ARYNews.tv | Urdu – Har Lamha Bakhabar

Tag: Mike Pence

  • مائیک پنس ڈونلڈ ٹرمپ کے خلاف گواہ بن گئے، سابق صدر کی مشکلات میں‌ اضافہ

    مائیک پنس ڈونلڈ ٹرمپ کے خلاف گواہ بن گئے، سابق صدر کی مشکلات میں‌ اضافہ

    واشنگٹن: امریکا کے سابق نائب صدر مائیک پنس ڈونلڈ ٹرمپ کے خلاف گواہ بن گئے ہیں، جس سے سابق صدر کی مشکلات میں‌ اضافہ ہو گیا ہے۔

    تفصیلات کے مطابق سابق نائب صدر مائیک پینس جو کبھی ٹرمپ کے انتہائی وفادار ساتھی تھے، اب وہ ان کے خلاف 2020 کے الیکشن کو الٹانے کی سازش کے کیس میں استغاثہ کے اہم گواہ بن گئے ہیں۔

    واضح رہے کہ مائیک پنس آئندہ الیکشن کے لیے خود بھی ری پبلکنز صدارتی نامزدگی کی دوڑ میں شامل ہیں۔ انھوں نے کہا آئین سے ماورا شخص کو صدر بننے کا حق نہیں ہے، الیکشن نتائج کے روز سے اب تک ٹرمپ نے جو کہا جھوٹ کہا۔

    سابق نائب صدر کا کہنا تھا کہ الیکشن نتائج الٹنے کی کوشش پر ڈونلڈ ٹرمپ کو نا اہل قرار دیا جانا چاہیے۔ یاد رہے کہ مائیک پنس نے امریکی صدارتی الیکشن نتائج مسترد کرنے سے انکار کیا تھا، انھوں نے الزام لگایا کہ ان پر بھی ٹرمپ کی طرف سے نتائج الٹانے میں مدد کرنے کے لیے دباؤ ڈالا گیا۔

    دوسری طرف میکارتھی نے صدر جو بائیڈن کے بیٹے ہنٹر کے کاروباری معاملات کی تحقیقات سے توجہ ہٹانے کی سیاسی کوشش کے طور پر فرد جرم عائد کی ہوئی ہے۔

  • سابق نائب صدر مائیک پنس بھی ٹرمپ کے خلاف میدان میں آ گئے

    سابق نائب صدر مائیک پنس بھی ٹرمپ کے خلاف میدان میں آ گئے

    واشنگٹن: امریکی الیکشن میں ڈونلڈ ٹرمپ کا مقابلہ کرنے کے لیے ان کے سابق نائب صدر مائیک پنس بھی میدان میں کود گئے ہیں۔

    امریکی میڈیا کے مطابق مائیک پنس اپنے سابق باس کے خلاف کھڑے ہو گئے ہیں، وہ ڈونلڈ ٹرمپ کے نائب صدر رہے ہیں، اور 6 جنوری کے فسادیوں کے ہاتھوں نقصان سے بال بال بچ گئے تھے، انھوں نے اگلے سال ریپبلکن صدارتی نامزدگی کے لیے اپنی امیدواری کا اعلان کر دیا ہے۔

    پنس نے اگرچہ فیڈرل الیکشن کمیشن میں کاغذات جمع کرا دیے ہیں تاہم وہ بدھ کو اپنی 64 ویں سالگرہ کے موقع پر آئیووا میں ایک تقریب میں باقاعدہ اس کا آغاز کریں گے۔

    دی گارڈین کے مطابق پنس کے اس قدم کی طویل عرصے سے توقع کی جا رہی تھی لیکن وہ کبھی پولنگ میں نمایاں نہیں رہے، وہ جنوبی کیرولائنا کی سابق گورنر نکی ہیلی کے بعد مقابلے میں تیسرے نمبر پر ہیں۔

    دیگر امیدواروں میں ساؤتھ کیرولائنا کے سینیٹر ٹم سکاٹ، آرکنساس کے سابق گورنر آسا ہچنسن اور بائیوٹیک انٹرپرینیور وویک رامسوامی شامل ہیں۔ ٹرمپ، نکی ہیلی، ران ڈیسانٹس بھی ریپبلکنز نامزدگی حاصل کرنے کے لیے متحرک ہیں۔

