوئی تھی، جس میں ایسی باتیں بھی شامل ہیں جنہیں شاہی جوڑا ذاتی معلومات قرار دیتا رہا ہے اور ایسی باتوں کو شائع کرنے پر شاہی جوڑے نے دی میل کے مذکورہ مقدمہ بھی دائر کیا تھا۔

    سوانح حیات میں میگھن مارکل کے والد کے وہ خطوط بھی شامل ہیں، جو انہوں نے اپنی بیٹی کو لکھے تھے اور انہیں دی میل نے 2018 میں شائع کیا تھا، جس پر برطانوی شہزادی نے اخبار کے خلاف مقدمہ دائر کیا تھا۔

    اخبار کی جانب سے والد کے خطوط شائع کرنے پر میگھن مارکل نے برہمی کا اظہار کرتے ہوئے اس کے خلاف مقدمہ دائر کرتے ہوئے دعویٰ کیا تھا کہ وہ ان کی ذاتی باتیں تھیں اور اخبار نے انہیں توڑ مروڑ کر پیش کیا۔

    اب وہی باتیں ان کی سوانح حیات میں بھی شامل ہیں اور اخبار نے عدالت سے اجازت مانگی تھی کہ کیس کے دلائل میں اسے سوانح حیات کی باتیں شامل کرنے کی اجازت دی جائے۔

    سماعت کے دوران اخبار کے وکلا نے بتایا کہ سوانح حیات میں شامل کئی ذاتی باتوں سے ظاہر ہوتا ہے کہ شہزادہ ہیری اور میگھن مارکل مذکورہ باتوں کو خفیہ نہیں بلکہ عوام کے سامنے لانا چاہتے تھے۔

    عدالت نے اخبار کی درخواست منظور کرتے ہوئے اسے مقدمے میں ترامیم کے ساتھ سوانح حیات کا مواد شامل کرنے کی اجازت دے دی۔

    عدالت کی جانب سے برطانوی اخبار کو مقدمے میں مواد شامل کرنے کی اجازت دیے جانے کو میگھن مارکل کی شکست تسلیم کیا جا رہا ہے، کیوں کہ انہوں نے برطانوی اخبار کی مذکورہ درخواست کی مخالفت کی تھی۔

    میگھن مارکل اور شہزادہ ہیری کی سوانح حیات لکھنے والے دو لکھاریوں میں سے ایک لکھاری نے عدالت کو بتایا کہ انہوں نے شاہی جوڑے کی اجازت کے بغیر اور ان کے انٹرویوز کیے بغیر ہی مذکورہ سوانح حیات لکھی تھی۔

    جن لکھاریوں نے شاہی جوڑے کی سوانح حیات لکھی، انہیں برطانوی شاہی محل کے معاملات کے حوالے سے طویل تجربہ ہے اور وہ شاہی محل کے حوالے سے دیگر کتابیں بھی لکھ چکے ہیں۔

    خیال رہے کہ 38 سالہ میگھن مارکل نے برطانوی اخبار کے خلاف اکتوبر 2019 میں مقدمہ دائر کیا تھا۔ برطانوی شہزادی نے برطانوی اخبار پر اپنے والد کو لکھے گئے ایک خط کو غلط انداز میں شائع کرنے پر مقدمہ دائر کیا تھا۔

    میگھن مارکل نے دی میل آن سنڈے پر مقدمہ دائر کرتے ہوئے اپنی قانونی درخواست میں دعویٰ کیا تھا کہ ویب سائٹ کی جانب سے شائع کردہ خط جعلی ہے اور یہ کہ مذکورہ خط ان کی جانب سے والد کو لکھا جانے والا خط نہیں۔

    میل آن سنڈے نے جس خط کو شائع کیا تھا وہ خط دراصل 2018 میں میگھن مارکل نے اپنے والد کو لکھا تھا اور ویب سائٹ نے اسی خط کے متن کو توڑ مروڑ کر اور جملوں کو آگے پیچھے کرکے شائع کیا تھا۔

