لاہور: ماڈل عبیرہ قتل کیس کے ملزم فاروق الرحمن نے جج پر دم اعتماد کا اظہارکردیا جس کے بعد ایڈیشنل ڈسٹرکٹ اینڈ سیشن جج مبشرندیم نے کیس دوسرے سیشن جج کوبھجوادیا۔
تفصیلات کے مطابق لاہورکے ایڈیشنل ڈسٹرکٹ اینڈ سیشن جج مبشر ندیم نے کیس کی سماعت کی۔ تفتیشی افسر نے ملزمہ طوبہ، حکیم ذیشان اورفاروق الرحمن کو سخت سیکیورٹی میں پیش کیا۔
ملزمان کے وکلا نے عدالت کوآگاہ کیا کہ ان کے خلاف ماڈل عبیرہ کے قتل کا جھوٹا مقدمہ درج کیا گیا ہے ان کے موکلین کے خلاف کوئی گواہ اورشہادت موجود نہیں ہے۔
سرکاری وکیل نے عدالت کو بتایا کہ ملزمان پولیس چالان میں گناہ گار قرار پاچکے ہیں لہذا ان پر فرد جرم عائد کی جائے۔
ملزم فاروق الرحمن کے وکیل آذرلطیف نے جج پرعدم اعتماد کا اظہار کرتے ہوئے کہا کہ ان کے مقدمے کو کسی دوسری عدالت میں منتقل کیا جائے جس کے سبب عدالت نے کیس سیشن جج لاہورکو واپس بھجوا دیا ہے۔
ملزم فاروق کے عدم اعتماد کے باعث تینوں ملزمان پر فرد جرم عائد نہیں ہوسکی۔
