واشنگٹن: نو منتخب امریکی صدر کی اہلیہ میلانیا ٹرمپ نے خاتونِ اوّل بننے سے پہلے ہی اپنی کرپٹو کرنسی لانچ کر دی، یوں میلانیا ٹرمپ بھی میم کوائنز کے بڑھتے ہوئے رجحان میں شامل ہو گئی ہیں۔
یہ اعلان ڈونلڈ ٹرمپ کی جانب سے ’ٹرمپ کرپٹو کرنسی‘ کے آغاز کے ایک دن بعد سامنے آیا ہے، مارکیٹ میں دونوں سکّوں نے ترقی کی ہے تاہم اس کی تجارت غیر مستحکم رہی۔
میلانیا نے سوشل میڈیا پلیٹ فارم ایکس پر اتوار کو پوسٹ میں لکھا ’’آفیشل ’میلانیا میم‘ اب لائیو ہے، آپ ابھی $MELANIA خرید سکتے ہیں۔ ’آفیشل میلانیا میم‘ کی ویب سائٹ کا کہنا ہے کہ یہ ایک کرپٹو کرنسی ہے، جسے سولانا بلاکچین پر بنایا گیا ہے، اور اسی پر اس کی ٹریکنگ کی جا رہی ہے۔
میلانیا کوئن نے ڈونلڈ ٹرمپ کے کرپٹو کوائن کو کریش کر دیا جس کے بعد اس کرنسی کی مارکیٹ کیپیٹلائزشین ساڑھے 5 ارب ڈالر تک پہنچ چکی ہے۔
اس سے قبل ڈونلڈ ٹرمپ نے بھی اپنی کرپٹو کرسنی لانچ کی تھی، ٹرمپ کی کرپٹو کرنسی لانچ ہونے کے 24 گھنٹوں کے اندر مارکیٹ کیپٹلائزیشن کئی ارب ڈالر تک پہنچ گئی تھی۔
واضح رہے کہ اس کرنسی سے کچھ خریداری نہیں کی جا سکے گی لیکن پھر بھی مداح دھڑا دھڑ کرنسی خرید رہے ہیں، ٹرمپ کا کہنا ہے کہ یہ ایک آفیشل میم ہے، تاہم ابھی یہ واضح نہیں کہ ٹرمپ اور ملانیا اس منصوبے سے کتنے ڈالرز کما سکتے ہیں۔
