لاہور: سانحہ ماڈل کی تحقیقات کرنے والی جوائنٹ انوسٹی گیشن ٹیم کا اجلاس لاہور میں ہوا ۔
لاہور میں سانحہ ماڈل ٹاؤن پر ہونے والا جے آئی ٹی کا اجلاس سی سی پی او کوئٹہ عبدالرزاق چیمہ کی سربراہی میں ہوا، ڈائریکٹر منہاج القرآن سیکرٹریٹ جواد حامد بیان ریکارڈ کروانے نہیں پہنچے جے آئی ٹی ذرائع کے مطابق انہیں اپنا بیان ریکارڈ کروانے کے لیے نوٹس جاری کیا تھا تاہم جواد حامدنے جے آئی ٹی کی جانب سےنوٹس موصول ہونے سے انکار کیا تھا۔
لاہور: سانحہ ماڈل ٹاؤن کی انکوائری پر قائم جوائنٹ انوسٹی گیشن ٹیم کا پہلا اجلاس سی سی پی او کوئٹہ عبدالرزاق چیمہ کی سربراہی میں لاہور میں ہوا۔
سانحہ ماڈل ٹاؤن کی انکوائری کیلئے قائم جے آئی ٹی کے پہلے اجلاس میں پولیس اور حساس اداروں کے نمائندوں نے شرکت بھی کی، جس میں پنجاب پولیس کی جانب سے اے آئی جی ریجنز شہزاد اکبر،ڈی ایس پی سی آئی اے خالد ابوبکر ،آئی ایس آئی کی جانب سے کرنل احمد اور انٹیلی جنس بیورو کے محمد علی نے شرکت کی ۔
تین گھنٹے تک جاری جے آئی ٹی کے پہلے اجلاس میں گزشتہ تحقیقات سمیت پولیس افسران کے بیان حلفی اور دیگر تحقیقات کا تفصیلی جائزہ لیا گیا۔ ذرائع کے مطابق سانحہ ماڈل ٹاون کی تحقیقات کےلیے جوائنٹ انوسٹی گیشن ٹیم نے ادارہ منہاج القرآن کے ڈائریکٹر ایڈمن جواد حامد کو نوٹس جاری کیا ہے ، جس میں انہیں جے آئی ٹی کے سامنے پیش ہونے کا کہا گیا ہے۔
منہاج القرآن کے ترجمان نور اللہ صدیقی کے مطابق انہیں جے آئی ٹی سے جاری کردہ کوئی نوٹس موصول نہیں ہوا، اور انھیں جے آئی ٹی پر انہیں اعتماد نہیں ہے۔
لاہور: سانحہ ماڈل ٹاؤن کی تحقیقات کیلئےجے آئی ٹی کا اجلاس آج ہوگا جبکہ علامہ طاہرالقادری مشترکہ تحقیقاتی ٹیم کو پہلے ہی مسترد کرچکے ہیں۔
سانحہ ماڈل ٹاؤن کی جوائنٹ انویسٹی گیشن ٹیم کا اجلاس آج ہوگا لیکن ٹیم کی تشکیل متنازع بنی ہوئی ہے، سربراہ پاکستان عوامی تحریک جے آئی ٹی پرعدم اعتماد کا اظہار کرچکے ہیں۔ علامہ طاہر القادری کے مطابق جے آئی ٹی کے سربراہ سی سی پی او کوئٹہ عبدالرزاق چیمہ شہباز شریف کے خاندانی دوست ہیں۔
ذرائع نے انکشاف کیا ہے کہ سانحہ ماڈل ٹاؤن کے مرکزی ملزم رانا جبار کے دوست ایس ایس پی رانا شہزاد کو جے آئی ٹی میں شامل کردیا گیا ہے، جےآئی ٹی کے دیگر ممبران میں آئی ایس آئی کے کرنل احمد، ایڈیشنل آئی جی راحت علی اور سی آئی اے کے خالدابوبکر شامل ہیں۔
متاثرہ فریق کی جانب سے جے آئی ٹی پراعتراض کے بعد تحقیقات کس قدر شفاف اور قابل قبول ہوگی یہ جاننا کچھ ایسا مشکل نہیں۔
لاہور: سانحہ ماڈل ٹاؤن کی تحقیقات کیلئے سی سی پی او کوئٹہ کی سربراہی میں جے آئی ٹی کا اجلاس کل ہوگا۔
پاکستان عوامی تحریک کے سربراہ ڈاکٹر طاہرالقادری حکومت کی بنائی جوائنٹ انویسٹی گیس ٹیم پر عدم اعتماد کا اظہار کر چکے ہیں۔