    رائے عامہ کے جائزوں میں ٹرمپ صدارتی امیدوار کی نامزدگی میں بدستور سرفہرست ہیں، واضح رہے کہ ریپبلکنز نامزدگی حاصل کرنے والا امیدوار آئندہ سال صدر جو بائیڈن کے خلاف الیکشن لڑے گا۔

  • ٹرمپ کو ایک اور جھٹکا : قریبی ساتھی نے بھی ساتھ دینے سے انکار کردیا

    ٹرمپ کو ایک اور جھٹکا : قریبی ساتھی نے بھی ساتھ دینے سے انکار کردیا

    واشنگٹن : امریکی صدر ڈونلڈ ٹرمپ کے قریبی ساتھی نائب مائیک پینس جو نائب صدر بھی ہیں، نے ٹرمپ کی توقعات پر پانی پھیر دیا، وہ جوبائیڈن کیخلاف ہونے والے قانونی اقدام سے لاتعلق ہوگئے۔

    مائیک پینس نے صدارتی انتخاب میں جو بائیڈن کی جیت کے پارلیمنٹ کے سرٹیفکیٹ کو کالعدم قرار دینے کے لئے قانونی کارکن لوئس گوہارٹ کی زیر قیادت شروع کئے گئے اقدام کی حمایت کرنے سے انکار کردیا ہے۔

    امریکی صدر ڈونلڈ ٹرمپ کو انتخابات میں شکست کے بعد بڑا دوسرا بڑا جھٹکا اس وقت لگا جب سبکدوش ہونے والے امریکی نائب صدر مائیک پینس نے صدارتی انتخاب میں جو بائیڈن کی جیت کے پارلیمنٹ کے سرٹیفکیٹ کو کالعدم قرار دینے کے لئے قانونی کارکن لوئس گوہارٹ کی زیر قیادت شروع کئے گئے اقدام کی حمایت کرنے سے انکار کردیا۔

    غیر ملکی خبر رساں ادارے کے مطابق مسٹر گوہارٹ اور ریاست ایریزونا سے تعلق رکھنے والے 11 ووٹروں نے عدالت میں ایک مقدمہ دائر کیا جس میں یہ دعویٰ کیا گیا تھا کہ صرف مسٹر پینس کو ہی ان ووٹروں کا تعین کرنے کا حق ہونا چاہئے جن کے ووٹ کانگریس کو جائیں گے۔

    مسٹر پینس کے خلاف منگل کو دائر ایک نئے مقدمے میں استغاثہ نے کہا کہ انہوں نے قانونی چارہ جوئی کے بغیر اس مسئلے کو حل کرنے کی کوشش کی لیکن ان کی حمایت حاصل نہیں ہوسکی جس کے بعد عدالت کا دروازہ کھٹکھٹایا گیا۔

    استغاثہ کے وکیل نے معاہدے کے ذریعہ قانونی مسائل کو حل کرنے کی ایک مثبت کوشش قرار دیا جس میں نائب صدر کے وکیل کو مشورہ دینا بھی شامل تھا یہ کوشش حالانکہ ناکام رہی جس کے بعد مقدمہ دائر کیا گیا۔

    واضح رہے کہ صدر ٹرمپ انتخابات سے قبل اور نتائج آنے کے بعد بھی اس بات کو ماننے کے لئے آج بھی تیار نہیں ہیں کہ وہ ہار بھی سکتے ہیں اور ابھی بھی ان کی ہر ممکن کوشش ہے کہ ان انتخابی نتائج کو کسی طرح غلط اور غیرقانونی قرار دلادیں۔

  • اوباما کی پالیسی ایران نوازی پر مبنی تھی، مائیک پنس

    اوباما کی پالیسی ایران نوازی پر مبنی تھی، مائیک پنس

    واشنگٹن : امریکی نائب صدر مائیک پنس نے ٹویٹ میں کہا ہے کہ ڈونلڈ ٹرمپ نے قاسم سلیمانی کو کیفرکردار تک پہنچا کر بہت اچھا کیا۔

    تفصیلات کے مطابق امریکا کے نائب صدر مائیک پنس نے سابق صدر باراک اوباما کی انتظامیہ پر ایران کے ساتھ روا رکھے گئے سلوک پرکڑی تنقید کرتے ہوئے کہا ہے کہ سابق صدر نے ایرانی پالیسی کو نظرانداز کیا اور ایران کی جھولی میں اربوں ڈالر کی رقم ڈالی۔

