کراچی: شہر قائد کے علاقے سائٹ ایریا، میٹروول میں شادی کی ایک تقریب میں شدید ہوائی فائرنگ سے علاقہ گونج اٹھا۔
تفصیلات کے مطابق شادیوں میں فائرنگ ممنوع ہونے کے باوجود شہر کے مختلف علاقوں میں فائرنگ کے واقعات سامنے آتے رہتے ہیں، میٹروول اور اس سے متصل فرنٹیئر کالونی میں تقریباً پر شادی میں شدید ہوائی فائرنگ معمول ہے، تاہم پولیس کی جانب سے اس کی روک تھام کے لیے کوئی کارروائی نہیں کی جاتی۔
حال ہی میں میٹروول کے علاقے میں ایک شادی کی تقریب کے دوران لڑکوں نے زبردست ہوائی فائرنگ کی، جس کی ویڈیوز بھی سامنے آ گئی ہیں۔
ویڈیوز میں دیکھا جا سکتا ہے کہ متعدد افراد چھوٹے بڑے ہتھیاروں سے دن میں فائرنگ کر رہے ہیں، فائرنگ کے دوران اطراف کے چند گھروں کی دیواروں پر بھی گولیاں لگیں، سیمنٹ کی چھتوں میں بھی گولیاں لگنے سے سوراخ ہوئے۔ دن دہاڑے شدید ہوائی فائرنگ کے باعث علاقے میں خوف و ہراس پھیل گیا تھا۔
ویڈیوز سامنے آنے کے بعد بھی تاحال پولیس نے کسی کو گرفتار نہیں کیا، بلکہ پولیس کا کہنا ہے کہ نوجوانوں کی ہوائی فائرنگ کی ویڈیو سوشل میڈیا پر دیکھی ہے، جس کی تحقیقات کی جا رہی ہے، تصدیق ہو جانے پر مقدمہ درج کریں گے۔
