راولپنڈی: عدالت میں بدتمیزی کرنے پر وفاقی سیکریٹری کو سزا سنائے جانے کے بعد کمرہ عدالت سے گرفتار کر لیا گیا۔
تفصیلات کے مطابق راولپنڈی کے سول جج جوڈیشل مجسٹریٹ عادل سرور سیال کی عدالت میں ایک کیس میں پیش ہونے والے وفاقی سیکریٹری محمد عمر ملک کو 15 دن قید اور 2 ہزار روپے جرمانے کی سزا سنا دی گئی۔
محمد عمر ملک ایک مقدمے میں مدعی کے طور پر عدالت میں پیش ہوئے تھے، تاہم دوران سماعت انھوں نے بدتمیزی کی، جس پر عدالت نے 228 کے تحت ان کا ٹرائل کیا اور سزا کاحکم سنا دیا، جس کے بعد انھیں کمرہ عدالت میں ہتھکڑی لگائی گئی۔
فیڈرل ممبر ٹیلی کام محمد عمر ملک کو اڈیالہ جیل منتقل کیا جا رہا ہے، جرمانہ ادا نہ کرنے کی صورت میں فیڈرل سیکریٹری کو 5 روز مزید قید بھگتنا ہوگی۔ بتایا گیا ہے کہ دوران سماعت ان کا رویہ ہتک آمیز تھا، عدالت کی جانب سے کئی بار انھیں تنبیہہ کی گئی، تاہم وہ باز نہیں آئے۔