    مذکورہ کیس کا باضابطہ ٹرائل آئندہ سال جنوری میں ہونے کا امکان ہے، اسی کیس کے حوالے سے رواں ماہ اپریل اور مئی میں ابتدائی سماعتیں بھی ہوئی تھیں۔

  • شاہی پروٹوکول کی خلاف ورزی پر شہزادہ ہیری اور میگھن تنقید کی زد میں

    شاہی پروٹوکول کی خلاف ورزی پر شہزادہ ہیری اور میگھن تنقید کی زد میں

    برطانوی شاہی خاندان کے چشم و چراغ شہزادہ ہیری اور ان کی اہلیہ میگھن مرکل کو امریکی انتخابات میں ووٹ ڈالنے کی تاکید کو سخت تنقید کا نشانہ بنایا جارہا ہے۔

    شہزادہ ہیری اور ان کی اہلیہ میگھن مرکل اس وقت امریکی ریاست کیلی فورنیا میں 14 ملین ڈالرز مالیت کے ایک محل میں رہائش پذیر ہیں۔ جوڑے نے امریکی انتخابات میں عوام سے ووٹ ڈالنے کی اپیل کی ہے۔

    2 روز قبل جوڑے نے اے بی سی ٹیلی ویژن کے اپنے پہلے پرائم ٹائم ٹی وی شو کے موقع پر امریکی شہریوں پر زور دیا کہ وہ اپنے ووٹ کے حق کا استعمال کریں۔

    جوڑے کو شاہی پروٹوکول کی اس خلاف ورزی پر سخت تنقید کا سامنا ہے۔

    شہزادہ ہیری نے ووٹرز سے کہا کہ وہ نفرت پر مبنی تقریر، غلط اطلاعات اور آن لائن منفی چیزوں کو مسترد کردیں، جبکہ میگھن نے ووٹرز سے کہا کہ صدارتی انتخابات ان کی زندگی کے اہم پولز میں شامل ہیں۔ اس موقع پر شاہی جوڑے نے کسی بھی امیدوار کی توثیق نہیں کی۔

    اس معاملے کے بعد دونوں کو کڑی تنقید کا سامنا ہے کیونکہ برطانوی روایات کے مطابق شاہی خاندان سے یہ امید کی جاتی ہے کہ وہ سختی کے ساتھ سیاست سے اجتناب کریں گے۔

    سوشل میڈیا پر جوڑے کی اس حرکت پر انہیں تنقید کا نشانہ بنایا گیا جبکہ کچھ افراد نے ان کی تعریف بھی کی۔

  • میگھن مارکل پھوٹ پھوٹ کر رو پڑیں، وجہ کیا بنی ؟

    میگھن مارکل پھوٹ پھوٹ کر رو پڑیں، وجہ کیا بنی ؟

    کیلیفورنیا : شاہی خاندان کے سینیئر رکن کی حیثیت سے دستبرداری کے موقع پر ڈچز آف سسیکس میگھن مارکل اپنے جذبات پر قابو نہ رکھ سکیں اور پھوٹ پھوٹ کر رو دیں۔ یہ بات فائنڈنگ فریڈم نامی کتاب کے مصنفین نے بتائی۔

    کتاب کے مصنفین کے مطابق میگھن مارکل اپنے شوہر پرنس ہیری کے ساتھ اپنی آخری شاہی مصروفیت کے موقع پر ویسٹ منسٹر ایبے میں ہونے والی کامن ویلتھ سروس میں شرکت سے قبل ایسوسی ایشن آف کامن ویلتھ یونیورسٹیز کے طلبہ سے بکنگھم پیلس میں ملاقات کے دوران ان کی آنکھیں بھر آئی تھیں۔

    یاد رہے کہ شہزادہ ہیری اور میگھن مارکل نے اس سال جنوری میں شاہی خاندان کے سینیئر رکن کی حیثیت سے دستبرداری اختیار کرنے کا اعلان کیا تھا اور دونوں نے مارچ 2020 میں ویسٹ منسٹر ایبے میں اپنی آخری شاہی تقریب میں شاہی خاندان کے رکن کی حیثیت سے شرکت کی تھی۔

