نوشہرہ: عوامی نیشنل پارٹی کے جنرل سیکرٹری اورسابق صوبائی وزیرِاطلاعات میاں افتخارحسین کو نوجوان قتل کیس سے ضمانت پررہا کردیا۔
تفصیلات کے مطابق آج صبح بروز منگل نوشہرہ کی عدالت میں اے این پی کے رہنما کو تحریک انصاف سے تعلق رکھنے والے نوجوان حبیب اللہ کے قتل کے الزام میں عدالت میں پیش کیا گیا تھا۔
میاں افتخار اور ان کے محافظ کو اتوار کی صبح خیبرپختونخواہ پولیس نے پی ٹی آئی کے کارکن کے قتل کے الزام میں گرفتار کیا تھا۔
میاں افتخار کے خلاف ایف آئی آرتحریک انصاف کے کارکن شیرخان نے پبی تھانے میں درج کرائی تھی جس کے نتیجے میں انہیں ان کے گھر سے حراست میں لیا گیا تھا۔
گزشتہ روزپیشی کے موقع پرعدالت میں مقتول حبیب اللہ کے والد نے بیانِ حلفی دیا کہ میاں افتخار کا ان کے بیٹے کے قتل سے کوئی تعلق نہیں ہے۔
مقتول کے والد کے بیان کے بعد عدالت نے کاروائی ایک دن کے لئے ملوتی کرتے ہوئے میاں افتخار کو مزید ایک دن کے لئے ریمانڈ پر بھیج دیا تھا۔
آج صبح عدالت نے مقدمے کی سماعت کے دوران میاں افتخار حسین کی ضمانت منظور کرتے ہوئے دو لاکھ روپے سکہ رائج الوقت بطور زرِضمانت کا مچلکہ جمع کرانے کا حکم دیا۔
میاں افتخار نے گزشتہ روز میڈیا سے گفتگو کرتے ہوئے کہا تھا کہ’’ میں باچا خان کا پیروکارہوں اورعدم تشدد کے فلسفے کا قائل ہوں کسی کو قتل کرنے کا سوچ بھی نہیں سکتا‘‘۔
انہوں نےحکومتی جماعت تحریک انصاف کے سربراہ عمران خان سے مطالبہ بھی کیا تھا کہ تحقیق کی جائے کہ ان کا نام کس کی ایما پر مقدمے میں شامل کیا تھا۔
