ARYNews.tv | Urdu – Har Lamha Bakhabar

Tag: missiles

  • اسرائیل کی طرف مزید 6 میزائل داغ دیئے گئے

    اسرائیل کی طرف مزید 6 میزائل داغ دیئے گئے

    غزہ میں اسرائیلی بربریت کا سلسلہ تاحال جاری ہے، ایسے میں جنوبی لبنان سے شمالی اسرائیل کی طرف 6 میزائل داغ دیئے گئے ہیں۔

    عرب میڈیا کا اس حوالے سے کہنا ہے کہ اسرائیل کے شمالی حصے میں فضائی حملے کے سائرن کو فعال کردیا گیا ہے۔

    اس سے قبل اسرائیل کی جانب سے جنوبی لبنان پر حملہ کر کے حزب اللہ کے کمانڈروں سمیت 3 افراد کو شہید کردیا گیا تھا۔

    واضح رہے کہ غزہ جنگ کے بعد سے گزشتہ 6 ماہ سے اسرائیل اور حزب اللہ کے درمیان کشیدگی میں اضافہ ہوگیا ہے، 2006 کی اسرائیل اور حزب اللہ جنگ کے بعد سے اس میں مزید شدت آگئی ہے۔

    دوسری جانب ترک صدر نے کہا کہ اسرائیل خطے میں بڑی جنگ کو ہوا دے رہا ہے، غزہ میں نسل کشی اور ظلم کے رکنے تک خطے میں بڑے تصادم کا خطرہ ہے۔

    ترک صدر رجب طیب اردوان نے مشرقِ وسطی میں تباہی کا ذمہ دار اسرائیل وزیرِ اعظم نتین یاہو کو قرار دیا۔

    ترک صدر کا کہنا تھا کہ دمشق میں ایرانی سفارتخانے پر حملہ کرکے اسرائیل نے عالمی قانون اور ویانا کنونشن کی خلاف ورزی کی۔

    اسرائیلی فوج آباد کاروں کے حملوں کی حمایت بند کرے، اقوام متحدہ

    اُنہوں نے کہا کہ اسرائیل کی جارحیت پر خاموش رہنے والے ایرانی حملے کی مذمت میں بڑھ چڑھ کر حصہ ڈال رہے ہیں۔

  • امریکی و برطانوی فورسز نے بحیرۂ احمر میں 21 ڈرونز مار گرائے

    امریکی و برطانوی فورسز نے بحیرۂ احمر میں 21 ڈرونز مار گرائے

    امریکا اور برطانیہ کی فورسز نے بحیرۂ احمر میں فائر کیے گئے اکیس ڈرونز کو مار گرایا ہے۔

    خبر ایجنسی کے مطابق امریکا اور برطانیہ کی فورسز نے بحیرۂ احمر میں فائر کیے گئے 21 ڈرونز کو مار گرایا ہے، حوثیوں کے ڈرونز اور میزائل حملے میں کسی جہاز کو نقصان نہیں پہنچا ہے۔

    رپورٹ کے مطابق یمن کے حوثی باغیوں کی طرف سے اسرائیل پر ڈرونز سے حملے کی اب تک اکیس کوششیں ہو چکی ہیں۔

    واضح رہے کہ غزہ حملے کے بعد سے بحیرۂ احمر سمیت مختلف سمندری راستوں پر متعدد بحری جہازوں پر حملوں کے واقعات سامنے آئے ہیں۔

    ان حملوں میں یمن کے حوثی باغیوں نے مختلف بحری جہازوں کو نشانہ بنایا ہے، جن میں اسرائیل، امریکا سمیت مختلف ممالک کے بحری جہاز شامل ہیں۔

    یمن کے حوثیوں کا اس حوالے سے کہنا ہے کہ امریکا پوری دنیا کو متحرک کر لے پھر بھی بحیرۂ احمر میں جہازوں پر حملے جاری رہیں گے۔

  • ناکام میزائل تجربے پر جنوبی کورین فوج نے معافی مانگ لی

    ناکام میزائل تجربے پر جنوبی کورین فوج نے معافی مانگ لی

    سیول: امریکا اور جنوبی کوریا نے مل کر حریف شمالی کوریا کو میزائل تجربے کے ذریعے بڑا جواب دے دیا، تاہم ایک ناکام میزائل تجربے پر جنوبی کورین فوج نے معافی مانگ لی۔