    امریکی نائب صدر کا کہنا تھا کہ سابق صدر نے ایران کے ساتھ نام نہاد جوہری معاہدہ کیا اور اس معاہدے سے ایران نے خوب فائدہ اٹھایا اور ایران کو بیرون ملک منجمد اس کے اربوں ڈالر مل گئے۔

    سماجی رابطے کی ویب سائٹ ٹویٹر پر پوسٹ کی گئی ایک ٹویٹ میں مائیک پنس کا کہنا تھا کہ صدر ڈونلڈ ٹرمپ نے تہران کے ساتھ طے پایا جوہری معاہدہ ختم اور پاسداران انقلاب کی ‘قدس’ فورس کے سربراہ کمانڈر قاسم سلیمانی کو قتل کرکے بہت اچھا کیا۔

    امریکی نائب صدر نے کہا کہ سابق صدر کی پالیسی ایران نوازی پرمبنی تھی، انہوں نے ایرانی دہشت گردوں کو اربوں ڈالر کی رقم سے نوازا۔

    مائیک پنس کا مزید کہنا تھا کہ صدر ڈونلڈ ٹرمپ نے ایران کے ساتے طے پائے معاہدے کو منسوخ کیا اور ایک ایسے شخص کو جس کے ہاتھ امریکیوں کے خون سے رنگین تھے کو کیفر کردار تک پہنچایا، سلیمانی اب نہیں رہا اور نہ ہی ایرانی دہشت گردوں کے لیے اب ڈالر ہوں گے۔

  • میکسیکوسرحد کومحفوظ بنانےکےلیےمزید اقدامات کرنا ہوں گے‘ مائیک پنس

    میکسیکوسرحد کومحفوظ بنانےکےلیےمزید اقدامات کرنا ہوں گے‘ مائیک پنس

    واشنگٹن: امریکی نائب صدر مائیک پنس کا کہنا ہے کہ کانگریس سے اسمگلنگ کی روک تھام کے لیے 675 ملین ڈالرزمنظورکیے جائیں۔

    تفصیلات کے مطابق امریکی نائب صدر مائیک پینس نے صحافیوں سے گفتگوکرتے ہوئے کہا کہ میکسیکوسرحد کومحفوظ بنانے کے لیے مزید اقدامات کرنا ہوں گے۔

    انہوں نے کہا کہ کانگریس کو دیوارکے لیے 5.7 ارب ڈالرزمنظورکرنا ہوں گے، اراکین کانگریس شٹ ڈاؤن ختم ہونے تک کسی بات پرتیارنہیں۔

    امریکی نائب صدر نے کہا کہ 750 اضافی پٹرول ایجنٹس کے لیے211 ملین ڈالرزمنظورکیے جائیں، سرحد پر2 ہزاراضافی اہلکاروں کے لیے 571 ملین ڈالرزمنظورکیے جائیں۔

    مائیک پینس کا صحافیوں سے گفتگو کرتے ہوئے کہنا تھا کہ سرحد پر52 ہزاربستروں کے جیل کے لیے 4.2 ارب ڈالرزمنظورکیے جائیں، اسمگلنگ کی روک تھام کے لیے 675 ملین ڈالرزمنظورکیے جائیں۔

    میکسیکو سرحد پر دیوار کی تعمیر کیلئے ملک میں ایمرجنسی نافذ کرسکتا ہوں: ڈونلڈ ٹرمپ

    یاد رہے کہ تین روز قبل امریکی صدر ڈونلڈ ٹرمپ نے دھمکی دی تھی کہ میکسیکو سرحد پر دیوار کی تعمیر کے لیے ملک میں ایمرجنسی کا نفاذ بھی کرسکتا ہوں۔

    ڈونلڈ ٹرمپ کا کہنا تھا کہ میں کسی کو دھمکی نہیں دے رہا، مجھے دھمکی دینے کی اجازت ہے، دیوار کی تعمیر کے لیے سرحد پر موجود نجی زمینوں پر قبضہ بھی کیا جاسکتا ہے۔