    پرنس ہیری اور میگھن مارکل سرکاری طور پر اپریل 2020 میں شاہی خاندان کے سینیئر ارکان کی حیثیت سے باقاعدہ دستبردار ہوگئے تھے۔

    دریں اثنا اطلاعات کے مطابق پرنس ہیری اور میگھن مارکل پرائم ٹائم ٹیلی ویژن پروگرام میں شامل ہونے کے لیے مکمل طور پر تیار ہیں۔ جس میں ٹائم میگزین ک جانب سے دنیا کے انتہائی بااثر افراد کی سالانہ فہرست کے حوالے سے ایک تقریب ہوگی۔

    اس کے علاوہ شاہی جوڑے کو ای نیوز کے ایک پرومو میں ان کے شاہی خطاب ڈچز آف سسیکس کے بجائے عام سے انداز میں صرف ہیری اور میگھن کے ناموں سے متعارف کرایا گیا ہے تاہم ٹائم کے مضمون میں جس میں اس ایونٹ کو ہائی لائٹ کیا گیا ہے اس میں ان کے شاہی خطاب کو شامل کیا گیا ہے۔

  • ہیری اور میگھن کا نیٹ فلیکس سے معاہدہ، ملکہ برطانیہ ناراض

    ہیری اور میگھن کا نیٹ فلیکس سے معاہدہ، ملکہ برطانیہ ناراض

    لندن: ملکہ برطانیہ الزبتھ دوم اپنے پوتے شہزادہ ہیری اور ان کی اہلیہ میگھن مرکل کے نیٹ فلیکس کے ساتھ معاہدے پر ناراض ہوگئیں۔

    غیرملکی خبررساں ادارے کی رپورٹ کے مطابق برطانیہ کی ملکہ الزبتھ دوم اپنے پوتے شہزادہ ہیری اور میگھن مرکل کے امریکی ٹیکنالوجی، میڈیا سروسز پرووائیڈر اور پروڈکشن کمپنی نیٹ فلیکس کے ساتھ کروڑوں ڈالر کے معاہدے پر سخت ناراض ہوگئیں۔

    شہزادہ ہیری اور میگھن مرکل نے گزشتہ ہفتے اعلان کیا تھا کہ ان کی پروڈکشن کمپنی کا نیٹ فلیکس (اسٹیرمنگ جائنٹ فلم پروڈکشن اور ڈاکومینٹری بنانے والے امریکی ادارے) کے ساتھ کروڑوں ڈالر کا معاہدہ ہوگیا ہے۔

    رپورٹ کے مطابق 35 سالہ شہزادہ ہیری اور ان کی اہلیہ 39 سالہ میگھن اس معاہدے کے ذریعے 15 کروڑ ڈالر کمائیں گے۔

    مزید پڑھیں: ’’ملکہ برطانیہ، کیٹ اور شہزادہ ولیم کی شادی کیخلاف تھیں‘‘

    برطانوی اخبار کے مطابق ملکہ الزبتھ ثانی شہزادہ ہیری اور ان کی اہلیہ میگھن کے نیٹ فلیکس کے ساتھ اس معاہدے کے سخت خلاف ہیں۔

    برطانوی اخبار نے شاہی خاندان کے اندروںی ذرائع کے حوالے سے بتایا ہے کہ اگرچہ ملکہ برطانیہ اس ڈیل سے سخت ناخوش ہیں، لیکن وہ جانتی ہیں کہ وہ شہزادہ ہیری اور میگھن کا ذہن تبدیل نہیں کرپائیں گی، کیونکہ اب اس حوالے سے بہت تاخیر ہوچکی ہے۔

    یاد رہے کہ اس سے قبل یہ اطلاعات بھی تھیں کہ شہزادہ ہیری اور میگھن نے اپنے اس معاہدے کے حوالے سے ملکہ برطانیہ کو آگاہ نہیں کیا تھا جبکہ انہیں معاہدے کی اطلاع ان کے معاونین نے دی تھی۔