علامہ طاہرالقادری نے کہا تھا کہ جے آئی ٹی کے سربراہ عبدالرزاق چیمہ شہباز شریف کے فیملی فرینڈ ہیں، سانحہ ماڈل ٹاؤن قتل عام پر جے آئی ٹی کا اجلاس بدھ کو ہو رہا ہے۔جو سی سی پی او کوئٹہ کی سربراہی میں ہوگا جےآئی ٹی ممبران میں آئی ایس آئی کی جانب سےکرنل احمد شامل ہیں۔
پولیس کی جانب سےایڈیشنل آئی جی راحت علی اورسی آئی اےکےخالدابوبکرجے آئی ٹی کے ارکان ہیں، پاکستان عوامی تحریک نے سانحہ ماڈل ٹاؤن کو پانچ ماہ مکمل ہونے پر منگل کو شہرشہر احتجاج بھی کیا تھا، عوامی تحریک کی جانب سے سانحہ ماڈل ٹاؤن جوڈیشل انکوائری رپورٹ منظر عام پر لانے کی درخواستیں بھی لاہور ہائیکورٹ میں زیر سماعت ہیں۔
لاہور: سانحہ ماڈل ٹاؤن کی انکوائری رپورٹ منظرعام پرلانے کی درخواستوں پرحکومت سے یکم دسمبرتک جواب طلب کرلیاگیا۔
۔
مقدمےکی سماعت لاہورہائی کورٹ میں ہوئی جس کے دوران عوامی تحریک کی جانب سے دی گئی درخواست میں وزیراعلیٰ پنجاب کا نام حذف کردیا گیا ہے۔ وزیرِاعلیٰ کو فریق بنانے پرہائیکورٹ نے اعتراض عائد کیا تھا۔۔
پی اے ٹی کی جانب سے موٗقف اختیار کیاگیا ہے کہ جوڈیشل انکوائری کو منظرِعام پرلایا جائے تاکہ اصل ذمہ داروں کا تعین ہوسکے، آئین کے تحت عوام کو اطلاعات تک رسائی کا بنیادی حق حاصل ہے، پنجاب حکومت رپورٹ شائع نہ کر کے ذمہ داروں کو بچانا چاہتی ہے۔۔
لاہور: سانحہ ماڈل ٹاون کی تحقیقات کرنے والے ٹریبونل کے خلاف بیان بازی پررانا ثناءاللہ کو لیگل نوٹس بھیج دیا گیا ہے۔
سانحہ ماڈل ٹاون کی تحقیقات کے لیے بنائے گئے ٹریبونل کیخلاف بیان بازی پررانا ثناءاللہ کو لیگل نوٹس بھیج دیا گیا ہے، نوٹس ایڈووکیٹ چوہدری شعیب کی جانب سے بھیجا گیا ہے جس میں کہاگیا ہے کہ رانا ثناءاللہ کی ماڈل ٹاون ٹریبونل کے خلاف بیان بازی توہین عدالت ہے۔ سابق صوبائی وزیرکا مقصد ٹریبونل کو متنازع بنا کر رپورٹ پر عوام کے اعتماد کو متزلزل کرنا ہے۔ نوٹس میں کہا گیا ہے کہ رانا ثناءاللہ ٹریبونل کیخلاف اپنے بیانات پرمعافی مانگیں ورنہ ان کے خلاف قانونی چارہ جوئی کی جائے گی۔
لاہور: سانحہ ماڈل ٹاون کےمرکزی کردار گلو بٹ نے ڈاکٹر طاہرالقادری کو والد اور عمران خان کو ماموں قرار دے دیا ۔
گلو بٹ سانحہ ماڈل ٹاون توڑ پھوڑ کیس میں انسداد دہشت گردی لاہورکی خصوصی عدالت میں پیش ہوئے جہاں واقعہ کےگواہ اے ایس آئی منیر نے عدالت کے روبرو اپنا بیان قلمبند کرایا جس میں کہا گیا کہ گلوبٹ نے پولیس پر فائرنگ کی اور گاڑیوں کی توڑ پھوڑ کی جس سے سترہ جون کو ملک بھر میں خوف وہراس پھیلا تھا۔
عدالت نے کیس کی سماعت تئیس اکتوبر تک ملتوی کرتے ہوئے مزیدگواہوں کو بیانات قلمبند کرانے کے لئے طلب کر لیا۔عدالتی سماعت کے بعد میڈیا سے گفتگو کرتے ہوئے گلو بٹ کا کہنا تھا کہ ڈاکٹر طاہرالقادری کو والد اور عمران خان کو ماموں قرار دیتے ہوئے کہا کہ اگر دونوں رہنما انکے متعلق سخت جملے بولتے ہیں تو اس پر وہ برا نہیں مناتے۔