  • امریکی نائب صدر کی ناصرالملک کو نگراں وزیراعظم کا عہدہ سنبھالنے پر مبارکباد

    امریکی نائب صدر کی ناصرالملک کو نگراں وزیراعظم کا عہدہ سنبھالنے پر مبارکباد

    واشنگٹن : امریکی نائب صدر نے ناصرالملک کو نگراں وزیراعظم کا عہدہ سنبھالنے پر مبارکباد دی اور امریکی صدر ڈونلڈ ٹرمپ کی جانب سے نگراں حکومت کیلئے نیک خواہشات کا پیغام دیا۔

    تفصیلات کے مطابق نگران وزیراعظم ناصرالملک سے امریکی نائب صدر مائیک پینس کا ٹیلی فونک رابطہ ہوا ، امریکی نائب صدر نے ناصرالملک کو نگراں وزیراعظم کا عہدہ سنبھالنے پر مبارکباد دی۔

    ٹیلی فونک گفتگو میں دونوں رہنماؤں کا پاک امریکا تعلقات مضبوط بنانے کی اہمیت پر اتفاق ہوا جبکہ افغانستان میں امن کے مشترکہ ہدف کے حصول کی کوششیں جاری رکھنے پر بھی اتفاق کیا گیا۔

    نائب امریکی صدر نے کہا توقع ہے ناصرالملک پاکستان میں انتخابات کرانے کے مینڈیٹ کو پورا کریں گے۔

    مائیک پینس نے امریکی صدر ڈونلڈ ٹرمپ کی جانب سے نگراں حکومت کیلئے نیک خواہشات کا اظہار کیا۔

    نگران وزیراعظم ناصر الملک نے امریکی نائب صدر کا شکریہ ادا کرتے ہوئے کہا کہ منتخب حکومت کو اقتدار کی منتقلی کے لیے تمام اقدامات بروئے کار لائیں گے۔

    یاد رہے کہ نگران وزیراعظم جسٹس (ر) ناصرالملک نے یکم جون کو اپنے عہدے کا حلف اٹھایا تھا ، تقریب حلف برداری کے بعد نگراں وزیراعظم وزیراعظم ہاؤس پہنچے تھے، جہاں ان کے اعزاز میں گارڈ آف آنر بھی پیش کیا گیا تھا۔

    نگراں وزیر اعظم کا کہنا تھا کہ جو میرا مینڈیٹ ہے اس کے مطابق کام کروں گا، شفاف انتخابات کا انعقاد اولین ترجیح ہے، انشا اللہ عام انتخابات بر وقت ہی ہوں گے۔

    واضح رہے کہ عام انتخابات 2018 کا انعقاد 25 جولائی کو کیا جائے گا، جس کے لیے الیکشن کمیشن کی جانب سے شیڈول جاری کیا جاچکا ہے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں

  • امریکی نائب صدر کی شمالی کوریا کو ملاقات منسوخ کرنے کی دھمکی

    امریکی نائب صدر کی شمالی کوریا کو ملاقات منسوخ کرنے کی دھمکی

    واشنگٹن: امریکی نائب صدر مائیک پینس نے شمالی کوریا کو دھمکی دیتے ہوئے کہا ہے کہ 12 جون کو شمالی کوریا کے سربراہ سے ہونے والی ملاقات منسوخ کرسکتے ہیں۔

    غیر ملکی خبر رساں ادارے کے مطابق امریکی نائب صدر مائیک پینس نے شمالی کوریا کے رہنما کم جونگ ان کو متنبہ کیا ہے کہ وہ اگلے ماہ صدر ٹرمپ سے ہونے والی ملاقات کو سنجیدگی سے لیں ورنہ ٹرمپ میٹنگ سے واک آؤٹ بھی کرسکتے ہیں۔

    انہوں نے کہا کہ اگر شمالی کوریا امریکی صدر کے ساتھ کھیلنے کی سوچ بھی رکھتا ہے تو یہ ایک سنگین غلطی ہے، امریکا شمالی کوریا کا جوہری معاہدے جاری رکھنے کو مزید برداشت نہیں کرے گا، امید ہے کہ شمالی کوریا اپنا جوہری پروگرام ترک کردے گا۔

    دوسری جانب شمالی کوریا کے دعوت نامے پر شمالی کوریا کے دعوت نامے پر تقریبا دو درجن غیر ملکی صحافیوں نے شمالی کوریا کا رخ کرلیا ہے، جہاں وہ شمالی کوریا کے جوہری پروگرام کو منسوخ ہوتے دیکھیں گے۔

