کراچی: وزیر تعلیم سندھ سردار شاہ کا کہنا ہے کہ فیسوں میں اضافے کا معاملہ صاحب اختیار کی وجہ سے اٹھایا گیا، تمام نجی اسکولوں کا معائنہ کیا جائے تو 90فیصد رجسٹریشن سے محروم ہوجائیں گے۔
ان خیالات کا اظہار انہوں نے میڈیا سے گفتگو کرتے ہوئے کیا، وزیرتعلیم سندھ کا کہنا تھا کہ محکمہ تعلیم سندھ نے ایکشن پلان تیار کرلیا، تعلیمی ایکشن پلان کابینہ میں پیش کیا جائے گا، ایکشن پلان کی منظوری سندھ اسمبلی سے بھی لی جائے گی۔
انہوں نے کہا کہ نجی اسکول 10فیصد فری شپ کے قانون پر عمل نہیں کرتے، سپریم کورٹ اور ہائیکورٹ نے اس معاملے پر توجہ نہیں دی، فری شپ کا قانون موجود ہے اس پر عمل درآمد کرائیں گے۔
سردار شاہ کا کہنا تھا کہ غریب بچوں کے لیے کوئی آواز نہیں اٹھاتا، صاحب حیثیت لوگوں نے فیسوں میں اضافے کی بات کی تو توجہ دی گئی۔
ان کا کہنا تھا کہ نجی اسکولوں کو تعلیمی ایکٹ پر عمل درآمد کرنا ہوگا، جو نجی اسکول تعلیمی ایکٹ پر عمل نہیں کرے گا اس کے خلاف کارروائی ہوگی، میں اپنے بچوں کو سرکاری اسکول میں داخل کراچکا ہوں۔
نجی اسکولوں نے فیسوں میں کمی کے لیٹرجاری کرنا شروع کردیے
خیال رہے کہ گذشتہ ماہ ایف آئی اے کی جانب سے فرانزک آڈٹ شروع ہونے پر اسکول مالکان نے فیس میں بیس فیصد کمی پر رضامندی ظاہر کی تھی۔
واضح رہے کہ آل پاکستان پرائیویٹ اسکولز فیڈریشن نے فیس 20 فیصد کم کرنے اور موسم گرما کی پچاس فیصد فیس واپس کرنے سے متعلق سپریم کورٹ کا فیصلہ قبول کرنے کا اعلان کیا تھا۔