    بین الاقوامی خبر رساں ایجنسی روئٹرز کے مطابق شمالی کوریا کے میزائل تجربے کے بعد امریکا اور جنوبی کوریا نے جاپان کے سمندر میں زمین سے زمین تک مار کرنے والے میزائل فائر کیے ہیں۔

    گزشتہ روز شمالی کوریا نے جاپان کے اوپر سے 4 بیلسٹک میزائل داغ دیے تھے، 2017 کے بعد یہ پہلا موقع تھا جب پیانگ یانگ نے جاپان پر سے میزائل داغے۔

    پیانگ یانگ کے میزائل تجربات کے بعد امریکا، جاپان اور جنوبی کوریا کی طرف سے بھی طاقت کا مظاہرہ کیا گیا اور مشترکہ فوجی مشقیں کی گئیں، اتحادیوں کی جانب سے غیر معمولی رد عمل دکھاتے ہوئے ایک امریکی سپر کیریئر نے شمالی کوریا کے مشرق میں نئی پوزیشن سنبھالی، اور میزائل داغے گئے۔

    تاہم، اس دوران جنوبی کوریا کی جانب سے داغا گیا ایک میزائل ناکام ہو کر گر کر تباہ ہو گیا، بی بی سی کے مطابق جنوبی کوریا کی فوج نے مشترکہ مشق کے دوران ناکام میزائل تجربے کے بعد ساحلی شہر گنگنیونگ کے رہائشیوں میں خطرے کی گھنٹی بجانے کے بعد معافی مانگ لی ہے۔

    جنوبی کورین فوج نے اس واقعے کو 7 گھنٹوں کو تسلیم نہیں کیا، تاہم بعد میں فوج نے میزائل لانچ کی ناکامی کی تصدیق کرتے ہوئے معافی مانگی، اور کہا کہ اس میں کوئی جانی نقصان نہیں ہوا ہے، فوج کا کہنا تھا کہ یہ امریکا کے ساتھ لانچ کیے گئے میزائلوں سے الگ تھا۔

  • بیروت دھماکے کی اصل وجہ امونیم نائٹریٹ نہیں کچھ اور تھی، اہم انکشاف

    بیروت دھماکے کی اصل وجہ امونیم نائٹریٹ نہیں کچھ اور تھی، اہم انکشاف

    اٹلی : دھماکہ خیز مواد کے ماہر نے انکشاف کیا ہے بیروت کی بندرگاہ پر امونیم نائٹریٹ کا ذخیرہ نہیں تھا بلکہ دھماکہ فوجی میزائل چلنے کی وجہ سے ہوا۔

    تفصیلات کے مطابق رواں ماہ چار اگست کو لبنان کے دارالحکومت بیروت میں ہونے والے دھماکوں کے نتیجے میں 160 افراد ہلاک جب کہ 6 ہزار سے زائد افراد زخمی ہوئے۔

    ابتدائی طور پر دھماکوں کی وجہ امونیم نائٹریٹ بتائی گئی اور کہا گیا کہ بیروت کی بندرگاہ پر امونیم نائٹریٹ کا ذخیرہ تھا، امونیم نائٹریٹ کے ساتھ آتشبازی کا مواد ہونے کی وجہ سے دھماکہ ہوا۔

    غیر ملکی خبر رساں ادارے کے مطابق اس حوالے سے اٹلی کے ایک دھماکہ خیز مواد کے ماہر نے انکشاف کیا ہے کہ بیروت دھماکوں کی اصل وجہ امونیم نائٹریٹ نہیں بلکہ فوجی میزائل ہو سکتے ہیں۔

    اطالوی ماہر دانیلو کوبی نے اطالوی اخبار سے گفتگو کرتے ہوئے کہا کہ میں سمجھتا ہوں کہ لبنانی بندرگاہ پر دھماکے کے وقت وہاں جنگی ہتھیار اور گولہ بارود موجود تھا، اس کی تصدیق اس بات سے ہوتی ہے کہ دھماکے کے بعد وہاں سے دھوئیں کے نارنجی بادل اٹھے تھے۔

