لاہور : پشتونخوا ملی عوام پارٹی کے سربراہ محمود خان اچکزئی نے لاہوریوں کو طعنے دے کران کی توہین کی جس پر اہلیان لاہور نے ان پر شہر میں داخلے پر پابندی کا مطالبہ کردیا۔
گزشتہ روز لاہور میں ہونے والے پی ڈی ایم کے جلسے سے خطاب میں محمود خان اچکزئی نے لاہور والوں سے متعلق کچھ منفی اظہار خیال کیا جس پر لاہور کے شہریوں نے سخت ناپسندیدگی کا اظہار کیا ہے۔
اس حوالے سے اے آر وائی نیوز سے گفتگو کرتے ہوئے لاہور کے شہریوں نے کہا کہ ان کے بیان سے ہمارے دلوں کو تکلیف پہنچی، ان کو سیاست کرنی ہے کریں لیکن اس سے ہٹ کر کوئی بات نہ کریں۔
ایک شہری کا کہنا تھا کہ آج لاہور والوں پر بہت برے الزامات لگائے گئے، ایسے لوگوں کو اس شہر میں داخل نہ ہونے دیا جائے، ان کو سوچ سمجھ کر بات کرنی چاہیے۔
یاد رہے کہ جلسے سے خطاب میں محمود خان اچکزئی نے الزام عائد کیا کہ لاہوریوں نے انگریزوں کے ساتھ مل کر افغان سرزمین پر قبضے کی کوشش کی،۔
انہوں نے ن لیگ اور پی پی کی قیادتوں کی موجودگی میں کہا کہ مجھے دکھ ہے کہ لاہور یوں نے انگریزوں کا ساتھ دیا انہوں نے کہا کہ جہاں کلمہ پڑھا جاتا تھا وہ سب انگریزوں کے قبضے میں چلے گئے، ان کا کہنا تھا کہ واحد افغانستان ہے جو انگریزوں کے خلاف کھڑا رہا۔