  • میگھن مرکل کیا چاہتی تھیں؟ دوست کے سنسنی خیز انکشافات

    میگھن مرکل کیا چاہتی تھیں؟ دوست کے سنسنی خیز انکشافات

    لندن: برطانوی شہزادہ ہیری کی اہلیہ میگھن مرکل کی دوست نے ان کے رازوں سے پردہ اٹھا دیا۔

    غیرملکی خبررساں اددارے کی رپورٹ کے مطابق میگھن کی ایک پرانی دوست نے میگھن کے عزائم بتا دیے، انہوں نے بتایا کہ میگھن ہمیشہ ڈیانا جیسی بننا چاہتی تھی، اِس وقت میگھن مارکل کی زندگی بھی اُسی مقام پر ہے جہاں لیڈی ڈیانا کی برطانوی شاہی خاندان سے علیحدہ ہونےکے بعد تھی۔

    میگھن کی دوست نے کہا کہ فرق یہ کہ میگھن شہزادہ ہیری کی اہلیہ ہونے کے باوجود شاہی ذمہ داریوں سے علیحدہ اور ڈیانا شہزادہ چارلس کی طلاق ہونے کے بعد بھی تمام تر زمے داریاں بخوبی نبھاتی رہی تھیں۔

    مزید پڑھیں: کیا شاہی خاندان میگھن مرکل کے خلاف کوئی سازش کر رہا تھا؟

    میگھن کی دوست نے شہزادے ہیری کونصیحت کہ میگھن تو اپنا کردار بخوبی نبھائیں گی، لیکن ہیری میگھن کے ساتھ محتاط رہیں۔

    دوسری جانب شہزادی ڈیانا کا مجسمہ ان کی رہائش گاہ کنسگٹن پیلس میں نصب کرنے کی تیاریاں جاری ہیں، آئندہ برس جولائی میں ڈیانا کی ساٹھویں سالگرہ کے موقع پر مجسمہ نصب کردیا جائے گا۔

    واضح رہے کہ اپنی والدہ کے مثبت کردار کو اجاگر کرنے کے لیے لیڈی ڈیانا کی یاد میں مجسمہ تعمیر کروانے کے احکامات 2017 میں دونوں برطانوی شہزادوں نے دئیے تھے۔

    خیال رہے کہ ڈیانا اور دودی الفائد اپنے ڈرائیور سمیت اکتیس اگست 1997, میں پیرس انڈر بائی پاس میں ایک کار حادثے میں ہلاک ہو گئے تھے۔

  • کیا شاہی خاندان میگھن مرکل کے خلاف کوئی سازش کر رہا تھا؟

    کیا شاہی خاندان میگھن مرکل کے خلاف کوئی سازش کر رہا تھا؟

    برطانوی شاہی خاندان کے شہزادے ہیری خاندان سے علیحدہ ہونے کے بعد اپنی اہلیہ میگھن مرکل کے ساتھ امریکا میں زندگی گزار رہے ہیں، میگھن کی دوست کا کہنا ہے کہ انہیں ہمیشہ یہ یقین تھا کہ ان کے خلاف کوئی سازش کی جارہی ہے۔

    شہزادہ ہیری اور میگھن مرکل کی شاہی خاندان سے علیحدگی کے بعد ایسی خبریں سامنے آئیں جن کے مطابق میگھن مرکل خود کو شاہی خاندان میں موزوں نہیں سمجھتی تھیں اور ذہنی طور پر پریشان تھیں۔

    اب ان کی ایک دوست نے بھی اس بات کی تصدیق کرتے ہوئے کہا ہے کہ میگھن کو یقین تھا کہ ان کی شادی کے بعد سے ان کے خلاف کوئی سازش تیار کی جارہی ہے۔

    مذکورہ دوست کا کہنا ہے کہ شادی کے کچھ عرصے بعد جوڑا فروگمور کاٹیج میں منتقل ہو کر علیحدہ رہنے لگا تھا تاہم وہاں میگھن خود کو مزید تنہا محسوس کرتی تھیں۔