    انہوں نے کہا کہ سوال یہ پیدا ہوتا ہے کہ امونیم نائٹریٹ مواد کو دھماکے سے اڑانے کے لیے کوئی عوامل ہونا چاہیے تھے بصورت دیگر یہ سب کچھ ایک ساتھ کیسے پھٹ گیا؟

    اطالوی ماہر نے واضح کیا کہ امونیم نائٹریٹ کے دھماکے کے وقت زرد بادل بنتا ہے تاہم بارود کی بندرگاہ کے دھماکے میں ظاہر ہونے والا وسیع بادل سرخی مائل نارنجی رنگ کا تھا، یہ رنگ روایتی طور پر لیتیم (دھات) کا پتہ دیتا ہے جو میزائلوں کی تیاری میں ایک بنیادی عنصر شمار کیا جاتا ہے۔

    انہوں نے مزید کہا کہ بیروت میں جو کچھ ہوا وہ بندرگاہ میں ہتھیاروں کے عارضی ذخیرے سے تعلق رکھتا ہے، میرے خیال میں پہلے درمیانے حجم کا ایک دھماکہ ہوا جس کے سبب گولہ بارود کے ڈپو میں آگ بھڑک اٹھی۔

    واضح رہے کہ گزشتہ روز بندرگاہ پر کام کرنے والے افراد کی جانب سے انکشاف کیا گیا تھا کہ کہ آتشبازی کے تھیلے بیروت کی بندرگاہ پر انتہائی دھماکہ خیز امونیم نائٹریٹ کے ساتھ ساتھ محفوظ تھے جس کی وجہ سے دھماکے ہوئے اور سارے شہر میں اس کی تباہی پھیل گئی تھی۔

  • پاک بحریہ کا بحیرہ عرب میں مختلف میزائلز فائر کرنے کا کامیاب تجربہ

    پاک بحریہ کا بحیرہ عرب میں مختلف میزائلز فائر کرنے کا کامیاب تجربہ

    کراچی: ارض پاک کے دفاع کو ناقابل تسخیر بنانے کے لیے افواج پاکستان نے ہمہ وقت تیار ہونے کا ایک اور ثبوت دے دیا، پاک بحریہ نے بحیرہ عرب اور مکران کوسٹ پر مختلف میزائلز فائر کرنے کا کامیاب تجربہ کر لیا۔

    تفصیلات کے مطابق ترجمان پاک بحریہ کا کہنا ہے کہ پاک بحریہ کی جانب سے شمالی بحیرہ عرب اور مکران کوسٹ پر مختلف میزائلز فائر کرنے کے کامیاب مظاہرے کیے گئے۔

    جنگی بحری و ہوائی جہاز نے سطح سمندر پر مار کرنے والے اینٹی شپ میزائلز فائر کیے۔ پاک بحریہ کی فاسٹ اٹیک کرافٹ نے سطح سمندر سے زمین پر میزائل فائر کر کے ہدف کو تباہ کیا جبکہ زیر سمندر روایتی آبدوز سے بھی زمین پر میزائل فائر کیا گیا۔

    ترجمان کے مطابق مکران کوسٹ سے ایئر ڈیفنس میزائلز بھی فائر کیے گئے، مختلف میزائلز نے اپنے اہداف کو انتہائی کامیابی سے نشانہ بنایا۔

    سربراہ پاک بحریہ ایڈمرل ظفر محمود عباسی نے تجربات کا مشاہدہ کیا۔ امیر البحر نے پاک بحریہ کی آپریشنل تیاریوں پر اطمینان کا اظہار کیا اور کہا کہ کامیا تجربات پاک بحریہ کی آپریشنل صلاحیت کا منہ بولتا ثبوت ہیں۔

    نیول چیف کا کہنا تھا کہ پاک بحریہ ہر جارحیت کا منہ توڑ جواب دینے کی صلاحیت رکھتی ہے۔

  • ہم نے انتہائی خطرناک میزائل مخفی رکھے ہیں، ایرانی نائب وزیر دفاع

    ہم نے انتہائی خطرناک میزائل مخفی رکھے ہیں، ایرانی نائب وزیر دفاع

    تہران : ایرانی نائب وزیر دفاع قاسم تقی زادہ نے اپنے خطاب کے دوران کہا کہ ’انتہائی پیچیدہ میزائلوں کی ہدف کو مار کرنے کی صلاحیت 1800 کلو میٹر تک ہے‘۔