    مزید پڑھیں: شمالی کوریا کی امریکا کو صدر ٹرمپ سے ملاقات منسوخ کرنے کی دھمکی

    واضح رہے کہ امریکا کی جانب سے شمالی کوریا کے حکام پر ایٹمی ہتھیاروں کے تلفی کے لیے غیر ضروری دباؤ ڈالے جانے پر شمالی کوریا نے امریکا کو خبردار کیا ہے کہ اگر رویہ تبدیل نہ کیا تو ڈونلڈ ٹرمپ ساتھ طے شدہ ملاقات منسوخ بھی ہوسکتی ہے۔

    نائب وزیر خارجہ کم کی گوان نے امریکا کے قومی سلامتی کے مشیر جان بولٹن کی جانب اشارہ کرتے ہوئے کہا کہ ہم ماضی میں بولٹن کی شخصیت پر روشنی ڈال چکے ہیں اور جان بولٹن سے ہماری بیزاری چھپی ہوئی نہیں ہے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • امریکی سفارت خانہ 2019 میں یروشلم منتقل کردیں گے‘ مائیک پنس

    امریکی سفارت خانہ 2019 میں یروشلم منتقل کردیں گے‘ مائیک پنس

    تل ابیب: امریکی نائب صدر مائیک پنس کا کہنا ہے کہ امریکہ سفارت خانہ 2019 میں تل ابیب سے یروشلم منتقل کردیا جائے گا۔

    تفصیلات کے مطابق امریکی نائب صدر مائیک پنس نے اسرائیلی پارلیمنٹ سے خطاب کرتے ہوئے کہا کہ امریکی سفارت خانہ 2019 کے آخر تک یروشلم منتقل کردیا جائے گا۔

    امریکی نائب صدر کی تقریر کے دوران اسرائیلی پارلیمنٹ کے عرب ممبران کی جانب سے احتجاج کیا گیا جس کے باعث مائیک پنس کو اپنی تقریر روکنی پڑی۔

    اسرائیلی پارلیمنٹ میں احتجاج کرنے والے عرب ممبران نے ’یروشلم فلسطین کا دارالحکومت‘ کے بینرزاٹھا رکھے تھے۔

    امریکی نائب صدر مائیک پنس نے تقریر کے دوران فلسطینی قیادت سے کہا کہ وہ مذاکرات کی میز پردوبارہ آئیں۔

    دوسری جانب فلسطینی صدرمحمود عباس امریکی نائب صدر سے ملاقات کے بجائے برسلز روانہ ہوگئے۔

    خیال رہے کہ گزشتہ ماہ 8 دسمبرکو امریکہ نے فلسطین کودھمکی دی تھی کہ امریکی نائب صدرمائیک پینس سے فلسطینی صدرکی ملاقات منسوخ کرنے کے نتائج اچھے نہیں ہوں گے۔

    فلسطینی صدرنےامریکی نائب صدرسےملاقات منسوخ کردی

    بعدازاں فلسطینی صدر کے سیاسی مشیر ماجدی الخالدی کی جانب سے امریکی بیان پرردعمل سامنے آیا تھا کہ فلسطین میں امریکی نائب صدر مائیک پنس سے کوئی ملاقات نہیں ہوگی۔

    یاد رہے کہ رواں ماہ 15 جنوری کو فلسطینی صدرمحمود عباس نے کہا کہ امریکہ کی جانب سے یروشلم کو اسرائیلی دارالحکومت تسلیم کرنے کے بعد ان کی جانب سے کسی امن منصوبے کو قبول نہیں کریں گے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

  • دہشت گردوں کو پناہ دینےسےپاکستان کوبہت کچھ کھونا پڑے گا‘ مائیک پنس

    دہشت گردوں کو پناہ دینےسےپاکستان کوبہت کچھ کھونا پڑے گا‘ مائیک پنس

    کابل: امریکی نائب صدرمائیک پنس کا کہنا ہے کہ امریکہ کی شراکت داری سے پاکستان کو بہت کچھ حاصل ہوگا جبکہ دہشت گردوں کو پناہ دینے سے پاکستان کو بہت کچھ کھونا پڑے گا۔

    غیرملکی خبررساں ادارے کے مطابق نائب امریکی صدر مائیک پنس نے افغانستان کا غیراعلانیہ دورہ کیا اور افغان صدر اشرف غنی سے ملاقات کی۔

