Tag: meteorologist

امریکی نیوز چینل کی میزبان کو خبریں پڑھتے پڑھتے ایک مضحکہ خیز صورتحال سے گزرنا پڑا جسے دیکھ کر وہ اپنی ہنسی نہ روک پائی ، سوشل میڈیا پر ویڈیو دیکھ کر صارفین بھی مسکرائے بغیر نہ رہ سکے۔

امریکا کے ایک مقامی نیوز چینل پر موسم کی خبریں سنانے والی ایک اینکر کو اس وقت خوشگوار حیرت کا سامنا کرنا پڑا خبریں پڑھتے پڑھتے اچانک اس کی تصویر کا حرکت کرتا عکس درجن سے زائد مرتبہ سامنے آگیا۔

کیمرے کی فنی خرابی کے باعث نیوز کاسٹر جینیفر میکڈرمڈ کے متعدد عکس نمایاں ہو نے لگے تو اسے دیکھ کر وہ پہلے تو حیران ہوئی پھر بجائے گھبرانے کے صورتحال کو فوری طور پر بہت ماہرانہ انداز  سے قابو میں کیا۔

غیر ملکی خبر رساں ادارے کی رپورٹ کے مطابق نیوز کاسٹر جینیفر میکڈرمڈ نے اس فنی خرابی سے محظوظ ہونا شروع کیا اور خوشگوار موڈ میں اپنے ہاتھوں کو لہراتے ہوئے اس پر اپنے خیالات کا بھی اظہار کرتی ہے۔

میزبان کا مسکراتے ہوئے کہنا تھا کہ میرے ساتھ مجھ جیسے بہت سارے لوگ موجود ہیں، یہ کیا ہورہا ہے مجھے بہت حیرت ہورہی ہے، مجھے ان لوگوں سے الگ کرو۔

کچھ دیر بعد چینل کی تیکنکی ٹیم نے اس فنی خرابی کو دور کردیا اور صورتحال معمول پر آگئی۔ موسم کی خبروں کی یہ ویڈیو سوشل میڈیا پر خوب وائرل ہورہی ہے۔

اب تک5لاکھ 11ہزار سے زائد صارفین اسے دیکھ چکے ہیں جبکہ اس ویڈیو کو ہزاروں افراد نے شیئر بھی کیا اور اس منظر پر اپنے مزاحیہ کمنٹس بھی کئے۔

ایک صارف کا کہنا تھا کہ مجھے یہ بات بہت پسند آئی کہ نیوز کاسٹر اچانک ہونے والی اس فنی خرابی سے بروقت کس طرح محظوظ ہوئی اور حالات کو کنٹرول کیا، ایک اور صارف نے کہا کہ میں اس ویڈیو کو دیکھ کر بے اختیار ہنس پڑا۔