    میگھن کو لگتا تھا کہ شاہی خاندان میں ان کے خلاف کوئی سازش ہو رہی ہے چنانچہ انہوں نے شاہی خاندان کے افراد سے خود کو الگ تھلگ کردیا تھا، انہیں لگتا تھا کہ وہ یہاں فٹ نہیں ہیں اور وہ ایسی زندگی گزارنے کی عادی نہیں تھیں۔

    وہ اپنے دوستوں کی عدم موجودگی سے بھی خود کو تنہا محسوس کرتی تھیں شاید یہی وجہ تھی کہ انہوں نے لاس اینجلس منتقل ہونے کا فیصلہ کیا۔

    گزشتہ برس شاہی خاندان سے علیحدگی کے بعد جوڑا پہلے کینیڈا گیا، وہاں کچھ عرصہ گزارنے کے بعد وہ اپنی طے شدہ شاہی مصروفیات میں شرکت کرنے لندن واپس آئے، بعد ازاں لاک ڈاؤن شروع ہونے سے پہلے وہ لاس اینجلس چلے گئے اور مستقل وہیں سکونت اختیار کرلی۔

    قریبی افراد کا کہنا ہے کہ امریکا منتقل ہونے کے بعد میگھن تو اپنے دوستوں اور والدہ کی موجودگی میں نہایت خوش باش ہیں تاہم شہزادہ ہیری اس نئی زندگی سے مطابقت کرنے میں جدوجہد کرتے دکھائی دیتے ہیں۔

    وہ برطانیہ میں اپنے خاندان کے ساتھ ایک نہایت مختلف زندگی گزارتے رہے ہیں اور اس زندگی کے عادی نہیں چنانچہ انہیں اس سے عادی ہونے میں وقت لگ رہا ہے۔

    میگھن مرکل اور شہزادہ ہیری مئی 2018 میں رشتہ ازدواج میں منتقل ہوئے تھے، جوڑے کا ایک بیٹا آرچی بھی ہے جو مئی 2019 میں پیدا ہوا۔

  • کرونا وائرس: شہزادہ ہیری اور میگھن مرکل نے خطیر رقم عطیہ کردی

    کرونا وائرس: شہزادہ ہیری اور میگھن مرکل نے خطیر رقم عطیہ کردی

    لندن: برطانوی شہزادے ہیری اور ان کی اہلیہ میگھن مرکل نے اپنی شادی سے حاصل ہونے والی 90 ہزار پاؤنڈز کی خطیر رقم کرونا وائرس کے خلاف اقدامات کے لیے عطیہ کردی۔

    بین الاقوامی خبر رساں ادارے کے مطابق جوڑے نے یہ رقم ایک فلاحی ادارے فیڈنگ بریٹین کو دی ہے جو اس بحران کے دنوں میں لوگوں کو کھانا فراہم کر رہا ہے۔

    رپورٹ کے مطابق یہ پہلے ہی طے تھا کہ جوڑے کی شادی پر نشریاتی اداروں کی جانب سے جو منافع حاصل ہوگا وہ جوڑا اپنی مرضی سے کسی بھی ادارے کو عطیہ کرسکے گا۔

    یہ رقم دراصل شادی کو نشر کرنے کے حقوق کی فروخت سے حاصل ہوئی ہے جس کا بڑا حصہ برطانوی نشریاتی ادارے بی بی سی سے حاصل ہوا ہے۔

    دوسری جانب جوڑے نے اس رقم کو عطیہ کرنے کے لیے جس ادارے کا انتخاب کیا ہے وہ کسی اور کا نہیں بلکہ کنٹربری چرچ کے اس بشپ کا ہے جنہوں نے جوڑے کی شادی کی رسومات ادا کیں۔

    ہیری اور میگھن نے چند ماہ قبل مذکورہ ادارے کی سرگرمیوں کا جائزہ بھی لیا تھا، جبکہ رقم عطیہ کرنے سے پہلے انہوں نے بشپ سے فون پر گفتگو بھی کی جنہوں نے کرونا وائرس کے بحران کے دوران ادارے کی امدادی سرگرمیوں کے بارے میں آگاہ کیا۔