    تفصیلات کے مطابق ایران کے نائب وزیر دفاع قاسم تقی زادہ نے کہا ہے کہ ان کے ملک نے انتہائی پیچیدہ نوعیت کے تباہ کن میزائل تیار کررکھے ہیں مگردشمن کو سرپر ائز دینے کے لیے انہیں منظرعام پرنہیں لایا گیا۔ ان میزائلوں کا حال ہی میں کامیاب تجربہ کیا گیا ہے۔

    شمال مشرقی ایران کے شہر مشہد میں خطاب کے دوران کہا کہ ایران اپنی تمام دفاعی کامیابیاں ذرائع ابلاغ کے سامنے نہیں لاتا، ہم بہت سی چیزیں چھپا کررکھتے ہیں تاکہ وقت آنے پر دشمن کو حیران کیا جاسکے۔

    قاسم تقی زادہ کا کہنا تھا کہ ایران نے انتہائی پیچیدہ میزائل تیار کررکھے ہیں، اگرچہ ان رینج زیادہ دور تک نہیں مگر وہ انتہائی تباہ کن ہیں۔

    انہوں نے مزید کہا کہ ہم نے مقامی سطح پر پیچیدہ میزائل تیار کرنے کے بعد مسلح افواج کے حوالے کردیے ہیں، ہم نے اپنا دفاعی اسلحہ میدان میں پہنچا دیا ہے۔

    قاسم تقی زادہ کا کہنا تھا کہ ایران کا جدید دفاعی نظام اپنی مثال آپ اور دنیا میں اس کی مثل کوئی دوسرا دفاعی نظام نہیں، یہ نظام کسی دوسرے ملک کی مدد یا غیرملکی اسلحے کی نقل میں تیار نہیں کیا گیا بلکہ اس کا سارا کام مقامی سطح پر ہوا ہے۔

    ایرانی نائب وزیردفاع نے کہا کہ انتہائی پیچیدہ میزائلوں کی ہدف کو مار کرنے کی صلاحیت 1800 کلو میٹر تک ہے۔آنے والے وقت ہیں ایران پیچیدہ نوعیت کے طویل فاصلے تک مار کرنے والے میزائل تیار کرے گا۔

  • شمالی کوریا کا مزید 2 میزائلوں کا تجربہ

    شمالی کوریا کا مزید 2 میزائلوں کا تجربہ

    پیانگ یانگ: شمالی کوریا نے اپنی مضبوط دفاعی صلاحیت کا مظاہرہ کرتے ہوئے ایک ہفتے کے دوران چوتھے میزائل کا کامیاب تجربہ کرلیا۔

    تفصیلات کے مطابق جنوبی کوریا کا کہنا ہے کہ شمالی کوریا کی جانب سے دو میزائل جنوبی صوبہ ہانگ ہائے سے مشرق کی جانب سے سمندر میں داغا گئے ہیں۔

    شمالی کوریا نے گزشتہ روز امریکا اور جنوبی کوریا کے درمیان شروع ہونے والی فوجی مشقوں پر برہمی کا اظہار کیا تھا۔

    شمالی کوریا کے مطابق یہ مشقیں امریکی صدر ڈونلڈ ٹرمپ اور جنوبی کوریا کے صدر مون جے ان کے ساتھ طے پانے والے معاہدوں کی خلاف ورزی ہیں۔

    جنوبی کوریا کے حکام کے مطابق گزشتہ جمعے شمالی کوریا نے کم فاصلے تک ہدف کو نشانہ بنانے والی نئی قسم کے میزائلوں کا تجربہ کیا تھا۔

    جنوبی کوریا کے جوائنٹ چیفس آف اسٹاف کے حکام کے مطابق یہ دو میزائل بحیرہ جاپان میں جا گرے۔

    جوائنٹ چیفس آف اسٹاف کے مطابق ان میزائلوں نے انتہائی سست روی سے تقریباََ 220 کلومیٹر کا فاصلہ طے کیا تاہم تجزیہ کاروں کے مطابق میزائل بظاہر غیرمعمولی طور پر تیز رفتار تھے۔

