Tag: mirpurkhas

میرپورخاص: مسلم لیگ ن کے صدر اور وزیر اعلیٰ پنجاب شہباز شریف نے کہا ہے کہ ایک اخبار نے نواز شریف کے بیان کو توڑ مروڑ کر پیش کیا، کیا نواز شریف اس طرح کی بات کرسکتے ہیں۔

ان خیالات کا اظہار انہوں نے میرپورخاص کے علاقے سندھڑی میں جلسہ عام سے خطاب کرتے ہوئے کیا، شہباز شریف نے کہا کہ سمجھوتہ ایکسپریس دہشت گردی میں بھارتی فوج کا حاضر سروس کرنل ملوث نکلا۔

مسلم لیگ ن کے صدر نے کہا کہ پاکستان نے دہشت گردی کے خلاف جنگ میں ہزاروں قربانیاں دیں، کیا وہ ریاست کسی دہشت گرد کو اپنی اپنی دھرتی استعمال کرنے کی اجازت دے گی؟

شہباز شریف نے کہا کہ آصف زرداری نے سندھ تباہ کرکے دولت دبئی منتقل کردی، سندھ میں کتنے دانش اسکول بنائے گئے؟ پنجاب میں دانش اسکول بنائے جہاں غریب اور یتیم بچے پڑھتے ہیں، دانش اسکول میں مفت کھانا، وردی اور کتابیں ملتی ہیں، بچے دانش اسکول میں پڑھ کر ڈاکٹر، انجینئر بن کر امریکا چلے گئے۔

وزیر اعلیٰ پنجاب نے کہا کہ پاکستان اس لئے نہیں بنا تھا ہاری بے حال ہوجائے اور زرداری خوشحال ہوجائے، ذوالفقار علی بھٹو اور بینظیر بھٹو عظیم لیڈر تھے تاہم ن لیگ کو کامیاب کرایا تو سندھ کو پنجاب، کراچی کو لاہور بنادوں گا۔

انہوں نے کہا کہ سندھ کے عوام نہیں چاہتے تو کالا باغ ڈیم نہیں بنے گا، کالا باغ ڈیم ایک نہیں 100 بار سندھ کی محبت میں قربان کردیں گے، صوبوں کو حق کے مطابق پانی مل رہا ہے، پانی چوریاں خود کرتے ہیں اور الزام وفاق پر لگاتے ہیں۔

شہباز شریف نے کہا کہ آصف زرداری کو دس سال سندھ میں حکومت کرتے ہوئے ہوگئے، دل پر ہاتھ رکھ کر بتائیں کتنے کسانوں کو سستی کھاد ملی ہے؟ پنجاب میں کسانوں کو بلاسود قرضے دیے کیا آپ کو بلاسود قرضے ملے۔

مزید پڑھیں: ممبئی حملوں میں کالعدم تنظیمیں ملوث ہیں، نوازشریف کے بیان پربھارتی میڈیا چلّا اٹھا

واضح رہے کہ سابق وزیر اعظم نواز شریف کا کہنا تھا کہ پاکستان میں متحرک عسکریت پسند تنظیمیں ممبئی میں بھارتیوں کی ہلاکت کی ذمہ دار ہیں، نواز شریف کے متنازعہ بیان کو بھارتی میڈیا نے بھارت کی فتح قرار دیا تھا۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