    بشپ نے خطیر رقم عطیہ کرنے پر جوڑے کا شکریہ ادا کیا ہے اور امید ظاہر کی ہے کہ اس رقم سے ان کی امدادی سرگرمیوں میں مزید وسعت پیدا ہوگی۔

    بشپ کا ادارہ اس سے قبل متوسط طبقے کے اسکولوں میں بچوں کو ناشتہ اور ظہرانہ فراہم کر رہا تھا تاہم اب کرونا وائرس کے بحران میں ادارے نے خاندانوں کو کھانا دینا شروع کردیا ہے۔

  • ہیری اور میگھن نے شاہی زندگی کو الوداع کہہ دیا

    ہیری اور میگھن نے شاہی زندگی کو الوداع کہہ دیا

    برطانوی شاہی جوڑے شہزادہ ہیری اور ان کی اہلیہ میگھن مرکل نے بالآخر شاہی زندگی کو الوداع کہہ دیا، اپنی آخری پوسٹ میں جوڑے نے سب کا شکریہ ادا کیا ہے۔

    ہیری اور میگھن مرکل کے شاہی جوڑے کی حیثیت سے استعمال کیے جانے والے انسٹاگرام اکاؤنٹ سے آخری پوسٹ شیئر کردی گئی۔

    سسکیس رائل کے اکاؤنٹ سے جوڑے کی جانب سے شیئر کی گئی پوسٹ میں کہا گیا، اس کمیونٹی کا شکریہ، سپورٹ کرنے کے لیے، متاثر کرنے کے لیے اور دنیا کو بہتر بنانے میں مدد کرنے کے لیے۔

     

    View this post on Instagram

     

    As we can all feel, the world at this moment seems extraordinarily fragile. Yet we are confident that every human being has the potential and opportunity to make a difference—as seen now across the globe, in our families, our communities and those on the front line—together we can lift each other up to realise the fullness of that promise. What’s most important right now is the health and wellbeing of everyone across the globe and finding solutions for the many issues that have presented themselves as a result of this pandemic. As we all find the part we are to play in this global shift and changing of habits, we are focusing this new chapter to understand how we can best contribute. While you may not see us here, the work continues. Thank you to this community – for the support, the inspiration and the shared commitment to the good in the world. We look forward to reconnecting with you soon. You’ve been great! Until then, please take good care of yourselves, and of one another. Harry and Meghan

    A post shared by The Duke and Duchess of Sussex (@sussexroyal) on

    اپنی پوسٹ میں جوڑے نے کہا کہ وہ انہیں مزید یہاں (انسٹاگرام) پر نہیں دیکھ سکیں گے تاہم ان کی فلاحی خدمات جاری رہیں گی۔

    جوڑا آج یعنی 31 مارچ کو اپنے شاہی لقب یعنی سسکیس رائل سے دستبردار ہوجائے گا اور اس کے ساتھ ہی گزشتہ کئی ماہ سے شہ سرخیوں میں رہنے والے اس شاہی تنازعے کا بھی اختتام ہوجائے گا۔

    ہیری اور میگھن نے گزشتہ برس شاہی خاندان سے علیحدگی اور معاشی طور پر خود مختاری کا اعلان کیا تھا۔

    شاہی جوڑے نے اپنے بیان میں کہا تھا کہ وہ شاہی پروٹوکول چھوڑ کر عام انسانوں کی طرح زندگی بسر کرنا چاہتے ہیں اور اب وہ مستقبل میں اپنے فلاحی و دیگر کاموں پر توجہ دیں گے۔

    شاہی خاندان سے علیحدگی کے بعد ہیری اور میگھن ’ہز اینڈ ہر رائل ہائی نیس‘ کے شاہی القابات، سرکاری مالی امداد اور دیگر شاہی مراعات سے محروم ہوچکے ہیں۔

    دونوں اپنے شیر خوار بیٹے آرچی کے ساتھ پہلے کینیڈا منتقل ہوئے تاہم اب کہا جارہا ہے کہ جوڑا امریکی ریاست کیلی فورنیا منتقل ہونے جارہا ہے۔