  • روس سے میزائل کیوں خریدے؟ امریکا نے ترک پائلٹس کو ملک بدر کردیا

    روس سے میزائل کیوں خریدے؟ امریکا نے ترک پائلٹس کو ملک بدر کردیا

    واشنگٹن : امریکا نے ترکی کو روس سے ایس 400 میزائل سسٹم خریدنے سے منع کیا تھا ٹرمپ انتظامیہ کی بات نہ ماننے پر امریکا نے ترکش پائلٹس کو ملک بدر کردیا۔

    تفصیلات کے مطابق ترکی کے روس سے ایس 400 میزائل سسٹم خریدنے پر نالاں امریکا نے صدر طیب اردگان کے ساتھ کیے گئے ایف35 طیاروں کے معاہدے کو منسوخ کرنے کی دھمکی دیتے ہوئے ترک پائلٹس کو ملک بدر کردیا۔

    بین الاقوامی خبر رساں ادارے کے مطابق امریکا اور ترکی کے درمیان تنازع شدت اختیار کرگیا ہے، ترکی امریکی دھمکیوں کے باوجود روس سے جدید میزائل سسٹم ایس 400 کی خریداری پر قائم ہے جس پر امریکا نے ترکی کے ساتھ ایف35 ڈیل جزوی طور پر منسوخ کردی۔

    امریکا نے ترکی کی ثابت قدمی پر برہمی کا اظہار کرتے ہوئے ترک امریکا ایف35 ڈیل خاتمے کا آغاز کردیا ہے، اس معاہدے کے تحت امریکا ترکی کو ایف35 طیارے فراہم کرے گا اور ان طیاروں کے لیے ترک پائلٹس کو تربیت بھی فراہم کرنی تھی۔

    اس حوالے سے امریکا نے ترکی کو لکھے گئے خط میں ایف-35 ڈیل سے علیحدگی سے آگاہ کرتے ہوئے دھمکی دی کہ اگر روس سے ایس 400 دفاعی نظام خریدے گئے تو امریکا بھی ترکی کو ایف 35 طیارے نہیں دے سکتا۔

    اس ضمن میں ابتدائی طور پر امریکی وزارت دفاع نے ایف 35 طیاروں کے لیے تربیت لینے والے ترک پائلٹس کو رواں ماہ کے آخر تک امریکا چھوڑنے کی ہدایت کرتے ہوئے کہا کہ اگر ترکی باز نہ آیا تو ایف35 ڈیل مکمل طور پر منسوخ کردی جائے گی۔

  • امریکا سے درمیانے فاصلے تک مار کی صلاحیت والے میزائل خرید رہے ہیں، ہنگری

    امریکا سے درمیانے فاصلے تک مار کی صلاحیت والے میزائل خرید رہے ہیں، ہنگری

    بڈاپسٹ : ہنگری امریکا سے درمیانے فاصلے پر مار کرنے والے فضائی دفاعی میزائلوں کی خریداری کا فیصلہ کرلیا۔

    تفصیلات کے مطابق ہنگری کے وزیراعظم وکٹور اوربان نے تصدیق کی ہے کہ ان کا ملک امریکا سے درمیانے فاصلے تک مار کی صلاحیت کے حامل فضائی دفاعی میزائل خرید رہا ہے۔

    غیر ملکی خبر رساں ادارے کا کہنا تھا کہ ہنگری کی وزیر اعظم وکٹوریہ اوربان فضائی دفاعی میزائلوں کی خریداری سے متعلق تفصیلات جلد بتائیں گے۔

    وائٹ ہاؤس کے دورے پر متعدد دیگر علاقائی اور عالمی امور پر امریکی صدر ڈونلڈ ٹرمپ سے بات چیت کی، غیرملکی خبررساں ادارے کے مطابق سرکاری ریڈیو پر اپنے بیان میں اوربان نے بتایا کہ ان کی حکومت جدید فوج کے تیاری کا عمل جاری رکھے گی۔

    ان کا کہنا تھا کہ فضائی دفاعی میزائلوں کی خریداری سے متعلق تفصیلات وہ جلد بتائیں گے، اوربان نے اپنے بیان میں کہا کہ وائٹ ہاؤس کے دورے پر انہوں نے متعدد دیگر علاقائی اور عالمی امور پر امریکی صدر ڈونلڈ ٹرمپ سے بات چیت کی۔

    ہنگری کی وزیر اعظم کا کہنا تھا کہ ’ہم چین اور روسیوں کے ساتھ تعاون کرتے ہیں اور ساتھ ساتھ امریکا کے ساتھ اچھے تعلقات ہیں۔