لاہور: انسداد دہشتگردی کی خصوصی عدالت نے گلو بٹ کے خلاف توڑ پھوڑ اور دہشت پھیلانے کے مقدمے کی سماعت کے دوران گواہ سب انسپکٹر صفدرنے شہادت ریکارڈ کرائی۔
انسداد دہشتگردی کی عدالت میں گلو بٹ کیخلاف توڑ پھوڑ اور دہشت پھیلانے کے مقدمے کی سماعت شروع ہوئی، سانحہ ماڈل ٹاؤن کا مرکزی کرداری گلو بٹ عدالت میں پیش ہوئے تو استغاثہ کے گواہ سب انسپکٹر صفدر نے شہادت ریکارڈ کرائی، جس کے بعد عدالت نے سماعت ملتوی کرتے ہوئے مزید گواہان کواکیس اکتوبر کو شہادتوں کیلئے طلب کر لیا ہے۔
پیشی کے بعد میڈیا سے گفتگو کرتے ہوئے گلو بٹ کا کہنا تھا کہ وہ کبھی جرائم میں ملوث نہیں رہا، حادثاتی طور پر اس مقدمے پھنسا ہے، اس نے خواہش ظاہر کی کہ وہ مقدمے سے بری ہو کر فلاحی کام کرے گا۔
لاہور: سانحہ ماڈل ٹاؤن پر جوڈیشل انکوائری رپورٹ پر محکمہ داخلہ کا کہنا ہے کہ لاہورہائیکورٹ کی جانب سے بھیجی گئی رپورٹ ہی نامکمل ہے، مکمل رپورٹ کے لئے ازسرِ نو درخواست دے دی گئی ہے۔
سانحہ ماڈل ٹاون کی جوڈیشل انکوائری رپورٹ پر حکومتِ پنجاب نے انوکھا مؤقف اختیار کرلیا ہے، محکمۂ داخلہ کے مطابق لاہور ہائیکورٹ نے سانحہ ماڈل ٹاؤن پر جو رپورٹ فراہم کی، وہ نامکمل ہے، بہت سی اہم دستاویزات اور معلومات رپورٹ کے ساتھ حکومت پنجاب کو نہیں دی گئیں ۔
محکمۂ داخلہ کا کہنا ہے کہ رپورٹ نامکمل ہے، جس کے باعث منظرعام پر نہیں لایا جاسکتا، محکمہ داخلہ نے لاہورہائیکورٹ کو مکمل رپورٹ بھجوانے کےلیے دوبارہ درخواست دے دی ہے ۔
محکمۂ داخلہ کے مطابق مکمل رپورٹ آنے کے بعد ہی اسے منظر عام پر لانے کا فیصلہ کیا جائے گا، ادھرسانحۂ ماڈل ٹاون پر قائم کیے گئے ٹربیونل کے معاون نے حکومت کی درخواست مسترد کردی ہے۔
لاہور: سانحۂ ماڈل ٹاؤن میں عوامی املاک کو نقصان پہنچانےکامشہورترین ملزم گلوبٹ آج صبح عدالت نے رہا کردیا گیا، اس کی رہائی کےموقع پرعوام کی جانب سے انتہائی غم وغصہ کا اظہار کیا گیا۔
تفصیلات کے مطابق گلوبٹ جو کہ 17 جون کو سانحۂ ماڈل ٹاؤن کاسب سے واضح کردارتھا لاہورہائیکورٹ کے حکم پر رہا کردیا گیا ، گلوبٹ کی رہائی کیمپ جیل لاہور سے عمل میں آئی۔
گلو بٹ کی رہائی کے موقع پر شہریوں کی ایک بڑی تعداد جیل کے دروازے کے باہر جمع تھی اورمشتعل مظاہرین نے شدید غم وغصہ کا مظاہرہ کرتے ہوئے حکومت مخالف نعرے لگائے۔
اے آر وائی نیوزکے نمائندے بابرخان کےمطابق گلوبٹ کو جیل کےوی آئی پی دروازے سے باہر نکالا گیا جہاں اس کا کزن راشد بٹ اسے نئے ماڈل کی سفید کار میں بٹھا کر لے گیا، جیل انتظامیہ کے مطابق قید کے دوران گلوبٹ سے کسی بھی شخص نے ملاقات نہیں کی اور یہ پہلا موقع ہے کہ اس کے خاندان سے کوئی شخص جیل آیا ہو۔
پاکستان عوامی تحریک کے سربراہ نے اس موقع پرموجودہ حکومتی نظام پر شدید تنقید کرتے ہوئے اسے ’’گلو کریسی‘‘ قراردے دیا۔