    امریکی نائب صدر مائیک پنس نے افغان صدر سے ملاقات سے متعلق کہا کہ افغان الیکشن کمیشن 2018 کے پارلیمانی انتخابات کی تیاری کررہا ہے۔

    مائیک پنس کا کہنا تھا کہ یقین ہے کہ ہم افغانستان میں فتح سے زیادہ قریب ہوگئے ہیں۔ ان کا کہنا تھا کہ امریکہ کو درپیش خطرے کے خاتمے تک امریکی فورسز افغانستان میں رہیں گی۔

    امریکہ نے پاکستان کو اربوں ڈالر دیئے ہیں، نتائج چاہئیں، ڈونلڈ ٹرمپ کا مطالبہ

    اس موقع پر امریکی نائب صدر مائیک پنس کا کہنا تھا دہشت گردوں کو پناہ دینے کے دن ختم ہوگئے، پاکستان کو امریکہ کی شراکت داری سے بہت کچھ حاصل ہوگا لیکن پاکستان کو دہشت گردوں کو پناہ دینے سے بہت کچھ کھونا پڑے گا۔

    پاکستان کوبتادیادہشتگردوں کےخلاف فیصلہ کن کارروائی کرناہوگی،ٹرمپ

    خیال رہے کہ 3 روز قبل امریکی صدر کا کہنا تھا کہ پاکستان کو سالانہ کروڑوں ڈالر امداد دیتے ہیں، پاکستان کو بتا دیا دہشت گردوں کے خلاف فیصلہ کن کارروائی کرنا ہوگی۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • نائب صدرسے فلسطینی صدر نے ملاقات منسوخ کی تو اچھا نہیں ہوگا، امریکا کی فلسطین کو کھلی دھمکی

    نائب صدرسے فلسطینی صدر نے ملاقات منسوخ کی تو اچھا نہیں ہوگا، امریکا کی فلسطین کو کھلی دھمکی

    واشنگٹن : امریکا نے فلسطین کودھمکی دی ہے کہ امریکی نائب صدرمائیک پینس سے فلسطینی صدرکی ملاقات منسوخ کرنے کے نتائج اچھے نہیں ہوں گے۔

    تفصیلات کے مطابق وائٹ ہاؤس کا کہنا ہے کہ رواں سال فلسطینی صدرمحمود عباس اورامریکی نائب صدرمائیک پینس کی ملاقات منسوخ ہونا نقصان دہ ہوگا۔

    صدرٹرمپ کے مقبوضہ بیت المقدس کواسرائیلی دارالحکومت تسلیم کرنے کے اعلان کے بعد فلسطینی حکام نے کہا تھا کہ فلسطینی صدر اور امریکی نائب صدرکی ملاقات نہیں ہوگی اور امریکی نائب صدر کو فلسطینی علاقوں میں خوش آمدید نہیں کہا جائے گا۔

    اس سے قبل فلسطینی صدرمحمودعباس کا کہنا تھا امریکی فیصلے سے خطے کوخطرات لاحق ہوں گے۔ ایران، مصر، مراکش سمیت دیگرممالک نےبھی امریکی صدرکے فیصلےکی شدید مذمت کی تھی۔

    مزید پڑھیں : امریکا نے یروشلم کو اسرائیلی دارالحکومت تسلیم کرلیا

    یاد رہے کہ امریکی صدرڈونلڈٹرمپ نے مقبوضہ بیت المقدس کو اسرائیل کا دارالحکومت تسلیم کرلیا، ٹرمپ کے فیصلے پر مسلمان ملکوں کی جانب سے شدید ردعمل کا اظہار کیا جارہا ہے جبکہ مختلف شہروں میں مظاہرے کئے جارہے ہیں۔

    مریکا صدر ڈونلڈ ٹرمپ کا کہنا تھا کہ کئی امریکی صدور نے اس اقدام کا سوچا تھا لیکن وہ ایسا نہیں کرسکے اس لیے یہ معاملہ کافی برسوں سے التواء کا شکار تھا جس پر میں آج سخت فیصلہ کرتے ہوئے یروشلم کو اسرائیل کا دارالخلافہ تسلیم کرنے کا اعلان کرتا ہوں اور اس مشکل کام کو انجام تک پہنچانے  پر خوشی محسوس کر رہا ہوں۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