    ان کا کہنا تھا کہ امریکا سے بہتر تعلقات کی ایک وجہ یہ بھی ہے کہ امریکا ہمارا فوجی اتحادی ہے جو امریکا اور ہنگری کے مضبوط تعلقات کا باعث ہے۔

  • یورپ ایران کو میزائلوں سے غیر مسلح کرنے کی کوشش نہ کرے، ایران

    یورپ ایران کو میزائلوں سے غیر مسلح کرنے کی کوشش نہ کرے، ایران

    تہران : ایران نے یورپی ممالک کو تنبیہ کی ہے کہ ’اگر ایران کو میزائل کی تیاریوں سے روکا گیا تو اسلامی جمہوریہ اپنے میزائلوں کی رینج میں اضافہ کردے گا‘۔

    تفصیلات کے مطابق یورپی یونین کی جانب سے ایران کو بیلسٹک میزائل پروگرام نہ روکنے کی صورت میں ایران پر نئی پابندیاں عائد کرنے کی دھمکی دی گئی تھی، جس کے بعد ایران اور یورپی ممالک کے درمیان لفظی گولہ باری شروع ہوگئی ہے۔

    [bs-quote quote=”ایران اپنی دفاعی پالیسی کے تحت میزائل پروگرام میں تبدیلی کرے گا” style=”style-20″ align=”left” author_name=”جنرل حسین سلامی” author_job=”ڈپٹی کمانڈر سپاہ پاسداران” author_avatar=”https://arynewsudweb.wpengine.com/wp-content/uploads/2019/02/51421276_801732500170297_2757348830570610688_n.jpg”][/bs-quote]

    سپاہ پاسداران انقلاب کے ڈپٹہ کمانڈر بریگیڈئیر جنرل حسین سلامی کا کہنا تھا کہ یورپی یونین یا کوئی اور ملک ایران کو میزائلوں سے غیر مسلح کرنے کی کوشش کریں گے تو ہم اپنے بیلسٹک میزائلوں کی صلاحتیوں میں اضافہ کردیں گے۔

    جنرل حسین سلامی کا کہنا تھا کہ ’ایران پر میزائلوں کی رینج اور صلاحیتوں میں اضافے سے متعلق کوئی پابندی نہیں ہے، ایران اپنی دفاعی ضروریات کے مطابق میزائل ٹیکنالوجی تیار کرے گا اور وقت کے ساتھ ساتھ اس میں تبدیلی بھی کرے گا‘۔

    مزید پڑھیں : ایران کا طویل فاصلے پر مار کرنے والے کروز میزائل کا کامیاب تجربہ

    خیال رہے کہ ایران نے 2 فروری کو انقلاب کے 40 ویں سالگرہ پر جدید ٹیکنالوجی سے لیس طویل فاصلے پر مار کرنے والے کروز میزائل کا کامیاب تجربہ کیا تھا، میزائل 1300 کلو میٹر تک اپنے ہدف کو نشانہ بناسکتا ہے۔

    ایرانی وزیر دفاع عامر ہتامی کے مطابق ایران میں انقلاب کے 40 برس مکمل ہونے پر دس روزہ جشن منایا جارہا ہے، 1300 کلو میٹر تک ہدف کو نشانہ بنانے والا کروز میزائل کم اونچائی پر بھی پرواز کرسکتا ہے اور اپنے ہدف کامیابی سے نشانہ بنانے کی صلاحیت بھی رکھتا ہے۔

    مزید پڑھیں : مذاکرات کی ناکامی پر ایران نئی پابندیوں کیلئے تیار رہے، فرانسیسی وزیر خارجہ

    یاد رہے کہ گزشتہ ماہ فرانسیسی وزیر خارجہ جین لی ڈریان نے کہا تھا کہ ایران کو بیلسٹک میزائل پروگرام روکنا ہوگا اگر مذاکرات بے نتیجہ رہے تو ایران نئی پابندیوں کیلئے تیار رہے۔

    برطانوی خبر رساں ادارے کا کہنا ہے کہ فرانس سمیت یورپی یونین کے دیگر ممالک بھی ایران کے خلاف نئی پابندیاں کرنے پر غور کررہے ہیں۔